Singapore 29.12.2017 - 1.1.2018

Es isch sehr speziell, anstell vome Koffer en Backpack-Rucksack zpacke! Zum Bispiel drüber nahdenke, das i de verschiedene Länder verschiedeni Klimas herrschet und das mer au no müend dNummereschilder vom Auto abgeh, wäg de Versicherig. DLischde nid vergesse mit allne to-do’s druf etc. Es Stündli im Zug richtig Züri Flughafe und anderthalb Stunde später in Amsterdam oder inere andere Stadt in Europa zsi und umezlaufe, das wird’s nid ganz si. So wirds eus bewusst, das mer jetzt echt uf Reis gönd! SAbentüür chan afange…!!

Singapore

Au de Abschied isch das mal e bitz anderst, meh Emotione als sust! Jetzt heissts den würkli schnell Bscheid geh wänn mir glandet sind. Visum, Pass, Impfuswies, Gäld, Kreditkarte etc…ja alles isch däbi! Jetzt isch es Zit e neui Wält zentdecke. Da ghört au 13.5 Stund stillsitze au däzue! 😊

Mit beide Bei uf singaporischem Bode fangt sAbentüür und dFreiheit a! Die tropischi Wärmi isch eus dusse au grad entgägä cho und dine lauft Klimaalag uf Hochdure! De Flughafe isch sehr strukturiert und organisiert. Ebeso extrem suber. Überall Teppich, und de isch so suber, das mer au barfuess druf laufe chönt und dFüess nid dräckig wäret nacher! Die elektronisch ÖV-Karte hämmer vo Kollege übercho, händ sie no schnell müese uflade und denn simmer scho mit eusne Backpack-Rucksäck ufem Rugge i de U-Bahn gstande. Zwüschet all dene verschiedene asiatische Gsicht simmer mit eusne Rucksäck natürlich au sofort ufgfahle und händ alli Blick uf eus zoge! Hetemer eus doch nach dem Flug nochli schön gmacht. 😊 Singapore, das Land der Regeln. Sogar i de U-Bahn herrschet strikti Regle, kei Esse und Trinke, aber so wies usgseht händs uf all Fäll kei Handyverbot.

So, die erschdi Nacht isch überstande, die kurze Hose montiert und en Toast mit es paar Frücht isch au im Mage. Für alles andere (Nudelsuppe, Ris, Chicken Nuggets etc.) isch es für eus doch no es paar Stündli zfrüeh! 😉 Chum simmer dusse gsi, häts au scho in Ströme abelah! Mir händ gmeint öper hät vergesse die warm Duschi abzstehle. So simmer in erste Lade und händ eus zwei Regeschirm für je 4 Singapore-Dollars kauft. Wie sich usestellt die besti Investition für e langi Zit!
Und uf zur Marina Bay mit dem imposante und berüehmte Hotel Marina Bay Sands. Unglaublich imposant. Es hät ufghört rägne, so hämmer eus entschiede die Stadt mal vo obe azluege. 56. Stock, de Wahnsinn! Leider isch sberüehmte Bad im 57. Stock nur für Hotelgäschd zuegänglich und daher gsehnds mir nur vo wietem! Mal luege ob ich dIlse no chan überzüge zum doch no e Nacht i dem Hotel zübernachte, damit mir die Baderfahrig au erläbä chönd. 😊

Singapore isch e Stadt wo sehr viel zbüte hät und slässige dra isch, das z.B. im Chinatown, Little India und de Arab Street gwüssi Teil vo de Gschicht no erhalte bliebe isch und so echt sehenswert. Ohni Vorahnig stiegsch id U-Bahn i und stiegsch gfühlsmässig zmitzt in China wieder us. Inklusiv billige Souvenirs (made in China 😉), verkleideti Verkäuferinne und de herzig Akzent wäns probieret Englisch zrede. Inere Food Mall hämmer das berüehmte Tiam Tam Poulet gässä.

Au am nächste Tag im Little India isch es eis grosses Chaos und dFraue sind schön kleidet. DStrasseränd sind mit sehr viel Gmües- und Früchtlädä bestückt, mit au sust allerlei Zügs. Aber was isch Little India ohni Gold, Gold und no meh Gold!!! Eine nachem andere bütet ihre Goldschmuck a, unglaublich! DStrasse sind volle vo Mensche, Inder und neugierige Touriste! DIlse hät wiedermal hunger gha und häts nöd chöne lah, bime Strasseresti öpis zbstehle. Statt Täller hät sie alles ufeme Tablett miteme Papier drunder übercho, sehr speziell! Ungefähr Mc Donalds eifach ohni dKartonverpackige! Poulet Massala, Ris miteme Ei i de Mitti und Zwiebelsalat. Da isch es au keis Wunder meh vo wo dInder de Körpergruch händ 😉.

Natürlich simmer au ad Promenade vo Singapur und im andere Teil vo de Stadt wo sehr modern isch. Vom eine Wow zum andere…! Leider hämmer ufgrund vom Rägä es paar Sehenswürdigkeite müese uslah. Wahrschinlich werdemer Ende Januar doch nomol 1-2 Nächt früehner nach Singapore cho zum die Stadt evtl. no mit Sunne und blauem Himmel zgseh?! Danke liebe Petrus…

Am zweite Abig simmer uf dNachtsafari im Singapore Zoo. Danke viel mal Ayse für das tolle Geburigschänk! Es isch e bsunderi Erfahrig gsi mit dem chline Trämmli dur de Zoo zfahre und die verschiedene Tier zgseh! Es sind eifach no es paar tusig ander Mensche uf die glich Idee cho, was leider langi Warteschlange mit sich zoge hät!

Und denn Silvester. Eigenlich han ich en schöne Tisch am Marina Bay ime japanische Restaurant reserviert. Zum sichergah, hämmer die Reservation wele go bestätige, mir sind au uf de Lischde gsi, aber weder im Internet no sust neumet isch öpis vome 7-Gang-Fisch-Menü gstande! Und scho gar nöd für de Pris! Han gmeint mir müend sResti chaufe. Drum hämmer denn kurzerhand die Reservation cancelled und sind ohni Plan dagstande ca. 8h vor Mitternacht! Es isch dän schlussendlich es Spareribs-Esse worde 😉. Um die halbi 11 simmer denn faschd schwimmend richtig Marina Bay zu de Deltabrugg mit Ussicht ufs Füürwerk, umgeh vo liebe Familie wo sneue Jahr richtig igjohlet händ! Uf e guets Neus!!

Morn gahts ab uf Vietnam. En Flug vo ca. 3.5h Singapore – Hanoi! Wir kommen!