30.05.2019 Akureyri, Eyjafjördur / Island

Akureyri, endlich wieder Festland! 

D'Nacht isch guet gsi, au lang dank de Ziitverschiebig. Bettina isch au wieder ufm Damm gsi und isch mit cho zmorge esse. 

Im Fjord sin mir scho sehr früeh gsi, drum isch d'See au sehr ruhig. Paar Minute vor Plan sin mir au scho fest gsi. S'Schiff hen mir ziemli als erschti verloh, uf uns het drum ä Wal Beobachtigstour gwartet. 

Z'Fuess nur paar Meter vom Schiff entfernt het das Böötli gwartet. Vorher hen mir no in Überlebensszüg ine "dörfe". Eigentlich nid schlecht wills schön warm git, aber für das hen mir langi Unterwösch ah gha... 

 S'Wetter spielt voll mit, über em Fjord blau mit Sunne, d'Wolke sammle sich bi de Gipfel. D'Fahrt isch eigentlich in die richtig vo wo s'Schiff cho isch, da Akureyri am endi vom Fjord liegt. Isch au garnid so lang gange und mir hen die erschte Wal gseh. 

Sin alles Buckelwal, sin ca 12-15Meter lang und chöme in Fjord zum Esse sueche. Mir hen die Gruppe immer wieder chöne beobachte wie sie uftauche, Luft gholt hen und denn wieder abtaucht sin. 

 Ziit isch wie im Flug drvo und denn sin mir au scho zrugg. 

Us dene Ahzüg use pellt und denn in "Stadt" öbbis Esse go sueche. Ä gmüetlichs Restaurant hen mir gfunde, beide isländische Lachs mit Salat und eimol mit Fladebrot, isch lecker gsi. 

 Denn durch d'stadt gschlenderet und s'obligate Magnetli kauft und sunscht no gshoppt. 

 Denn hets Schiff au scho uf uns gwartet.