28.05.2019 Hellesylt / Norwegen 08:00 09:00 Geiranger, Geirangerfjord / Norwegen

Hüt isch ä wiiteres Highlight ufm Programm, Geiranger. Erwache sin mir als s'Schiffli si Zwüschehalt in Hellesylt gmacht het. Dört sin paar Usflügler usgstiege, mir hen die Ziit mit früehstücke sinnvoll gnützt. 

 Nachm Früehstück aber schnell uf Deck, ä guete Platz sichere. Mit vielne hunderte andere Lüüt hen mir unseri Position uf Deck iignoh. Und denn isch wiitergange richtig Geiranger. Eigentlich nur ä churzi, guet ä stündigi, Etappe ab Hellesylt, aber mit vielne schöne Motiv. Nid umsunscht zählt alles do zum UNESCO Weltkulturerbe. Unzähligi Wasserfäll, darunter die bekannte siebe Schwöschtere wo sich hüt au zeigt hen. Hunderti Meter hohi Fellswänd wo fascht jedes Güpfli no Schnee het, und natürlich de schöni Fjord. 

 Ahcho in Geiranger hen mir dörfe Ankere, de einzig Pier isch belegt vo de Serenade of the Seas. Us dem Grund hen mir au müesse mitm Tenderboot fahre. Isch aber alles weniger schlimm gsi, de Fjord isch Spiegelglatt gsi und d'Überfahrt keini 10min gange. Geiranger selber isch ä chlins Dörfli, guet 200 iiwohner und hüt ca. 6000 Krüzfährtler 🙄 

Mir sin au scho bald zu unserem Twizy Vermieter unser Charre go hole. Da s'Wetter au langsam ufmacht hen mir grad ä guets Ziitfenschter verwütscht. Mitm vollem Akku isch es richtig Adlerschwingen gange. Ä bekannte Pass mit tolle Sicht uf de Geirangerfjord. Vieli Föteli gmacht, no bitz de Schnee bestuunt und denn sin mir au scho in die ander Richtig. 

 Dört isch es durchs Dörfli Geiranger gange. Richtig Wasserfäll, Himmelsthron und Stadttor. Ganz obe het uns sogar ä chline Schneesturm erwartet. Bettina het wohl ei zwei Flöckli abbecho und nid ganz soviel Freud gha hinte. So sin mir au scho glii umkehrt. Paar hundert Meter wiiter isch s'Wetter au viel besser gsi. Chöne Foti Stopps mache und no zu ä einsame Buurehof fahre. 

Denn isch unseri Mietziit und de Akku scho au fertig gsi und mit hen de Twizy abgeh. Mir sin denn i ä Lade öbbis chlins go chaufe und hen denn direkt am Fjord chöne esse, und das bi Sunne. 

De letzschti Tender Fahrt am vieri, also langsam zrugg. Isch alles guet organisiert gsi und mir sin problemlos wieder ufs Schiff cho.

Uslaufe no bitz vom Deck und vo de Kabine gnosse. G'esse und denn au scho bald ins Bett