27.05.2019 Bergen, By-Fjord / Norwegen

Mäntig, guete morge Bergen in de Berge! Bergen het si Name anschiinend vo de siebe Berge rundum. Siebe isch au grad denn wo mir ufgwache sin, Vorhang zoge und s'Schiff isch au scho fescht im Industriehafe gsi. Wettermässig sin mir au wieder zfriede, isch nid warm aber überwiegend sunnig. Bim zmorge hen mir uns gstärkt und denn sin mir au scho bald vom Schiff gange. De Hafeshuttle het uns zum Usgang Hafe brocht und dört hen mir au direkt uf de Hop on-Hop off Bus chöne. 

 Zum Start sin mir mol sitze bliibe, de Bus het uns erscht mol eimol durch d'Stadt gfahre und mir hen die passende Infos per Audioguide becho. 

 Bi de zweite Rundi hen mir denn entschiede bi de Floyen Bahn z'halte, das isch eine vo de Huusberge. Mir sin denn mit de Standseilbahn in wenige Minute uf de Gipfel gfahre. Paar Fotis gschosse vo de super Ussicht uf Stadt, Fjord und unser Böötli. Denn ä chline Spaziergang durch ä Trollweg, aber mir hen feschtgstellt dass die au nid komischer sin als die deheim. 

 Im Kaffi ufm Hügel hen mir denn zwei Cappuccinos und ä Grieggboller gnosse, und Euch natürlich die obligate Charte gschriebe. Denn hets uns au scho wieder uf d'Meereshöhi triebe und mir sin wieder abe. 

 Bergen entzückt durch schöni Hüüsli (viel us Holz), de Landschaft rundum und natürlich durch sin Wasserzuegang. Diversi Märkt mit allem mögliche Züüg usm Meer, Wurst us Elch, Rentier und Wal 🙄 etc. Schlussendlich sin mir denn wieder in Bus "Hop on" und zrugg zum Schiff. Chlii kaputt aber mit vielne tolle Erinnerige.