17.06.2019

jetzt gohds nome no en woche bis eusi gross reis startet. mer send beidi mega nervös ond chönds chum erwarte bis es ändlech los gohd. das ehr eus ned vergässid ond eus eh chli chönd verfolge währendem mer onterwägs send wärdid mer euch do uf dem blog stets ufem laufende bhalte; mer wärdid eusi erläbnis, begägnige ond hoffentlech en hufe schöni föteli met euch teile ond ehr gsähnd au emmer wo das mer eus grad befendid.

momentan semmer no deheime ond send no met de legste vorbereitige beschäftigt. vor circa 10 mönet hend mer beschlosse, das mer zäme wend go reise. im mai 2018 send mer in bali ide ferie gsi ond well eus die asiatisch kultur so guet gfalle ond beihdrockt hed, hend mer beschlosse das eusi reis noch asie sell goh. do de dave es strängs johr hender sech hed ond ech brueflech en neue wäg werd ihschloh esch de sommer 2019 de perfekti zitponkt zom eus en chlini uszit z’gönne vom alltag. mer wend gmeinsam atemberaubendi landschafte, einsami stränd, neui kulture ond no velles velles meh zäme entdecke.

euses abentür werd ide hauptstadt vo thailand nämlech in bangkok starte ond nochäne wärdid mer 77 täg dör südostasie reise. mer wördid eus freue wenn ehr regelmässig uf eusem blog wördid ineluege das mer eusi erläbnis met euch chönd teile.

dave & meli ♥