Die ersten Schmerzen und Ferien in Kuala Lumpur

Halli Hallo

So da bini amim letschte Abig vo mine Ferie😁 in Kuala Lumpur. Ha müesse dahi mis Studente Visum go mache für die negste 3 Mönet. Und voila, es hett klappet! (Für die wo wüsset wie lang ich es gschiss gha ha mitem Visum unds am Schluss doch nid klappet hett ide Schwiiz - ihr verstönd mich dassi usem Konsulat usse gloffe bin mit mim Visa im Pass und es Freudetänzli gmacht ha ufem Trottoir, sodass sich Bauarbeiter umegluegget hend und sich wahrschindli gfraget hend was isch au mitdere gstörte loos?😂😂😂

Aber eis ums andere...

Ich probiere täglich Tagebuech zschriibe aber die cheibe Täg vergönd eifach zu schnell, probiere die letschte 2 Wuche kurz zemmezfasse: 

Ich han flissig täglich trainiert nur 2 Täg Pause gmacht ide letschte 2 Wuche, das hett leider dezue gfüehrt dassi min Fuess verstuucht ha willi nid richtig gkickt ha mitem einte Bei. Doch min Affolter Grind hetts natürli nid zuelah zum nid ztrainiere und jetzt hani de Seich, de Fuess isch blau, gschwulle und schmerzt höllisch, sött nid belaste (inere Grossstadt wie Kuala Lumpur na schwierig) und en immer schön küahle und ibinde. No more words needed...

Has sogar letscht Wuche gschafft zum a eim Tag 2x ztrainiere, poahhh streng, aber es isch voll miis Ding! Auscho hani dörfe Sparring mache. Wie immer erkläret Trainer sehr wenig (und lachet sich denn eine ab abde Neuling) und schwupps hani eifach Schiinbeischoner agha und es hett gheisse: Gooo...Ich völlig überforderet im Ring gstande und sogar na gfraget obi darf ufde Trainer drihschlah😄 Bim 2. Versuech hani denn gwüsst wasi darf und was nid und i ha Vollgas geh, aber au de eint oder ander Easy- Schlaag müesse istecke. Es isch viel Technik zum üebe, es chunt extrem druff ah obde Fuess so oder so isch (2cm wiiter rechts oder links macht scho sehr viel us), wie Oberkörperhaltig isch, wo de Blick higaht etc...Da immer na wenig Lüüt im Training sind, chani sehr viel profitiere wenns Ziit für mich hend zum mich korrigiere. Mängisch bini elei mit4 Trainer😀 Mini Uusduur wird au besser, Muskelkater hani kei meh aber nach 1 1/2h isch min Körper k.o. und ich bin froh hani frei zum mi erhole und wieder uftanke. Eis Training bestaht us 10min. Warm up (Renne), Situps, Liggistütz...denn 10 min. Dehne und namal Situps & Liggistütz...denn gahts wiiter mit Schatteboxe, denn 4/5x 3min. id Pads schlah und / oder Sparring, denn ad Boxseck 100x mitem Fuess kicke, 100x mitde Knüü. Zum Schluss denn namal Situps/Liggistütz und Dehne. Und all das bi gfühlte 45 Grad verrusse! Ich trinke pro Training 2.3Liter Wasser und mini Kleider chani uswinde! Aber nachem Training ischs Gfühl so toll!

Nebst mim Training bini viel am Pool gsi wills Meer vode Stürm und em Rege völlig dreckig isch😏 Mitem Töffli fahri au immer besser und wiiter und mittlerwiile weissi au wos früschi Shrimps giht ide Restis und kei alti, gummigi oder sogar züchteti. Ha mini ca. 5 Beizli im Örtli woni lebe, woni immer wieder gern gahne und d'Lüüt sehr fründlich und cool sind.

Letscht Wuche isch de Christian mit sinere Familie cho (er isch de Schwedisch Manager im Resort und vom Muay Thai), ganz e tolli Familie mit grossem Herz und guatam Humor (sind beides Sozi's😀). Sit do oder besser gseit ca. 2 Täg bevor sie acho sind hend plötzli alli Agstellte wie wild gschaffet damit alles perfekt usgseht wenn de Chef chunt😁 Joy wo ade Rezeption schaffet mit ihrem Maa und Sohn sind au herzallerliebst. Es fühlt sich ah wie inere Grossfamile und überhaupt nid wie imene Hotel😍 Mitem einte Trainer bini 2x furt am Abig, so lerni Thai Kultur na besser kenne, trampe immer mal wieder ines Fettnäpfli (was mer alles sött oder was mer uf kein Fall darf mache - das gaht lang bismer das alles weiss au nach 10x Ferie mache und umereise in Thailand) aber chans zum guata Glück mit mim Charm jewils wieder guat mache😀

Trash Hero hani aunamal gmacht, dassmal im Rege mitemene Englische Paar. S'letschtmal hani müesse absege will min Maage Turbulenze gmacht hett (obs echt am scharfe Esse oder am Rotwyy glegge isch😅?) Freumi wieder ufde negst Sunntig wenns denn stattfindet, ha grad im Facebook gseh dasses wieder Überschwemmige geh hett😣 Scho letscht Wuche hetts 3 Täg abelah und gstürmt, Strasse sind überfluetet gsi, Wasser isch imis Zimmer gflosse unds Fitness hends müesse abpumpe! Bi sottigem Wetter bini froh mueni nienet ane, Training, Zimmer, Resti im Hotel und warte bises verbii isch...

Jetzt freumi mega, mega morn wieder hei zgah!

Kuala Lumpur isch e schöni, spannendi Multikulti Stadt (hans negativer in Erinnerig gha woni vor 15 Jahr gsi bin). Es isch viel ruhiger und gehmächlicher als Bangkok, es hett kei huppendi Tuk-Tuks und es isch überall suuber. Spannend sind nebst de Sehenswürdigkeite d'Mensche unds Esse. Es git nid viel "reini" Malaysier in KL, die meiste sind irgend es Gmisch vo verschiedene asiatische Länder (Chinese, Japaner, Inder, Burmese, Filippinos, Thais etc.), immer wieder lustig zum usefinde woher die oder ihri Vorfahre chömet. Was sie mega guat chönd isch Englisch, sehr entspannt im Gegesatz zude Thais...

S'Esse isch je nach Viertel anderst...Chinesisch und Indisch hani am meiste gesse (yammy Dumplings), nebst Western Junkfood😁

Ich han die 4 Täg da sehr gnosse- chli Ferie gmacht, grelaxt am Pool, Shopping, Sightseiing und ebe mis Visum becho, Hurra!

Ah ja und da in KL bini aso ghürate und miin Maa wartet in Thailand uf mich😂 segi emel immer, isch eifacher zum kei Diskussione zha nebst em eh ständig begafft zwerde wegde blonde Haar.

Wasi so bi go aluegge nebstde Petronas Twin Towers luaget ihr am beste ufde Fotis ah...

Ich wünsche Eu allne en schöne Herbstafang und never forget: Stay calm and relaxt and HAPPY😍

Sawadee kah, Dany