Weekend in Tallinn

Am Fritig simer am Morgä los richtig Helsinki mitem Zug, vo dert us simer mit dr Fähre 2,5 Stund bis nach Tallinn gfahre. Am späte Nami simer acho u nachem Check-in im Hostel ga Burger ässä imnä aute umfunktionierte Zugabteil. Am abe sie 4 vo üs no id Stadt öbis ga trinkä aber mir sie aui seeeehr fescht müed gsi. Nach ere Nacht Schlaf simer de am nächste Morgä los id Telliskivi Creative City, das isch ds Hipster/Alternative Viertel vo Tallinn. Nachdem simer witer id Altstadt, dert heimer üs när ufteilt wiu d'Italiener vo ke z'morgä ässä natürlech vor üs Hunger hei gha ;) Nach witerem Sightseeing sie de oh mir hungrig gsi u mir sie i sones Resti vo ufbout isch wie usem Mittelalter, mit allem drum u dran. Am abe simer ga Italienisch ässä u när ine Bar. Diä het Labor Bar gheissi u di agstellte hei dr Drinks us Reaganzgläsli u i Chemikierklamotte gmixt. Mir sie aber oh gli wieder müed gsi u hei. Field (dr Thailänder womi echt chli ah dä Dude us Hangover erinneret) isch zwüschezitlech inä andere Club u mir hei sini Jagge u Chappe müesse mitnäh, er isch när dr ganz wäg ohni Jagge heigsecklet hahaa. Am Sunnti heimer üs nachem check-out ufteilt u i bi mit de Medels ga z'morgä ässä im moderne Teil vor Stadt u när isches oscho gli wieder richtig heizueh gange. Funny story; Field het di falschi Fähre buecht u so isch er no eh Nacht länger bliebä.