Tagesusflug nach Norwegä

Hüt simer ganz früeh am Morgä los richtig Bugøynes womer aber schlussendlech niä sie acho. Nach circa 3-4h Fahrt simer in Norwege acho, nacheme churze Stopp bimnä Fluss (siehe Foto) simer witer u womer hei wöue abbiegä heimer gmerkt das d'Strass scho sehr veriiset isch. Dr Bus isch nämlech anstatt abboge eifach gradus witergfahre. Bir Abbiegig isch oh scho d'Strasseufsicht gsi u het üs ghuupet dasmr da ni chönne dürefahre. Mir chönnes mit Schneechetine probiere aber es sig uf eigeti Gfahr. Dr Busfahrer u üse Tourguide hei auso agfange Schneechetine montiere aber es het so fescht gluftet u isch so fescht veriiset gsi dasi schnäu hei gmerkt, dass mr so ni um Kurve wärdä cho. So heissi üs gseit dasmr dr Trip ni wie plannet chönne dürefüehre aber dass si probiere wenigstens no id Nechi vom Meer z'fahre dasmr glich no d'Müglechkeit hättä für ga z'Bade (eigentlech wäri plannet gsi Sauna u när iz Meer ga Bade), womer witer sie gfahre isch scho eh riesä truck am Strasserand gstande u het gwartet aber für üs hets ke Uswichstell meh gha u so simer eh chline kurvige Abhang abegfahre oder besser gseit abegrütscht. Spätistens bir Durchsag vom Surfer/Adventure Dude mitere feschte besorgte Stimm "please put your seatbelts on now" hani gwüsst dasmr ire bränzlige Situation sie. Dr ganz Bus isch mucksmüslistill gsi u dr Busfahrer het mit Schweisstropfe probiert dasmr ni d'Klippe abstürze. Unde isch zum Glück eh Uswichstell cho u mir sie när 5 STUND dert gstande u hei müesse warte bis ds Iis chli schmilzt u bis üses Ässe chunnt. Zum Glück isch d'Ussicht dert schön gsi ;) Z'Restaurant womer ursprünglech wäre ga ässä het üs üsi Fischsuppe när zum Car verbibracht aber sie hie oh zersch müesse warte bis d'Strass wieder isch freigäh wordä. Nach dr Fischsuppe und emnä Schwumm im Arktische Meer (ni für mi wiu ohni Sauna hani gwüsst dasi schüsch safe chrank wirdä) simer när witer hei nach Finnland. Wär das ni scho gnue Päch gsi für ei Tag heimer doch wägere Stund die einzigi Chance d'Nordliechter z'gseh uf üsem Lappland Trip verpasst. Us luter Fruscht simer ga Bier choufä u sie am Abe när idi grossi Unterkunft ane chlini Party.