Lofoten Islands Tour

Leider isch z'Wätter ni würk viu besser gsi aus geschdr aber mir sie trotzdem uf üsi Tagestour um d'Inslä. Z'ersch simer mau 2,5 Stund nach Reine gfahre. Ufem Wäg dert härä heimer sogar eh Elch gseh aber leider numä für paar Sekunde bim dürefahre. Acho in Reine hets ganz fescht abeglährt u mir sie aui komplett nass gsi. När simer witer nach Ramberg wos eh schöne Strand het, dä heimer bi däm Wätter drfür ganz für üs gha. Plötzlech het dr Rägä oh ugfhört u mir hei dr Strand chönne gniesse (auso ja es isch um die 8 Grad gsi hahaa), d'Nadine, dr Thom u i sie när oh churz gane Schwumm ir Arctic Sea näh aber das isch meeeega chaut gsi wime sech das öbe cha vorstellä. När simer witer nach Yttersand womer eh churze Hike hei gmacht u mitere wunderschöne Ussicht sie belohnt wordä. Dr letscht Stopp isch Henningsvaer gsi, bekannt für z'schönste Fuessballfeld vor Wäut. Mir sie aui chli entüscht gsi, d'biuder wome kennt wo meistens mit Drohne gmacht sie, hei ni ganz dr Realität entsproche aber oh so isches schön gsi. Übrigens; uf ganz Lofoten gseht me wiesi da so Fisch am tröchne sie, das isch Kabeljau u sozsägä z'Gold vo Lofoten. Die einzelne Teili vode Fische wärdä fasch überau id Wäut exportiert u gilt als Delikatesse.  Am Abe het bini miter Nadine u dr Julie no churz zum Lüchtturm bi üs bir Hütte.