#11 - Bom dia Rio de Janeiro

Mir hend en sehr churze und chalte Ufenthalt in Bogotà gha und hend mit üsem Hotel ide Nöchi vom Flughafe e gueti Wahl troffe. Zerschtmol simmer beidruckt vode Grössi vo dem Flughafe - sehr modern und suber. Mir nehmed e Taxi und ab is Hotel. Weil mir vor de Rückkehr sowieso nomol uf Bogotà chömed, hemmer kei grossi Sprüng gmacht und wiedermol richtig usgiebig gschlofe im weiche Hotelbett. Es isch würkli e Stuck chälter gsi und vorusse isch nu de Dani ab und zue.

Mir hend üs also gad nomeh gfreut uf üsen Flug am nögschte Tag uf Rio. Jo, mir chönds selber gar nöd so glaube und doch simmer ez do bi sehr hohe Temperature, wommer bi de Landig am 6.30 Uhr scho gmerkt hend.

Nochere 50 min Fahrt entlang vode Favelas, wo üs fest ad Comuna 13 erinneret, chömed mir bim Fred, de Kolleg vom Dani vode Südafrika-Ziit, und sinnere Familie a. Mir werdet herzlich empfange und hend Glegeheit zum üsi Sache ablege und e Duschi neh, wo denn aber nu churz öpis nützt. Mir gönd denn also an Strand go zMorge esse und de Fred besichtiget mit üs drufabe 3 Appartements, wo mir denn günstig eis miete chönd. Mir wohnet ez also gnauer im Barra da Tijuca, direkt am Strand und innere Gegend, wos am sicherste isch.

Langsam chömmer au chli abefahre und richtig aacho. Mir fahred anen chlinnere Strand „Prainha“, wommer dure langi Stross erreicht und drum au chli abglege isch. En wunderschöne Usblick erwartet üs do und mir woget de erst Sprung is Wasser, wo meh als guet tuet bi dere Wärmi (jo klar, motze uf hochem Niveau). Spöter folgemer dere Stross wiiter, ähnlich wie do is Gfängnis vom Pablo, und chömed zume Restaurant, wo ganz elei glege isch und e fantastischi Ussicht bütet. Livemusig tönt use und de fein Gruch vom Esse. Au wenn Badhose no nass sind, isches u gmüetlich und esset e sehr gueti Suppe mit Crevette, Riis und anderem. 

Die erst Müedigkeit chunt denn schnell, weil de Nachtflug nöd sehr erholend gsi isch. Chli usruebe dehei und am Obet treffemer üs mitem Fred sinere Familie und sine Fründe. Mir chömed in Gnuss vomene frisch zuebereitete Burger imene u gmüetliche Restaurant. Irgendwie isches sogar fascht eher e Bar.

Es wartet also spannendi Täg do uf üs!