Desierto de Tatacoa

Vo Medellin us machemer no en chline Abstächer id Tatacoa-Wüeschti, bevor‘s denn zrugg uf Bogotà gaht. Zum Ziit spare, nähmemer en Nachtbus. Will d'Strecki wieder über 7 Berge gaht, buechemer eus die vorderschte Plätz im 2. Stock mit Blick uf d'Strass. Jackpot: en super komfortable Bus mit riesige, bequeme Sitz und mir z‘vorderscht mit freier Sicht. Mer weiss ja us Erfahrig, dass ih so warme Länder mengisch echli exzessivs Verhalte an Tag gleit wird, was S‘Abechüehle vo Rüüm betrifft. Drum sind mir vorbereitet mit Leggins, Hoodie, Schal und Socke, wobi die eint meh als dä ander. Es stellt sich schnell use, dass das nöd glanged het. Es isch öpe 5 Grad und die afänglichi Euphorie schnell verfloge. Die nöchschte 12 Stund sind dänn ä Tortur und mer chömed duregfrore, üebermüeded und gnervt in Villavieja ah. De waghalsig, um nöd z’sege lebensmüedi Fahrstil - wo mer echli zu guet mitbechunt uf eusne VIP-Plätz - isch durch d’Fassigslosigkeit ab de herrschende Temperature fascht echli in Hintergrund grückt. Mit de liechte Vorahnig, dass mer die Nachtfahrt nüm ganz so locker wegsteckt, hemmer zwei Nächt buecht - zum guete Glück. So hemmer de erschti Tag zum relaxe am Pool chöne nutze, bevor mer am nöchschte Tag id Wüeschti gstoche sind.

Vom Joe hemmer eus en halbe Tag lang durch die idrückliche Landschafte füehre lah. Im einte Egge dä roti Lehmbodä, paar Meter wiiter ä graui Mondlandschaft. Er het eus viel über d‘Entstehig vo de Wüeschti verzellt, wo früehner mal es Meer und vor 5 Millione Jahr vo prähistorische Tier bewohnt worde isch, über d‘Zämäsetzig vom Bodä und alles über jedes Pflänzli vor Ort. Sehr interessant, aber mir chönted jetzt locker selbständig als Tourguides tätig sii - für spanischi Toure verstaht sich. Eusi Tour wär eigentlich ja uf Englisch buecht gsii. De Joe het's denn aber besser gfunde, wenn mir während de Tour au no grad echli ah eusem Spanisch fiiled - rundum Service sozägä. Alles ih allem hemmer aber en coole Tag gha inere würklich sehr beidruckende Landschaft.

Für de Wäg zrugg uf Bogotà hemmer eus für en chlinere Bus entschiede. Das wiederum het sich ebefalls als Reinfall usegstellt, will ih dem isch es nämlich nöd 5 Grad, sondern 50 Grad gsi. De Fahrtwind het eim wie en heisse Föhn is Gsicht gwinded und die 6 Stund au wieder über diversi Berge wieder ufe uf 2800 Meter sind ebefalls ä Tortur gsi. Eigentlich sind mir unkomplizierti Reisendi. Mir chönd locker und gern en Tag lang Bus fahre, gueti Musig lose (Danke Fabio und Marcel für die geile Playlists) mit eusne Active Noise Control Chopfhörer (die andere Fahrgäst tendiered oft zu Musig oder Trickfilm über s‘Handy ohni Chopfhörer, was amig en recht wilde Mix isch), d‘Landschafte inezieh und d‘Ziit mit Tagtroimä umebringe und denn erfüllt am Ziel acho. Defür nötig wäred nur einigermasse agnähmi Bedingige, wo ih dene beide Fahrte leider nöd erfülllt worde sind. Mir versueched euses Glück aber sicher bald wieder.