Es sind scho bald 2 Mönet vergange sit mim letzte Blog-Itrag, drum wirds weder mal Ziit :-)
Nachem turbulente Monet ade Karibikküste han ich mitem Cho (de kalifornisch Asiat) en Flug is Landesinnere, gnauer gseit nach Medellín (mer sprichts „Medeschin“ us ;-)), gnoh. D Inlandsflüg in Kolumbie sind mega günstig, wemer wenig Gepäck het. Es lohnt sich oft meh als en Bus zneh ond esch um einiges schneller - 2-3h insgesamt statt öpe 18h. In Medellín hemer ois im gmüetliche, familiäre Hostel „Casa Primavera“ im touristische Viertel vo „El Poblado“ niederglah.
Medellín
Medellín esch nach de Hauptstadt „Bogotá“ die zweitgrösst Stadt in Kolumbie mit öpe 2.5 Mio. Iwohner. Vor öpe 20 Jahr het ich no ken Fuess i die Stadt gsetzt (wär au na bitz jung xii 😝), hüt chamer die moderni Metropole abxeh vo es paar gföhrliche Barrios problemlos bsueche.
Comuna 13, Medellín
Apropos gföhrlichi Barrios - die „Comuna 13“ ufem Bild esch eis devo xii. Det het früehner im Medellín-Kartell unterem Drogeboss Pablo Escobar de Droge-Export vo Medellín in Richtig Küste statt gfunde. Durch das esches extrem gföhrlich xii, es het dauernd Entfüehrige, Vergewaltigunge ond Mord geh. Das Ganzi het no bis is Jahr 2002 aduured, bis de damalig Präsident durch eh brutali Militäraktion en Schlussstrich zoge het. Das esch de grossi Wendepunkt xii - hüt lebt das Viertel vode FreeWalking-Toure, wo vo Iheimische duregfüehrt werdet ond ich wärmstens empfehle chan, wo vo Breakdancers, über Rappers zu Artiste alles bieted. Nume no die viele verschiednige Graffitis erinnered ah die Ziite.
Comuna 13, Medellín
Es füehred sogar „escaleras eléctricas” de steili Hang deruf, es Zeiche wod Regierig gsetzt het für d Veränderig ond de Fortschritt. Au uf die moderni Metro wo durch ganz Medellín füehrt sind sie mega stolz. Au de “Parque de las luces” wo jedi Nacht durch Neonröhre belüchted wird esch es wiiters Zeiche.
Parque de las luces, Medellín
Zudem hend sie zwei Seilbahne, wo zum “Parque Arví” füehred.
Cable car Medellín
Ich bin damals amene Sonntig alleige det ufe, wel alli us mim Hostel scho xii sind. Im Gondeli han ich eh kolumbianischi Familie troffe ond mer sind mega schnell is Gspröch cho (dank mim spanisch, wo immer besser wird ;-)). Ich glaub, sie hend Mitleid mit mer gha, wel ich alleige unterwegs xii bin ond drum hend sie mich de ganz Tag mitgnoh ond automatisch ih ihri Familie integriert. Mer sind ih sonen Kletterpark det obe gange, sie hend mich sogar zum Zmittag iglade. Begegnige won ich so schnell ned wird vergesse ond wo zeigt, wie die meiste Kolumbianer sind: neugierig, offe ond herzlich.
La familia
Natürlich esch au s WM-Fieber in Kolumbie ned zchurz cho ond wos d Schwiiz is Achtelfinal gschafft het, han ichs defür in Blick.ch gschafft 😝
Sogar ide Zitig simer cho ⚽️🇨🇭
Trotzdem han ich eimal meh müesse feststelle, dass ich kes “Big-City Girl” bin, ich fühl mich recht oft bitz verlore ih so Grosstädt, wo dich ned ganz frei bewege chasch ond mer fehlt d Natur mit de Ziit.
Drum han ich beschlosse, zrugg nach Guatapé zgah, es chlises “Pueblo” öpe 2h mitem Bus vo Medellín entfernt. Ich bin s erste Mal dete mitem Cho na xii ond es esch Liebi uf de ersti Blick xii: die farbige Hüsli, die fründliche Lüt, de See ond rundume Natur ond Berge.
Guatapé De Stei - “la Piedra” - esch s Wahrzeiche vo Guatapé. Es git Lüt, die glaubed, dass er durch en Meteorit entstande het, was ich weniger glaube ;-). Aber es eschs uf jede Fall wert, die 700 Stegetritt deruf zlaufe, vo det het mer nämlich en wunderbare Blick über s Dorf ond de See. La Piedra Chlini Verschnuufpause Stausee Guatapé Det obe han ich denn vo anderne Reisende erfahre, dass de See gar ned natürlich, sondern künstlich erbaut worde esch. Damals het sogar es kompletts Dorf (Peñol) müesse umzieh, wenn au widerwillig, aber mit Geld esch alles möglich. De See dient als Stausee zum Strom erzüge, wo de grösst Teil vo Kolumbie abdeckt ond au nach Venezuela ond Ecuador exportiert wird. D Flächi vo dem Stausee esch grösser als Medellín, uf dem Föteli esch also nume en Bruchteil zxeh. Uf dene Inseli sind viel Hotels baut worde, aber au Privatpersone mit chli Geld, wie z.B. de kolumbianisch Fuessballspieler “Jamez” hend det die eint oder ander Villa baut. La Manuela - Pablo Escobar’s Mansion Wemer scho bi Persone mit Geld sind - natürlich het au de Pablo Escobar det au eis vo sine insgesamt 500 Hüser weltwiit ufgstellt. Das het hauptsächlich so chli als Ferieresldenz zur Erholig ond Party dient. Es het unter anderem en eigene Fuessballplatz, Sauna ond en riesige Swimmingpool. La Manuela - Pablo Escobars Mansion Hützutags esch nüm ganz alles in perfektem Zuestand, wels damals vom verfeindete “Calí-Kartell” mit ziemlich viel Granit gsprengt worde esch. Umcho esch aber niemert, sie hend rechtzitig vo dem geplante Agriff erfahre. De Security-Guard vo dere Mansion - damals jungi 17 Jahr alt - lebt hüt na uf dere Insle ond mer hend ihn sogar chöne kennelerne. In Kolumbie gits es Gsetz wo beseit, wenn du gnueg lang ufeme Grundstück lebsch, wirsch du automatisch Eigetümer. Glück für ihn - er macht jetzt sicher ziemlich viel Geld mit Touriste ond sinere Bar. Las escaleras in Guatapé Zócalo - wend dich selber ade Wand entdecksch 🐶 Wels mer so guet gfalle het ond vor allem au d Atmosphäre im “Lake View Hostel” super xii esch, han ich det agfragt für Volunteer-Arbet. So han ich d Woche druf au scho chöne afange. Fürs Wochenend bin ich jewils zrugg uf Medellín, wel det chli meh lauft als in Guatapé ond eh perfekti Abwechslig bietet. De eifachheitshalber verzell ich jetzt aber hauptsächlich vo minere Erfahrig als Volunteer. La piedra Kayaking Als ersts han ich mal erfahre, dass volunteere grundsätzlich in ganz Südamerika verbote esch - nume interessierts ned würkli öper, wel mer ja ned direkt mit Geld entlöhnt wird, sondern durch “free accommodation” und meistens au mit “free food”. Ih mim Fall hend mer oises eigete “Staff-Hüsli” uf de andere Siite vom See gha mit eigener Chuchi, Ufenthaltsruum, Veranda, zwei Schlafzimmer für Männer ond eis für Fraue. Mer hend Glück gha ond sind nume drü Fraue xii ond hend vo dem her schön Platz gha. Es het richtig guet tah, nach langer Ziit weder mal de Rucksack uszpacke ond bitzeli amene Ort chöne azcho. Insgesamt simer über 10 Volunteers vo de ganze Welt verteilt cho: Kolumbianer, Venezuelaner, Argentinier, Franzose, Dütschi, Belgier ond ich us de Schwiiz. Für jedi Woche het de Alex, oise Chef, en Isatzplan erstellt. Das het chöne sii Zmorge-Schicht, Chuchi (hauptsächlich abwäsche), Thai-Restaurant im Service oder Bar. Ich han meistens ade Bar gschaffed ond das het mer au am beste gfalle, wel mer es super Team xii sind ond so au am meiste mit de Gäst in Kontakt cho besch. Ond natürlich au ab ond zue mal selber chli öpis hesch chöne trinke 🍹😝 Amigos del trabajo Insgesamt bin ich statt mine plante 2 Woche als Volunteer 3 Woche bliebe, wels mer so guet gfalle het. Mer sind es super Team xii, gueti Atmosphäre ond sind zunere richtig chline Familie zeme gschmolze. Durch das d WM immer na voll im Gange xii esch het oise Tag meistens scho bim Zmorge am 9i miteme Spiel agfange ond so esch de Tag denn au immer schnell dure gange. Hopp Schwiiz 🇨🇭🤗 Ufem Bild esch d Diana, en Albanerin, wo aber ide Welsch-Schwiiz ufgwachse esch. Mit ihre han ich alli Schwiiz Match glueged ond obwohl sie selber ned gvolunteered het, esch sie Teil vo oisere Famille worde. Sie esch schlussendlich mit 4 Woche länger im “Lake View Hostel” bliebe als die meiste Volunteers ;-) Vamos 🇨🇴 🤗 Nachdem d Schwiiz usgschiede esch, hemer natürlich chräftig für Kolumbie wiitergjubled, was aber leider au ned viel länger ghebed het 😅. Ufem Foti simer bi mim Chef vode Bar (Davíd) ond sinere Fründin Andreina diheime, sie hend ois zumene BBQ iglade 😋. Obwohl mer de Abschied richtig schwer gfalle esch, wel mer alli Lüt so fest as Herz gwachse sind ond s nachemene halbe Jahr unterwegs au wiedermal guet tah het, bitzli Routine ond “Beschäftigung” im Lebe zha, han ich gwüsst, dases ade Ziit esch, weder wiiter z reise. So bin ich als nächsts weder ah min “Hub” nach Medellín zrugg, wel vo det Büs in alli Richtige vom Land fahred. Am nächste Morge han ich denn de Bus nach Salento gnoh, es chlises Pueblo ide “Zona Cafetera” chli witer südlich vo Kolumbie. Salento Salento esch sehr chli ond touristisch, aber mer hets guet gfalle (obwohl ned ganz so guet wie Guatapé, wel de See fehlt ;-)). Det han ich im “Floresta Boutique Hostel” übernachted, was vode Irichtig ond em Komfort meh anes Hotel als anes typisches Hostel erinnered (jede Morge wird s Bett gmacht 😳).Durch dasesen grosszügige Garte mit vielne Hängematte gha het, esches au mega eifach xii, zum mit anderne Reisende in Kontakt zcho. View over Salento So bin ich am nächste Tag mit es paarne vom Hostel is “Valle de la Cocora”, was ungefähr 30-40 Minute miteme Sammel-Jeep vo Salento entfernt liit. Valle de la Cocora Das Gebiet esch hauptsächlich bekannt durch ihri spezielli Palmeart, wo bis zu 60m höch wird. Vo det chamer verschiednigi Treks entweder zFuess oder ufem Ross unterneh. Mer hend ois für e chürzeri Route, wo so ungefähr 1-2h duured, entschiede. Zum Glück - wel es het scho bald agfange regne ond oisi Ponchos ond Regejaggene sind zum Zug cho. Für es paar Poserföteli hets aber glich na glanged 😎🌴 Valle de la Cocora Am Abig simer denn all zeme is “Los Amigos”, eh Bar wo bekannt esch fürs kolumbianische Wurfspiel “Tejo”. Det gahts eigentlich hauptsächlich drum, miteme Stei vonere gwüsse Entfernig uf sone Schlammmasse mit so drüeckige Schwarzpulvertäsche zwerfe, wo explodiered, wemer trifft. Das Team wo am meiste Pünkt macht, het gunne. Es esch schwierig zum erkläre ond es tönt velech chli nerdy, aber ich seg oich, es macht so Spass ond süchtig 😅. Am Tag druf bin ich mit es paar Holländer vo mim Dorm go riite durch d “Zona Cafetera”. Ursprünglich simer zvierte los, aber am einte hets nach öpe 5 Minute scho abglöscht, wel sis Ross anschinend chli bocked het ond er het Schiss becho ond esch umdreiht. So simer halt zdritte mitem Guide witer ond sind durch Wälder, Felder ond Flüss gritted. Es esch die perfekti Art xii, die wunderschöni Landschaft zerkunde. Horseriding in der Zona Cafetera Nach es paar Täg im eher früehligshafte, chüehlere Kolonialstädtli Salento han ich mal weder richtig Lust uf chli Hitz gha. So bin ich am Tag druf mitem Bus in Richtig “Desierto de la Tatacoa” los. Im Bus han ich per Zuefall en Kolleg wieder troffe, won ich vorher in Salento kenneglernt han ond so sind die 10 Stund Busfahrt id Wüesti schneller umegange, als ich denkt han. Salento - find the Büsi 🐱 Womer ih oisere Unterkunft “Noches de Saturno” acho sind esch aber au scho dunkel xii ond leider au zspat fürs Znacht esse ond so simer au scho gli is Bett, damit mer für de nächst Tag fit sind. Desierto de la Tataco Churz nachem Zmorge hend mer eh gfüehrti Tour durch die beide verschiednige Wüestene gmacht. Es git die graui Wüesti, wo meh so steinartig esch ond die roti Wüesti, wo us rotem Sand/Erde bestaht. S Wort “Wüesti” esch eigentlich bitz übertriebe, wel wemer rundume luegt, hets Berge ond au Pflanze wo wachsed. Entstande esch sie dadurch, dass en Fluss oder en See uströchned esch ond wel s ganz Jahr über sehr wenig Niederschlag fallt, bliebt das ganze Gebiet au sehr troche ond es wachsed verschiednigi Kaktee-Arte. Die pinkigi Frucht, womit sich de Kaktus vermehrt, chamer esse ond sie schmöckt recht süesslich. Das Bild esch ide graue, steinige Wüesti entstande ond es het riesige Kaktee gha, wo öpe 3x so höch wie ich xii sind :-) Sie sind au ziemlich breit xii, wiemer uf dem Föteli guet xeht. Rote Wüste Die ganzi Tour esch ungefähr 5-6 Stunde gange ond das bi Durchschnittstemperature vo 28 Grad. Drum simer mega froh xii, womer ois zmitzt ide Wüesti hend chöne imene natürliche Pool abchüehle ond en frische Saft trinke. Chlini Erfrischig 🍹 Am Abig simer zdritte is nöchglegene Observatorium zum d Sterne beobachte. Leider esch ah dem Abig chli bewölkt xii ond drum het ois de Typ zerst no einiges über s Universum erklärt, bis d Wolke chli uftah hend ond mer die verschiednige Sterne ond Planete durch Rieseferngläser hend chöne xeh (leider kes Bild vorhande, da mis Handy ned so tolli Nachtföteli chan mache). Buenas noches 💫 Als nächts ond als letzte Stop bin ich ih die drittgrösst Stadt namens Calí - d Salsahochburg vo Kolumbie. Calí lit im Süde vo Kolumbie ide Nöchi zude Pazifikküste ond es esch durchdas au relativ heiss ond tüppig. Mini Erwartige ah die Grossstadt sind eigentlich recht tüf xii ond wer “Calí” googled, stosst recht schnell uf Wörter wie “gefährlich”, “Kriminalität” etc. Ich persönlich han aber durchus positivi Erfahrige gmacht - glaub ich han in ganz Kolumbie nirgends meh Iheimischi troffe, wo mich vom Gegeteil vo dem negative Ruef hend wele - ond chöne - überzüge. Calí con amigos Zum eine esch das Päärli, won ich damals während mim Volunteering in Guatapé kenneglernt han. Sie hend mich grad scho ah mim erste Abig in Calí im Hostel “Las Sucursal” abgholt ond nach “San Antonio”, emene touristische Viertel in Calí, bracht. Mer hend es pasar Drinks gha ond sie sind unter anderem Grund xii, wieso ich statt de geplante 2-3 Nächt schlussendlich eh ganzi Woche in Calí bliebe bin. View over Calí D Stadt an sich esch miner Meinig nach nüt speziells - e Grossstadt wie jedi anderi. Aber d Lüt mached definitiv de Unterschied. Uf minere private Busfahrt (es het eifach kei anderi Touris gha, drum privat 😅), han ich no d Valentina kenneglernt, ebefalls e “caleña”, also eini vo Calí. Sie esch au vo Afang ah so nett zu mer xii ond het mer ihri Stadt vode beste Siite wele zeige. So het sie mich am nächste Tag mitem Auto ide Stadt umegfahre (ich bin praktisch nie zFuess unterwegs xii, wel Google het mengisch scho recht ond mer het die Erfahrig ade Küste glanged 😝) ond mich zumene Ort gfahre, zum Cholados, e süessi Spezialität vo det zprobiere. Natürlich han ich au Salsa wele usprobiere, wenn irgendwo, denn da. Egal wod anegahsch, es lauft überall Salsa-Musig ond es wird tanzt. Im Hostel hend mer d Möglichkeit gha, privati Salsastunde für COP25 000, was umgrechnet öpe 8 Franke sind, zneh. Das esch extrem günstig ond am Abig hends au immer gratis Gruppelektione abem 8i abote, womer s Glernte het chöne probiere awende ond üebe. Clase de salsa 💃🏼 Min Salsalehrer, de Luis, esch bitz en Arme xii, wel ich bekanntlich mit zwei linke Füess ufd Welt cho bin. Aber er het sich extrem geduldig zeigt ond am Schluss hend mer glich es paar Basisschritt ond Dreihige drufgha ond es het immer meh Spass gmacht 🤗. Wie bereits erwähnt, sinds aber vor allem d Lüt, wo de Ufenthalt so unvergesslich gmacht hend. Sie hend mich zude schönste Ort vo Calí gnoh (km 18, Cristo Rey, verschiednigi Clubs ond Bars) ond durch sie han ich ned nume Fründe, sondern au Familie gfunde. Angie 🤗 Cristo Rey in Calí Nach fast 3 Mönet in Kolumbie, esches aber ade Ziit xii, wiiterzreise (sosch het ich au müesse es Visa beaträge). Drum bin ich gester am Abig am 8i miteme israelische Kolleg in Nachtbus zude Grenze gfahre. Nach 10 Stund imene unbequeme Mini-Van (ich han ned mal chöne schlafe ond das heisst bi mer öpis 😅 defür Ziit gha zum de Blog-Itrag azfange 🤓) simer am Morge früeh ade Grenze acho. D Lüt sind scho inere riese Schlange gstande, hauptsächlich aber venezuelanischi Flüchtling, wo ihres Glück in Ecuador probiered. Es git aber eh separati Schlange für Kolumbianer ond extranjeros wie mer ond so het ois de ganzi Us- ond Ihreiseprozess “nume” öpe 4 Stund kosted. Chau Colombia 🇨🇴 hola Ecuador 🇪🇨 Nach wiitere 5 Stund Busfahrt hemer denn d Hauptstadt vo Ecuador, Quito, erreicht. Jetzt ligg ich da ih mim Bett ond mer gheied fast d Auge zue.. drum mach ichs churz: buenas noches y hasta luego chicos 💫🤗
