¡Bienvenidos a Costa Rica!

Hallo ihr Liebe!

De eifachheitshalber ond au als Erinnerig für mich, han ich mich entschiede, en chline Reiseblog z erstelle. Zudem esches au gad e zuesätzlichi Absicherig vo mine Bilder, falls mer mal mis Handy söt klaut werde (was mer ja ned wend hoffe:-)).

Ich bin jetzt ide Halbziit vo mim Sprachufenthalt in Sámara ade Pazifikküste vo Costa Rica aglangt. Ich gange füren Monet halbtags id Sprachschuel Intercultura, won ich vode Schwiiz her via Boa Lingua buecht han. 

Leider red ich da meh schwiizerdütsch als spanisch, wel öpe 90% vode Schüeler us de Schwiiz chömed ;-) aber es gfallt mer sehr guet, d Schuel bietet extrem viel Aktivitäte wie Yoga, Tanze, Artesanía (Bändeli knüpfe ;-)), Fuessball etc. ah. Es wird mer also uf ken Fall langwilig da, obwohl Sámara sehr es chlises, überschaubars Dörfli esch. 

Ich wohne da binere Gastfamilie im Zentrum vo Sámara. Mini Gastmuetter esch bereits 70i ond min Gastvater stolzi 80i. Es sind also meh Gastoma ond -Opa:-) die einti Tochter wohnt mit ihrem 12-jährige Sohn ebefalls im Huus ond die ander Tochter wohnt mit ihrne beide Zwillingsmeitli gad im Huus nebeddra. Mis Zimmer befindet sich ned direkt im Huus, sondern gad nebeddra imene Abau hinter de Wöschchuchi. Es esch es relativ chlises Zimmer, aber ich bruch ja au ned viel ond han defür sogar mis eigete Bad (nume mit chaltem Wasser, aber bi dene Temperature spielt das au kei Rolle ;-)).

Mini „Mamá tica“ choched sehr fein ond abwechsligsrich, es git zwar scho sehr oft s Nationalgricht „gallo pinto“ (Riis mit Bohne), aber sie het au scho Pasta, Herdöpfel, Fisch, Poulet, Salat etc. gmacht. Ond am Morge chumi immer em grosse Teller verschiedeni Frücht ond Granola mit Joghurt über - mh :-)

Sámara bietet nebst em Sonne tanke am Strand au sehr viel anderi Aktivitäte: mer spieled oft Beachvolley bis es dunkel wird (das passiert da scho am 6i am Abig, defür wirds um die Ziit am Morge au scho weder hell:-)), ich gange go jogge, han paar mal probiert zsurfe (das brucht aber nachli meh Ziit ond Üebig) ond bin scho paar mal go rite, was mis absolute Highlight xii esch. Leider esches de Rössli zheiss xii, am Strand entlang zgaloppiere ond drum simer nume im Schritttempo voracho.