Ishockey WM CAN-SUI

Am morgä sie d‘Nadine u i richtig Helsinki für ah WM match. Scho ufem Wäg zum Hostel heimer vereinzelti Schwizzer fans gseh ir Stadt aber was üs när bim Stadium erwartet het, hätti mir nimau im Troum chönne usmale. Es het sooo viu Schwizzer Fans gha dases eigentlech winä Heimmatch isch gsi, ds Stadium isch usverchouft gsi u es isch eh Hammer Stimmig gsi. Sie heisech extrem iz Züg gleit u vor Schwizzer Garde, über Chuehahzüg, Trichler bis zu mim Personal Favorite, 2 älteri Männer miteme Fonduegaglo ufem Chopf, hets aues drbi gha. Per Zuefall hani sogar no eine vor Schwyz gseh woni sit öbe 5 Jahr nüme ha gseh. Dr Match säuber isch mega spannend gsi u mir hei schlussendlech 3:6 gwunnä . Bi jedem Goal heisi Dabu Fantastic gspiut u am Schluss womer gwunnä hei d‘WNuss vo Bümpliz. Oh d‘Nationalhymme hani ah däm Tag 2 mau gsungä. I ha scho so lang nüm so viu Schwizzerdütsch uf einisch ghört dases fasch chlinä Schock isch gsi 😂 Es sie sehr viu Männer am Match gsi wo äuä rächt trunkä hei, dr eint ober mir im Schwizzer Glitzer Ahzug isch über mi drüber u när die ganz Stägä abegflogä nachem erste Goal hahaa. Bier prisä sie wohlbemerkt bi fasch 9.- für 33cl glägä. Nachem Match heisi dussä gsungä u gjubblet u när si aui id chnöi u hei noma d’Nationalhymme gsungä. Am Abe hetme d‘schwizzer überau ir Stadt gspotet. Mir sie när no öbis ga ässä u när ga umzieh u i Usgang mit emnä Belgier wo oh z‘Jyväskylä studiert u sim Bsuech. Am nächste Morgä simer mit wenig Schlaf (unteranderem dank mire Waldabholzend scharchende Zimmergenossin im Hostel) ga bruchä u när bini wieder i Zug richtig hei. Isch echt es cools Weekend gsi u gloub mit Abstand dr best Hockeymatch woni jemals bi gsi).