1.2. ZRH-HEL-JKV

am Morgä früeh hani die letschtä paar Sache zämäpackt, mis Zimmer parat gmacht für die neui Bewohnerin u ar Anita eh dicke Knuddel gäh u scho bini im 9i Tram gsi u ha ar WG tschüss gwunkä. Real füehlt sech das i däm Momänt no gad gar ni ah u doch bini gad chli wehmüetig aber glichzytig oh erstundlech ruhig u gfasst u voller Vorfröid. Z'Mami isch mit mir ah Flughafe cho womer när später oh mini neui Mitbewohnerin Maria troffä hei. Bir security heissi mi natürlech usegno wiu i eh Schäri im Handgepäck ha gha (meh isch ja schliesslech scho chli us dr Üebig nid wahr;)) schüsch het aues tiptop klappet. In Helsinki glandet, simer mitem Zug bis nach Jyväskylä womer när vo üsem Buddy Suvi sie in Empfang gno wordä. Let me tell ya, Koffere ufem Schnee zieh auso es Workout gsi so dasi am Afang sogar numä im Pullover bi umeglofä. Es het überau seeeeehr viu Schnee u isch chaut. Acho bi üsere Wohnig im Studentewohnheim hetsech usegsteut dasi dummerwies vergässä hei mi Schlüssu z'hinderlegä. I ha auso kes Bett ha gha di ersti Nacht aber glücklecherwies isch d'Maria oh sehr unkompliziert u het sogar ässä vo Mexiko ipackt gha. Mir hei zämä die ersti Nacht ih ihrem 90-er Bett verbracht u i bi miteme Schmunzlä igschlafä.