26.05.2019 Flåm, Aurlandsfjord / Norwegen

 So hüt isch de Plan aber mol ä Fuess uf Norwegische Bode z'setze! Dank em unplante Seetag vo geschter, sin mir au rechtziitig in Auerlandsfjord . Übrigens de längschti norwegisch Fjorde. Als mir so am 7i wach worde sin und d'Vorhäng ufgmacht hen, sin mir scho fascht am Endi vom Fjord gsi. Unser Ziel Flâm. Zum z'morge hen mir uns no bediene lo (Egg Benedict, Waffle, Croissants etc.), dass mir denn voll gstärkt vom Schiff chöne. Gmüetlich bitz Flâm erkundet und au scho d'Vermietstation vo unserem elektro Flitzer gfunde. Da mir no 2 Stund z'früeh gsi sin, aber d'Sunne glachet het, son mir gliich go frooge ob mir früehner chöne go. Es schiint ä Win Win Situation gsi z'si, de Vermieter isch au froh gsi, und mir sin uf unseri Tour ufbroche. Mir sin Richtig Auerlandsvangen (alles am Fjord entlang) und denn isch es uffe gange Richtig Stegastein. De Twizy hen mir über die Serpentine prüglet, aber au immer wieder d'ussicht gnosse und d'Flora und d'Fauna gnosse. Stegastein selber isch denn ä spektakuläri Platform ufm Pass gsi. Bi super Wetter hen mir de Usblick gnosse. Ufm Ruckwäg immer wieder Foti Hält ihglegt, und mitm reschtlich Strom no Flâm erkundet. Zrugg het uns de Hunger in ä chlins Kafi triebe. Mir hen uns mit Kabeljau und Ziegefleisch gstärkt. So hen mir au wieder unseri Akkus gfüllt für ä Wanderig durch Flâm.

No bitz go Souvenirs poste, und denn isch scho wieder zrugg gange ufs Schiff. Pünktlich am 6i sin mir los gfahre. De norwegisch Captain Roger (wirklich) het de Kahn im Fjord gwendet und denn sin mir au scho ufbroche. Ä schöni Liechtstimmig hen mir ka zwüsche dene hohe Gipfle. Zwüschedurre im Buffetrestaurant gediege am Fenster go was esse, meh dörf jo nüt verpasse! Au am 10i zobe (natürlich no Taghell) sin mir immerno im Auerlandfjord gsi, alles was nachher cho isch wüsse mir nid 🤤