Vom Norden in den Osten

Vor Ort im Nehemia Center

Es stoht grad einiges ah drum do de nächsti Bricht a dich. Mittlerwile sind scho fast drei Wuche ume und ich bi uf de Station ahcho, do ganz hoch im Nordoste vo Indie, ungefähr zwei Autostunde vo de nepalische Grenze entfernt. Indischi Autostunde in Distanz umgrechnet, ergebed öbe um die 30 Kilometer 😂 Än Verkehr ohni Regle, holperige Strosse, Staub und Tier uf dä Stross verlangsamt alles chligä. 

Häsch de ersti Bricht vo mir gläse? Häsch chli usegspürt das Startphase für mich eher Herusfodernd gsi isch. Herusfordernd im Sinn vo, wider zlerne sich uf e komplett anderi Kultur ihstelle. Achtung mach dich gfasst. 

Zurück in den Bergen im Norden

Anderhalb Wuche i de Berge töned ja eigentli ganz churz. Jedoch sind mir die Täg amel richtig lang vorcho. Grad au willi bewusst kei Ufgab dette gha han (war mit AVC so abgemacht). Klar mir sind verschiedensti Familie go bsurche und ebefalls hends mit voller Stolz ihri Projekt i dä Öpfelplantagenä präsentiert. Familie Bsurch heisst do, du wirsch liebevoll inäs Hüsli ihglade (Zueständ sehr sehr unterschiedlich), wod bequem uf Deckenä platz nimsch, wo irgendwie no en recht eigeartige Gruch hend. Joo und den hocksch mal dette für diä nächste zwei Stunde, trinksch und issisch obwohl das gar kei Hunger meh hesch, will die letzti Mahlziit ja gradmal 3 Stund här isch und fragsch dich wiso Gott s`nid eifach bi einere Sprach hett chöne beloh. Aber den genau i so Moment lernsch wider unermesslichi Geduld züäbä, usszahre und eifach zlose. Kompliment a dere Stelle a dich Melanie, du hesches also um einiges besser gmacht wie ich. Für Menschä do us de Dörfer,  isch amel nur scho es riese Freud wenn mir üsi Ziit ihne widmet und ihne es offes Ohr schenked. Jo es paar Gäng retur schalte und geduldig sie, dass wird mich do sicherlich no es parmol tangiere 😁

Mulling Trek 

Sehr cool und schön isch die drütägig Wanderig i de Himalayas gsi, womer üs uf fast 4000 meter befunde hend. Übernachtet hemmer i Zälter umgeh vo fazinierende Bergchettenä und wilde mini Rösser. S`team wo üs betreut hett, die hend echt alles geh dases üs guet goht unds üs a nüt gfählt hät. Super feins Esse hends amel überäm Füür kocht. Lircht beunruhigt hend mi die viele Kadaver um üs ume, schins sichtets amel Tiger und Bäre i derä Region. Ha aber bis uf es chli es raschle i de Nacht ums Zelt ume, nix gseh weder ghört. 

Auf gehts in den Osten 

Yes und so isch den au die Ziit i de Berge z`End gange und scho bald isch wider die 15. stündigi Busreis nach Delhi bevorgstandä. Um die Busreis zumgoh, hani spontan en Flug nach Delhi burcht. Jedoch isch dä Flug no spontaner en Obed vor Abreis, cancled worde. Gründe unbekannt. Jännu bi ja doch no in Delhi ahcho. In Delhi hani ei Nacht verbracht, das Ziitfenster hani grad möse nutze zum e läckeri Pizza zgo esse. Am nächste Tag isches den früeh am Morge an Flughafe gange woni den dä Flug richtig Norde gno han. 

Am Flughafe Bagdograd ahcho, hettmi de Phillip und sini Frau Dakem herzlich in Empfang gno. Sie schaffed siet mehrere Jahre mit de AVC Schwiz zämme. Nachere halb Stund Autofahrt hämmer Base oder das Center erreicht, wo ich für die nächste zwei Mönet wird stationiert sie. S`gebäude wird Nehemia Center gnännt und isch vo AVC im 2010 baue worde. S`gebäude wird hauptsächli für Seminar gnutzt und bütet Übernachtigsmöglichtkeite bis zu für 60 Gäscht. De umliegendi Umschwung isch riesig und sehr grüen ahgleit. Generell isch Vegetation sehr vital do, herrlich die Früchtevielfalt wod do finsch😋 Ziel vo dem Ufenthalt und Absicht wiso AVC mi do härä gschickt hät, isches die bestehendi Usgestaltig, in Zämmäarbet mit dä Verantwortliche do vor Ort, wider ufzfrischä, neui Userüm gstaltä, wie au ihnä ufzeigä, wases alles brucht zum sone riesigi Gartealag zunterhalte. Mitterwilä hemmer Konzeptideenä zämmetreit und uf Papier bracht (Gestaltigkonzept legi bi de Bilder bi). Was mich riesig gfreut hett und ich sehr dankbar bin, d`Wahr vo de Leica isch unversehrt ahcho. Mit de Understützig vo dene Messinstrument wird üs Arbet um einiges vereifacht. Riese Dankeschön ah dich Nathanya wie au as Leica Team. Sehr sehr Grosszügig de Support. Zusätzlich hett na witters Handwerkzüg wie au Maschinenä, do vor Ort möse beschafft werde. Die vorhande Werkzüg wosi bislang demit gschafft händ sind sehr abgnutzt gsi. 

Vorbereitigsarbäte sind scho im vollen gange, drum muesi jetzt dem Bricht es Endi setzte (kei Usred 😁). Lüt sind motiviert und wennd apacke, witzig wenn de eigentlichi Chuchi Chef do ufeimol Hecke schnidet. Yees und au ich bin motiviert und zueversichtlich dasmer do öbis langfrischtigs chend härrichte. 

Bis gli. Hebed eu sorg 🙌🏻