Umgebungsarbeiten im vollem Gange

Mir schriebed bereits de nünti Dezember und scho bald isch Helfti vo minere Ziit do in Indie ume. Jetzt fanged Wuchene plötzlich ah schnell verbi zgho, fast zu schnell, denn es git doch no einiges zum erledige. Wo du allmählich ih Wienachtstimmig bisch, herrsched bi eus tagtäglich 30 Grad. Forecast, de Bricht beschränkt sich generell uff die laufende Arbeite do vor Ort. 

Vorbereitungsarbeiten

Gfüllti zwei Wuche Vorbereitigsarbeitä, was jeglichi Demontier, Abbruch- und Schnittarbeitä beinhaltet hend. Die ganz Alag isch gstrählet und glicht jetzt änerem Barock ähnliche Garte. Hecke- und Struchkörper sind präzise zrugg gschnitte worde und hend so ihren hoffentlich, blibende und zuekünftige Formschnitt erhaltä. Die bislang unebeni Wiese mit 1800 Quadratmeter, besiedlet vo Schlangene im hoche Gras, wird rund um 20cm mit Erdmaterial ufgfüllt und söll spöter als Spielrase gnutzt werde. Demenstprechend hättme die Wiese Bodesebe zrugg gschnitte und so zur Üffüllig frei geh. Än mit Pflanze bewucherte Zaun wo die Wieseflächi bislang unterteilt hät, isch wiederverwendbar demontiert worde, inklusivem Abbruch vom komplette Betonfundament. Stahldachkonstruktion uf Betonpfiler, wo bislang zur Ahbauig vo Gmües gnutzt, jedoch völlig vernachlässigt worde isch, hättme Abbrochä. Dachkonstruktion us Stahl wärdemer führ die zuekünftig Pergola im einte "Outdoor room" chönne nutze. 

Budget

Än Plan und Ideenä zha isch schön und recht, jedoch mues aber aus nötige "Bred" vorhande sie. Sie nenned das do so, Bred 💵! Die erforderlichä Choschte für`d Umsetzig vom komplette Projekt, hämmer ahand vo Priesagobe vo de eizelnä Lieferante kalkuliert. Usdem use hett sich den üses Choschtedach bildet. Au hemmer zwei Variantene ihgeh, zum einte würklich die wichtige und nötige Element und zum andere mit zusätzliche "nice to have" Wünsch. Die Choschtezämmestellig isch den bi de AVC ihgreicht worde. Schlussentli hemmer üs den uf die würklich signifikante Element geinigt, wo sölled umgsetzt werde. Unteranderem isches de AVC au es Aliege gsi, dasich nid nur voll am durre schaffe bin, sondern au na was vo de Kultur chan gseh und mitneh. Sowiso, de Gstaltigsplan bestoht na wie vor und chan au na ih kommende Jahre, wer weiss, no umgsetzt werde. 

Spatenstich

Für jeglichi Ushuebs- und Rodigsarbeite hend mir maschinelli Understützig becho, was üs so einiges a Ziit und Kraft gsparret hät. Mit eimst em Gedanke und Mental vorbereitet 😉, dass mer alles vo Hand werded usführe, bini masslos falsch gläge, wasi aber ganz guet chan verchrafte. Die sanderdig Bodeschicht vo +/- 30 cm isch bim Droppoint, Parkspace und de adenkte Outdoor rooms, maschinell abtreit worde. Usghobenä Material womer für die erforderlichi Terrain Ufüllig vo de Grüenflächi brucht wird, isch den per Traktor mit überdimesonalem Ahänger (Karrette) zum entsprechende Ibauziel transportiert worde. Dettä später, maschinell verteilt wird. Ufgrund vo langahaltendem und starkem Niederschlag im Summer, werded die usghobene Flächenä (Droppoint, Parkspace, Outdoor rooms) fachgrecht miterem Kiesgmisch fundiert, was die Flächene bi jedem Wetter befahr- und begehbar mached. Mittlerwille simmer mit de Ushuebsarbeitä fertig und startklar für de Ihbau vo de Fundationsschichte. 

Instruktion am Messinstrument 

"It takes a littel bit more time but it is much more exactly" eh Usag vom einte Arbeiter, womers Messinstrument für Vermessigarbeitä bim Bau vonere Stützmuur ihgsetzt hend. Es het Freud gmacht, d`Lüt a dem Instrument ihzschaffe, ihnä d`Handhabig zeige, wie au ganz eifachi Tipps witter z`geh, wie Arbeitä für kommendi Projekt au präziser chented usgführt werde. 

Organisatorisches 

Ganz ehrlich, ich hans mir ned so vorgstellt aber organisatorisch laufts echt super. Ich chan de Lüt en Uftrag geh und sie kümmered sich sofort drum und es klapped den au! Klar lauft alles chli innerem andere Ziitstrahl und es git amel ganz en hufe Telefonat und Gruppetreff uf de Baustell, wo du dich nur fragsch was mached die Lüt do, ich han eigentli nur en Lastwage Kies welle. Aus Ziitmanagement hemmer in Griff becho, am erste Tag sind die Arbeiter mol irgendwenn am 10ni am Morge ihtroffe und irgenwenn nachem Zmittag unufindbar gsi. Aber mit e chli Understützig vo unwiderstehlicher Toblerone und Chugelschrieber, fangemer jetzt amel Punkt achti am Morge ah. Lunchtime vom eis bis am zwei und de Fiirobed phaltemer eus amel offe. 

Ja und dä wo do jetzt so gross schriebt, liit zurziet miterem unverhoffte, luut Arzt, Bandschiebevorfall im Bett und mue sich schone. Ich hoffe sehr, dasich mich schnell chan uskuriere und bald möglich wider Ihsatzfähig bin. Den es git no einiges zum due! 

Ich hoffe han dir chli en chline Überblick chönne geh was bi mir so lauft. Freumich sehr uf die no verblibende füf Wuchenä do im Oste, wos den nocher für mich no zeh Täg in Süde abegoht. Ocean i can smell you.

Bis bald und ganz e gsegneti Adventsziit. 

Regards from India. Dome