Una semana en Guatemala

Die Frag esch wahrschenlich ned sooo schwierig zbeantworte, sofern mer de Titel glese het 🙃 velech hesch du dich au gfragt: “langed 1 Woche für Guatemala? Sones grosses Land?’ - mini Antwort: “Nei.” - aber immerhin han ich d Region rund um Antigua Guatemala echli döfe kennelerne ond ich bin sicher ned s letzt Mal da xii :-)

Won ich glandet bin, han ich mer mit zweine es Sammeltaxi vom Flughafe nach Antigua Guatemala zum Hostel “Big Foot” gnoh. Det het au scho mini Kollegin, dLuana, won ich in Sámara kenneglernt han, mit ihrere Kollegin, de Tina, uf mich gwartet.

Sie hend am Abig vorher es Schwiizer-Restaurant entdeckt, womer denn zeme es feins Chäsfondue sind go esse.

Das het d Luana ond mich uf die gueti Idee bracht, au es Schwiizerhüsli mit Fondue ond anderne Spezialitäte in Sámara zeröffne. De Businessplan staht scho fast, mer sueched nume na Sponsore 😉

Am nächste Tag simer denn chli Antigua Guatemala go erkunde. Es het eh wunderschöni Altstadt mit schöne Hüser, Marktlädeli, Park etc.

Nachher simer no öpe eh Halbstund ufen chline Hügel ufegloffe, vo det het mer eh wunderbari Ussicht über Antigua ond de “Volcán de Agua”.

Für de nächsti Tag hemer eh Tour uf de “Volcán Acatenango” buecht. De liit über 3’900m, aber da Antigua bereits uf ca. 1’500m liit ond mer en Teil au chan mitem Auto ufefahre, hemer ois die Wanderig zuetraut.

Topmotiviert simer am Morge ufgstande ond am halbi 8i nachem Zmorge esches denn losgange. Alles, was mer für die 2 Täg bruched (mit Übernachtig im Zelt), hemer müesse selber träge: gnueg ztrinke, esse, warmi Chleider etc. Somit hemer namal öpe 8-10kg ufem Buggel treit.

Sobald ois s Auto ah dem Punkt useglah het, esches grad scho steil deruf gange. Ich han vo Afang ah gmerkt, dass das ken Chatzesprung wird für mich (die wo mich kenned wüssed, dass ich ned grad jede Tag soviel Sport mache 🤪).

Da mer aber ungefähr all 30 Minute e Pause gmacht hend ond ich immer gueti Reggeaton-Musig glost han, eschs au für mich machbar xii 😉.

D Wanderig esch sehr steil ond astrengend xii, aber die schön Ussicht eschs uf jede Fall wert xii.

Nach 5 Stund simer denn völlig erschöpft, aber au glücklich ond irgendwie echli stolz, das gschafft zha, dobe i oisem Camp acho.

Leider het die Gmüetlichkeit ond Rueh ned so lang aneghebed ond won ich mini Auge füren Moment zuetah han, het sich alles agfange dreihe ond mer esch richtig trümmlig worde. Zerst han ich denkt, das chunt eifach vode Astrengig, aber wos nach paar Minute immer nanig besser worde esch, han ich de Guide nacheme Medikament gfraged. Leider esch er chli zspat mit dem cho ond ich han mich ide Zwüscheziit scho s erst Mal müesse übergeh. Das esch denn eigentlich au de ganz Abig so wiitergange ond ich han ned mal en Schluck Wasser chöne phalte. Es het sich usegstellt, dass das en Art Höhechrankheit muen sii, wel es esch ja würkli gad itrette, sobald mer dobe acho sind ond het eigentlich nüm richtig ufghört, bis mer weder chli tüfer unte xii sind 🙈 ich han vorher na nie vo dere Chrankheit ghört, aber anschinend chans jede treffe, au wenn mer sich d Höchi eigentlich gwöhnt esch (oise Guide hets au schomal gha).

Uf jede Fall han ich leider die super Ussicht uf de Vulkan gar ned richtig chöne gnüsse, aber ich bin froh, het d Luana wenigstens es paar schöni Föteli chöne mache 🤗.

Sobald d Sonne weg xii esch, esches denn au so richtig chalt worde (ide Nacht bis zu -3 Grad ☃️). Da ich weder Flüssigkeit no Esse (das hani mich gar ned erst getraut zprobiere😅) han chöne phalte, han ich natürlich umso chälter gha. Drum bin ich denn ziemlich bald is Zelt, igmummt ond mit 3 verschiednige Schlafsäck/Deckene ond dere  Schutzfolie vode Tschänsch (het mer glaub s Lebe grettet😍). Mit de Ziit esches denn au einigermasse warm worde ond ich hab nüm müesse erbreche (was au?! 🙈), aber denn esches bide Tina defür losgange. Sie het eigentlich die ganz Nacht vorem Zelt verbracht, obwohl ich vermuete, dases bi ihre eher öpis schlechts im Esse xii esch (het erst ide Nacht agfange).

Uf jede Fall esch das eini vo mine schlimmste ond längste Nächt ih mim Lebe xii ond ich hans chum chöne erwarte, wo endlich Morge worde esch.

Ich han am Abig vorher scho entschiede, dass ich da ned mit allem Gepäck wird chöne abelaufe ond han drum es Ross ufebstellt. Das han ich mer denn mit de Tina teilt ond mer hend ois immer mit riite ond laufe abgwechslet. Immerhin hemer bim laufe de Rucksack chöne ufs Ross geh ond so hemer wenigstens nume oises eigete Gwicht müesse träge. Nach 2-3 Stund hemer denn endlich de Parkplatz erreicht ond ich bin so froh xii, weder „feste Bode“ unter de Füess zha. So schnell bringt mich niemert meh uf sonen höche Vulkan ond wenn, denn sicher nume mit entsprechende Medis 🙈.

De nächst Tag hemer praktisch nume im Hostel in Antigua verbracht ond ois echli vo dene ganze Strapaze erholt. Endlich han ich au weder chöne chli Flüssigkeit ond Esse zu mer neh ond bin langsam weder zu Chräfte cho.

Am Tag druf hemer denn de Bus an „Lago de Atitlán“ gnoh (öpe 4h ab Antigua). Det hemer ois in „San Pedro“ iquartiert, es herzigs Backpacker-Dörfli direkt am See.

Es esch würkli ganz chlii ond überschaubar mit einere Hauptstrass für Touriste. Det hets alles, was mer brucht: feini Restaurants, Bars, Lädeli, Hostels. Mer sind im Hostel „Casa Roberto“ xii, eifach aber voll okay. 

De Tag dur simer mitem Tuk-Tuk an „Playa Cristalina“. Obwohl „Playa“ au da weder bitz übertriebe esch, aber es het glanged zum echli sünnele ond lese.

D Luana ond d Tina sind denn am Tag druf scho weder zrugg uf Antigua, wel sie wiiter uf Nicaragua hend wele. Ich bin no en Tag länger bliebe ond han am nächste Tag no „San Marcos“ gegenüber am See agluegt. Das esch namal es chliners Dörfli, vor allem bi so Ultra-Hippies sehr beliebt ;-)

Am Sonntig - sprich hüt - han ich de Bus zum Chichicastenango Markt gnoh. De findet jewils 2x pro Woche (immer am Donnstig ond am Sonntig) statt ond esch bi Iheimische wie au Touriste sehr beliebt.

Da wimmleds nume so vo schrille, bunte Sache ond mer chan sich fast ned satt luege. Wichtig, wenn mer öpis chaufe wet, esch aber umbedingt s verhandle. Ich han gmerkt, dass sie da völlig überrisseni Priise verlanged. Ich han mer z.B. e grossi, wissi, gstrickti Hängematte kauft. Zerst het er über 500 Quetzales (ca. $60) defür wele. Nach langem verhandle hemer ois denn uf 170 Quetzales (ca. $20) geeiniged, was sicher au na gnueg esch 😅. Aber immerhin hani irgendwenn diheime es Stückli Guatemala🤗.

Nach guete 5 Stund am Markt simer denn weder vom Bus abgholt worde ond de het ois zrugg nach Antigua gfahre. Da ligg ich jetzt weder im „Big Foot“ Hostel ond schriebe de Blog leider scho zum zweite Mal, wel mer vorher s Handy abgstürzt esch ond s alles weder glöscht het (grrr 😡). 

Uf jede Fall hoff ich, es het dir/oich Spass gmacht, mini Gschichtli zlese :-) bis zum nächsten Mal 🙋🏼‍♀️