Vietnam – Ninh Binh nach Dalat 8.1. – 11.1.2018

Nachdem mir usgschlafe i eusem Bambushüttli, packt und de feini Zmorge nomol gnosse händ, simmer am 12.00 Uhr vom Bus abgholt worde, wo eus uf direktem Wäg an Flughafe Hanoi het söle bringe. Euse Flug uf Dalat gaht hüt am 16.00 Uhr und duret ca. 1h 20min. Mir händ nüt böses dänkt als einzigi Gäschd im Bus, bis eus de Driver uf Vietnamesisch zämägschisse hät, will eusen Rucksack ufeme Platz glägä isch, obwohls no 14 freii Plätz gha hät! 

Mir händ dän no 9 anderi Lüt zämägsuecht in ganz Ninh Binh und Umgebig und mir sind denn langsam nervös worde ob mer de Flug no schaffet! Endlich, 1h spöter, isch es denn los gange, doch die Freud hät nid lang aneghebet 😊. Uf eimal im Nirgendwo heissts, «you have to leave the bus…change the bus». Hm okee…mir sind de andere gfolgt obwohl eus das sehr komisch vorcho isch! Nach 10min, aber gfühlte 2h spöter, simmer inen andere Bus gstiege! Zhinderst über Koffere kroche und eus uf die chline Sitz i die hinderst no freii Reihe quetscht! Ok, mir händ kei 2h meh Zit bis mer am Flughafe sötet si und mir händ eus scho Gedanke gmacht, was euse Plan isch wenn mer de Flug verpasset 😉. Doch glücklicherwies simmer doch no pünktlich acho….jetzt heissts, Backpack packe und sofort luege wo mer hi müend! Schnell hämmer euse Checkin-Schalter gfunde mitere riese Schlage Lüt dävor! Ja, eis hämmer scho schnell gmerkt, im dränglä sind dVietnamese Wältmeischder! So hämmer euse Platz müese verteidige und händ sGepäck ohni Problem chöne abgeh! Das wär gschafft! Jetzt ab zur Passkontrolle, was ebefalls guet gange isch! Und siehe da, mir sitzet im Flüger ab in den Süüüden, der Sonne hinterher, der Sonne hinterher 😉.

Ufeme chline herzige Flughäfeli, als einzige Flüger, simmer in Dalat acho und es isch scho dunkel gsi! Mir händ eus denn, nach es paar Pris-Verhandlige, es Taxi gschnappet und sind i eusi Unterkunft gfahre. Det icheckt hämmer eus uf de Wäg nach was Ässbarem gmacht, da mer scho faschd umgheit sind vor hunger! Genau, sZmorge isch praktisch sletschde gsi wo mer gässä händ und dIlse isch au dementsprechend guet druf gsi 😉.

Wow, was für es luege am Morge, ufstah und vo de Sunne bländät zwerde und blaue Himmel zgseh! Das isch die letschdi Bestätigung gsi, das mers Richtige gmacht händ! Nacheme sehr spezielle Zmorge, Sandwich mit Fleischkügeli, Korriander, Rüebli undere komische Sauce, hämmer eus voll motiviert uf de Wäg gmacht Dalat zerkunde! Wiet simmer nid cho, gnau gno bis zume Chreisel wo mer am fötele gsi sind, woni agsproche wird vome Vietnames! Er schaffi für dEasyriders. Die machet mit dir Töfftoure dur ganz Vietnam, was absolut fantastisch mües si (hämmer bereits vo es paarne ghört wo mer troffe händ, vorallem in Ninh Binh). Nachdem mir gfunde händ er söll mal sini Empfehlige (handschriftlich i sim wertvolle Büechli) bringe, isch de Chef, Mr. Binh au uAmftaucht! Die Empfehlige händ eus denn sofort überzügt, da vili Schwizer mir usem Herz gsproche händ. E bitz skeptisch das mer eifach so agsproche wird, cha mer dem vertraue etc etc. Aber alli Empfehlige sind super positiv gsi und seget die tollste Täg in Vietnam gsi mitem Mr. Binh! Mir händ denn Diskussione mit ihm gfüehrt woruf er eus abote hät, grad sofort e gratis Sightseeing-Tour dur Dalat zmache, damit mir gsehnd wie sie fahret und wie sie sind! Ein Blick hät gnüegt und mir händ eus druf ilah! Isch echt super gsi und de Vertrag für übermorn, e 4-tägigi Töfftour vo Dalat id Berge bis nach Ho-Chi-Minh-City isch underschriebe gsi! Mir chönds sogar no usdehne uf 6 Täg mit Mekong-Delta wäns eus pässlet. Ja so käni mi gar nid…aber bin mega gspannt und freu mi richtig druf 😉.
Nachdem eus de Mr. Binh und de Luu wieder am Usgangsort abgsetzt händ, simmer nochli dur dStadt, händ was gässä und sind zrugg i eusi Unterkunft zum am Nami nachli gmüetlich relaxe, lese und de Blog schriebe 😊. Am nächste Tag hämmer wele go wandere und sind mitem Scooter richtig LangBiang! Mir händ ca. ¾ gmacht und sind dänn wieder umkehrt, da dSpitze i dichtem Näbel gsi isch und mer nüt gseh heti! Trotzdem isch es schön gsi, wieder echli bewege und i de Natur umezlaufe! So, am Dunnstig, 11. Januar gahts mit de Easyriders los! Mir freuet eus riesig uf das Erläbnis!