Tamaterau-Mt. Manaia-Paihia-Cape Reinga-Spirits Bay

06.03.2020

Woni ufgwacht bi u usem Fenster ha gluegt bini hüt ehrliechteret gsi. Es het nüm gregnet u sogar chli blaue Himmel gha. De hani mi gad ufgmacht zum Mount Manaia gad 15min vo hiä. Ufä loufä u zrüg hani öppe 1h gha. Isch e ganz e schöne Wanderweg gsi, mega schön zweggmacht. Dobä e super Usblick o wes chli Wolke het gha, isch drozdäm schön gsi. Ner bini witer nach Paihia gfahre. Sehr es schöns dörfli mega schön glägä, so i der bucht u mega fiu chlini Inslä drum. Het o wider fiu schöni Grafitis gha. I Neuseeland het mega fiu Grafitis u wens het de sisi wük schön gmacht nid eifach nume so chli gspreit. Jo ner hani eich denkt obi dert seu übernachte, wer eich dr Plan gsi. Wiu am nöchst Tag heti ganz i Spitz ufe weue vor Northinslä zum Cape Reinga u er het erst abem Samstig schön Wetter gemeldet gha dert obä. Aber ha de mi Plan gstriche u ha denkt I mues hüt no dert ufä fahre, no einisch 2.5h fahrt. U ludo chum bini id nöchi cho, z schönste Wetter, isch mis Gfiu guet gsi. Ner bini de zerscht ufe Campingplatz gange go reserviere. Gloub dr schönst Camping gsi bis jetzt vor Lag. Gad am ne wunderschöne Strand u alles suber u gnue Platz. Ner bini de 10min no füre I Spitz gfahre go dr Sunneungergang luege bim Cape Reinga. Isch Troumhaft gsi, fasch keni lüt u isch e mega schöne Punkt mit dem Lüchtturm wo eifach is unentlechä Meer usä gsehsch. U ner no di 2 Oceanä wo zämä chömä(Tasman see/Pazifischen Ocean) , gseht o sehr idrücklech us. Sunneungergang isch nid so schön gsi weg de Wolke wo vor Australie si gsi. Ner bini I Camping zrug u ga Znachtässä. Mis Favorit Znacht wos am meistä git hahaha. Thon mit Rotäbohne. Muesi mi chli ischränkä ohni Kühlschrank.