Vietnam – Hanoi, Halong Bay und Ninh Binh (1. – 7. Januar 2018)

Nach ca. 3h 20min. flüge simmer in Hanoi acho und vo eusem Taxichauffeur mit Namensschild «Michelle Daniel» 😊 abholt worde. Doch e gueti Entscheidig gsi, da’s dusse bereits dunkel isch. Übrigens, allne no es guets Neus 😉. Leider hät de Taxichauffeur keis Wort englisch chöne und so simmer alli 3 ziemlich ruhig und sprachlos im Taxi gsässä! Solang er eus sicher dur de Verkehr bringt, isch alles super. Unglaublich, sie känät zwar Regle, nur interessiert die niemert! Es wird eifach für alles ghuppet, ob mer überholt, abbügt, hoi seit, de ander will warne oder eifach uf sich will ufmerksam mache, es wird eifach ghuppet und das vo 1000-ige Töffs und Autos. Es glicht am Bienehuus, wo dKönigin kidnappt wird 😉. Serste Mal dStrass überquere (ja eifach laufe ohni studiere), denn is Hotel ine und Türe zue…wow endlich mal wieder Rueh! Ich mues ehrlich sägä, me entwicklet es Gfühl zum die übervolle Strasse züberquere und obwohl jede eifach lauft und fahrt, funktionierts irgendwie!

Nacheme Stündli usruebe häts denn doch afange chribbele, wie sich die Stadt am Abig afühlt, wie isch sEsse, wie sind dMensche? Looos, uf Entdeckigsreis! Tanzend simmer dur die volle Strasse gloffe mit alles Lädeli vo gfälschte Markeklamotte und -täschä, huppende Autos und Töffs, Frücht- und Gmüesläde und Strassefoodrestis mit für üs Kinderstüehl und -tisch ziemli uf de Strass. Unglaublich was uf dene Scooters alles transportiert wird. Ungefähr de ganzi Hushalt inklusive em ganze Hustierbestand (Hüehner, Schwii etc.). Ich mues sägä, dSchwitz isch brutal ruhig dägägä und de Seedamm gsehni mal wieder ime ganz andere Liecht 😉.

Tja, sWätter macht leider eifach nid so mit. Immer no grau und Rägä präget euse Alltag. Aber zerst emal Zmorge esse, zum Glück hämmer da Uswahl us kalt und warm und vor allem au Frücht! Herrlich! Nach 2 Täg Chaos und Lärm in Hanoi hämmer eus kurzerhand entschiede, 2 Täg und 1 Nacht id Halong Bay zbueche mit Übernachtig ufem Schiff. Es Naturwunder im Meer mit viele hoche Felsbrocke! Morn gahts los!

Mit üsem Driver undere coole internationale Gruppe simmer dur 3 Höhlene gloffe, mir händ eusi eigene Spring-Rolls gmacht, sind go kajake und hetet Tai Chi ufem Deck chöne mache (6.30 Uhr isch eus denn aber doch zfrüeh gsi 😉). So e Nacht uf some Schiff isch doch öpis speziells und bsundrigs. Leider hät de Petrus immer no kei Mitleid mit eus und hät eus wieterhin sini Lieblingsfarb grau zeiget und häts Rägne lah. Dadurch isch de Wow-Effekt vo de Halong Bay leider chli weniger gross usgfahle!

Zrugg in Hanoi hämmer denn eusi, mittlerwile füechti Täschä, wieder packt für Ninh Binh. Für en chline Betrag hämmer en sogenannte Touristebus buecht und sind pünktlich bim Hotel abgholt worde. Nachdem faschd all Gäschd im Bus gsi sind, isch jedoch de Guide uf eimal verschwunde und mir sind miteme Chauffeur underwägs gsi wo erstens nid so Interesse gha hät was mir händ wele und buecht händ und zweitens keis Wort englisch hät chöne! So hät er eus ca. 7km usserhalb vo de Stadt wele userüehre. Zum Glück häts es paar anderi Girls im Bus gha wo sich das nid gfahle lah händ. Die eint hät e bitz vietnamesisch gredet, die ander hät ihrem Reisebüro aglütet wo denn mitem Buschauffeur gredet hät! Er isch denn doch losgfahre und eimal dureschnufe isch agseit gsi 😉.

Nguyen Shack. Es Bambushüttli am Fluss zmitzt i de Berge, was wotsch schöners ha (mir redet immer nonig über dSunne – me redet ja schliesslich nit über Sache wo nid awesend sind 😊). Also…zwei giggelendi Girls ufeme Scooter, ipackt wie Eskimos, fahret dene Wägli entlang und lueget de Mensche zue wie sie uf de Riisfälder schaffet. Zumindest sind die Fälder under Wasser und werdet parat gmacht wenn denn die grosse Unbekannte – Sonne – wieder mal uftaucht! Hüehner, Geisse und Chüeh, alles mögliche lauft da über dStrasse und händ so gseh, überhaupt kei Angst vor dene Touriste! Willkomme im ruhige Landesinnere! Unglaublich schöni Fläckli häts da, mir stellets eus no schöner vor mit Sunne 😉. De gröschdi Tempel vo Asie (Bai Dinh Pagode) hämmer ebefalls bsuecht und sind extrem beidruckt gsi. Buda XXL cha mer da sägä!

Zrugg “dihei” hämmer eus i eusere Stube im Bambushüttli e bitz igrichtet. Ingesamt drü Nächt hämmer da, leider immer no die lange Hose, Flauschisocke und Rägäjagge nötig! Zum Glück hämmer en Ventilator wo au als Heizig cha brucht werde und so simmer 2.5 Täg eusi Underwösch am tröchne, was schlussendlich klappet hät! Morn hämmer es Velo gmietet und macht mit dem dGägänd unsicher! Eigentlich hät eus de Wetterbricht 2h Sunne vorusgseit, was aber schlussendlich leider doch nid itroffe isch! E 2.5 stündige Bootstour (wovon mir viel sälber händ müese paddle will eusi Dame Schulterschmerze gha hät) hämmer absolviert und sind nacher wieder zrugg i euses Hüttli. Mir händ eusi Plän langsam vom Norde in Süde zreise endgültig über Bord gworfe und so hät dIlse mit eim vo de Agstellte en Flug für morn Mäntig vo Hanoi uf Dalat im Süde buecht! Ebeso de Transport und dUnterkunft für zwei Nächt in Dalat. Und tschüss….