Reise nach Fortaleza

26. Jan. 2016

Bim packe hemmer ploetzlich bemerkt das uf de Hotel bestaetigung die erst Nacht gfehlt het. Optimistisch simmer den eifach glich in Bus gsesse und hend ufs beschte ghofft. Eigentlich hemmer demit grechnet das d Busfahrt ca. 5 Stund gaht, was heisst, dass mer um die 6i in Fortaleza acho werdet und locker no zit gha hettet, zum es hotel fuer e Nacht finde. 

Leider het de Car scho ide erschte halb stund de geischt ufgeh und mir hend oepe 1 stund uf en neue Car muesse warte. Nach 4 Stund fahre hemmer en halt gmacht und gmeint mi seget entli acho. De Bus Fahrer het den muesse schmunzle will mer erst im Mossoró gsi sind und no witeri 4 Stund vor eus gha hend. 

Am 9i simmer den im Hotel acho wo eus de Receptionist het muesse mitteile, dass s Hotel scho usbuecht isch. Netterwis hetter den grad am Hotel ade Strass nebetzue agluete, wo no es Zimmer frei gsi isch. Det hemmer den zum erste mal richtig bemerkt wie schwer eusi Ruckseck eigentlich sind :D

29. Jan. 2016
A dem schoene Fritig hemmer eus fuer de Beachpark entschiede. Im Internet hemer glese das de Itritt 150 Real (fuer Brasilie extrem tuer) choschtet. Dementsprechend hemmer ned viel meh Geld mitgno, will mer eus au no fuer unterwegs paar Sandwich gmacht hend. Dann das boese erwachen. Bim Ticketchaufe hets den gheisse das es sogar 200 Real koschtet pro Person und somit isch euses ganze Geld scho weg gsi. Im Beachpark hets chaeschtli geh womer Tasche het choene igschluesse. Aber natuerlich hends au fur das Geld wele, wo mir leider nueme gha hend. A dem punkt hemmer eus den muesse entscheide. Entweder immer einzeln go rutsche oder Taesche verstecke. Mer hend den Taesche ines offenigs Chaeschtli ohni abschluesse tah. Mer sind immer mal wieder go verbi luege ob sie no da isch. 

Es het mega viel verschiedeni und luschtigi Rutschene gha. Vorallem die eint womer ine Kapsle staht und den ziehts eim de Bode unter de Fuess weg.