Vietnam - Phu Quoc (15.-20.1.18)

Chum simmer dobe gsi hämmer scho wieder de Landeaflug in Agriff gno. Ganzi 35 min. häts de Flug vo Ho-Chi-Minh-City nach Phu Quoc duret. Mir händ eus e Trauminsle vorgstellt und sind ganz gspannt gsi, wo mer usem Flüger gstiege sind, was eus jetzt erwartet. Eusi Träum sind leider aprubt beendet worde, da euse Taxifahrer sini rechti Hand non-stopp a de Huppi gha häts! Mir sind und bliebet in Vietnam 😏. Phu Quoc isch bekannt für sini Traumstränd, wo mer au würkli chóng bestädige. Leider häts aber natüürlich au Hotel an Hotel wo a bester Lag sind und damit au werbet. Mir sälber hämd es Bungalow gmietet ca. 7min. vom Strand weg zum laufe und daher sehr ruhig und schön! Eusi eige Wäschmaschine und e chlini Chuchi hämd das Bungalow abgrundet. Dalag selber isch no miteme schöne Pool undere schöne Gartealag usgstattet gsi. Die erste zwei Täg hämmmer sHüttli sehr guet usgnützt, da dIlse mitere Mage-Darm-Verstimmig sBett ghüetet häts! Zum Glükk hämmmer 5 Täg buecht und so hämmmer no 3 Täg gha zum dInsle zerkunde.

So hämmmer eus mitem Scooter uf Entdeckigstour begeh und hämm zerz emal de bekannti Wasserfall gsuecht! Es isch no es Abentüür gsi bis mer de au gfunde hämm, da so ziemlich nüüt beschilderet isch uf dere Insle. Nach öpe 3/4h uf Sandwägli, Löcher i de Strass, dur en halbe Wald und mit Hilf vo maps.me hämmmer denn doch de Igang gfunde und hämm eus no zFuess uf de Wäg gmacht für die letschde Meter. Leider häts echli zwenig grägned i letschder Zit, somit isch de Wasserfall eher es bescheides Bächli gsi wo sich de Wäg über die grosse Stei gsuecht häts!

Im gsamte hämmmer de Scooter 4 Täg lang gmietet und sind überall here dämit. SKokosnuss-Gfängnis, wo im Krieg vor allem die hochrangige Vietnamese vom Norde gfange ghalte worde sind. Unglaublich wie sie die Lüt i chline Chäfig oder liechtdichte Containers gstopft und so bestraft händ. Ruhig und miteme komische Gfühl im Buch simmer denn schlussendlich wieder wäg gfahre.

Phu Quoc isch e Insle wo würkli für Strandferie buecht wird. Wie de Tourismus boomt gseht mer a de Strasse wo baut worde sind und a de ganze Hotelkomplex wo am entstah sind. Es git faschd kein Ort wos nid am baue sind. De Urwald wos no häts, wird ines paar Jahr wahrschinli au verschwunde si! Daher isch es schön zum gseh, dass die Iheimische im Landesinnere sich es Hüsli chönd leischde wos selber bauet. Und doch wird die Insle e Art Touristefabrik.

Derkenntnis vo dene 5 Täg isch, das mers sehr gnosse hämd. Die schöne Stränd, die unglaublich schöne Natur, die Iheimische und ihri Traditione, swarme Meer inkl. Massage am Strand 😌 und Bars mit gueter Atmosphäres, feinem Food, chüehlem Bier und gueter Musig. Nebet em Strand, Sunne und em Meer häts die Insle aber nid viel zbüte.

Jetzt gahts wieder zrugg uf Ho-Chi-Minh, wo mer emal zwei Nächte buecht hämd! Mal luege wies denn wieter gaht!