vida de rancho y kamloops, columbia británica

Bevorimi ufe läng wäg i norde mache, bsuechi no s'mimi (e super kollegin vo deheim) wo fürne monet ufere farm in little fort isch. Si zeigtmer die schöni Umgebung, was si so macht und mir heis lustig wie eh und je. Toll fründe am angere äned vor wäut z'träge und wöu die gemeinsami Japanreis vor 3 johr nid klappet het, isches umso besser heimer üs jetzt do in Kanada troffe. Ih mire unschlüssigkeit woni dür s'Eu so richtig alaska, froge mi d'farmbsitzer obi nid am mimi ire nachfouger wet si wöu e angere häufer abgseit het. Damers outofahre chli verleidet isch und allei d'tankchoste für ei wäg so vü wäri wiene flug hi & zrugg, sägi ihne zue für 3 wuche häufe und bueche e flug für am 19. juni.

1h nördlich vo kamloops in little fort geitme mitere chline fähre über north thompson river, dürne waud a chüeh verbi, es paar witere kurve ufere staubigi strass und nach 15min chundme zum rote gatter - hidden valley ranch. Nid riesig für kanada, aber trotzdäm gnue gross asme allei isch undme cha mache wasme wott. Si läbe nid vom farme, es isch meh es hobby und hei drum no jobs näbebi. Ca. 40 chüeh, 5 ross, 6 hüng, 5 chatze und es dutzend hühner. Am meiste git aber natürlech dr garte z'tue, heisi doch zimli vü gmüses, beeri, frücht, chrüuter und süschti pflanze. E normale tagesablouf vo mir gseht so us; 6.30 tagwach, früehstück, mit de hüng go d'gränze resp. zühn abloufe zum sicherstöne as niene tier ine oder use chöi, ross ufne angeri weid bringe, snacke, paar stung jättä oder süsch dr grüene dume aktiviere, lunch, zuhn repariere oder houz hacke (lieblingsbeschäftigung wöus es guets workout isch), im grosse rahme giesse und wenns um die 7-8i de z'mühesam wird mit de mugge gits langsam znacht. Spezielleri sache wie s'brande vode chüeh, überzähligi hühner schöpfe oder höie si e gärn gsehni abwächslig. 2 kuuli usflüge machemer und zwar einisch ane tierauktion und s'angere mou anes lokaus rodeo. Beidi mou bini ohni cowboy stifle und huet zimli dr touri.

Au es in auem isches e troumhafte ort (siehe fotis), kuuli lüt und e spannendi erfahrig. Wöus aber immer was z'tue git und si vo sich us nie s'äge 'jetzt isch guet' oder 'mach was für di', chundme sech liecht usgnützt vor und het eich ke chance zum irgendwas süsch z'mache.

Somit bini froh hani es eigets outo und cha am wucheänd wäg richtig kamloops woni 3 mou es paar täg miter familie stone, uf vancouver island könneglert, verbringe. Die si super sportlech und liebe aui outdoor akitvitä. S'glück wott as d'dochter (ähnlechs auter und löiferin) dürre summer deheim isch und mit ihre goni go sekle, kanue und standup paddle. Dür das chani ou das vorzitige summerwätter chli gniesse, die letschte 3 wuche hets gschetzti 20min grägnet und d'temperature si fasch täglech um die 30° gsi.

Jetzt bini aber ready für alaska und fröie mi unghür weni die zwe schlawiner in anchorage am flughafe atriffe. D'wg heidehubu isch wieder mou vereint - aiaiaiaiai :)