Gran final - Argentina 🇦🇷 y Uruguay 🇺🇾

Hola chicos! 🙋🏼‍♀️

🇨🇷 🇳🇮 🇬🇹 🇵🇦🇨🇴🇪🇨🇵🇪🇧🇴🇨🇱🇦🇷🇧🇷🇺🇾

Wow, wer heti das denkt - nach 353 Täg, 12 Länder, mehrere tuusig Kilometer (hans probiert uszrechne, esch mer aber bitz zmüehsam ond z ungenau worde 😅), 9 Flüg, devo 1 zum überhaupt mal da anezcho plus folgt en wiitere, zum weder heicho, xx(x?)-verschiednigi Busfahrte mit durchschnittlich öpe 10h Fahrt, einere 5-tägige Bootsüberquerig vo Panama nach Kolumbie, 1 verlorene (bzw. gstohlene) Handy ond 2 Portemonnaie inkl. Debitcharte, bin ich jetzt da am Endi vo mim Abentüür aglangt. Wemer das liest, chan mer sich frage „wieso tued mer sich das überhaupt ah? Diheime esch doch viel bequemer..“ - ich hoff, das ich all die Gründ scho ide vorherige Blogs scho chli han chöne fürebringe, wenn ned, esch das namal die letzti Chance dezue 🤗

Hola Edelweiss ✈️🥰

Am 15. November am Morge am 9i bin ich mitem Flüger vo Santiago de Chile in Buenos Aires (Argentinie) glandet. S erste, won mich usem Flugzügfensterli alached, esch das herzige, rote Näsli 🥰 mini Eltere sind praktisch glichzitig us de Schwiiz acho.

Ide Immigrationshalle acho, het mich fast de Schlag troffe 😅 Es het hunderti vo Mensche am astah gha, mer sind wohl grad zude Rush-Hour acho. Via gratis Wlan han ich aber schomal chöne mit mine Eltere kommuniziere ond en Ort abmache, zum ois treffe.

Mini Muetter het aber ned chöne warte ond esch drum alles durch d Immigration zrugg gschliche, nume zum mich churz umarme 🤗 bis d Security cho esch ond sie bete het, weder zrugg zgah 🤦🏼‍♀️😅.

Reunidos 👨‍👩‍👧💕

S Wiederseh nach so langer Ziit esch schön xii ond es het guet tah, weder mal es paar vertrauti Gsichter  (die wahrschenlich vertrauteste überhaupt 😅)zxeh ond mini Sprach zrede.

So hemer es Taxi gnoh zu oisem Hotel ond s ois det zerst mal echli bequem gmacht. Ah dem Tag hemer nüm viel möge mache, wel mer alli e relativ langi ond astrengendi Reis hinter ois gha hend.

Buenos Aires mitem vermeintliche „Teatro Colón“ 😅 ond zwei Touris

Am nächste Tag hemer denn die Hauptstadt zFuess bi schönstem, früehligshaftem Wetter echli erkundet. Oises Hotel Viamonte esch im „Microcenter“ glege, nöch zu vielne Sehenswürdigkeite wie em Teatro Colón (was ned das ufem Bild esch), am Obelisco, Plaza de Mayo mitem Regierigsgebäude ond vielne feine Restaurants ond Bars.

Plaza de Mayo

D Stadt esch sehr europäisch aghuucht ond mer gspürt die grossi Influenz vode Italiener ond Spanier, wo vor öpe 100 Jahr in Form vo Arbetsimmigrante nach Argentinie cho sind. D Architektur erinnered mich aber meh ah Paris, wiemer ufem untere Bild guet xeht.

Buenos Aires esch die am dichtiste besiedleti Stadt vo Argentinie. Mitere Iwohnerzahl vo meh als 16 Mio. allei ide Provinz Buenos Aires (also inklusive allne Vorort etc.), macht das fast en Drittel vode Gsamtbevölkerig us. Ond wemer sich vorstellt, dass Argentinie fast 8x so gross esch wie Dütschland, chamer sich au vorstelle, wievel unbewohnti Flächi das Land het (was zum Teil au verständlich esch, ich möcht au ned am Endi vode Welt in Ushuaia wohne bi Minustemperature ond Iis 🐧 ❄️).

Velöle 🚲 

Eimal hemer ois es Velo gmieted, zum d Hafegegend echli z erkunde. Wels am Vortag aber gregned hend, hemer ned chöne durch sones Naturreservate fahre, womer eigentlich hend wele ond sind drum gloffe.

Miami im Hintergrund 🏢 

Amene andere, verregnete Tag hemer eh klassischi Hopp-On/Hopp-Off-Tour gmacht, zum no die restliche Stadtteil kennezlerne. ZFuess wär das logischerwiis viel zwiit ond es het zwar es super Metro- ond Bussystem (mit eigener Fahrlinie), aber inen Touribus hocke ond mal de Chopf abschalte, tued au mal guet 😅 leider hend sie s Dach ned (chöne?) montiere ond so simer ziemlich nass worde 💦.

Caminito in “La Boca”

Usgstiege simer imene Stadtteil namens “La Boca” zum ide Fuessgängerzone “Caminito” entlang zschlendere. S Strässli esch voll vo farbige Hüsli, wo damals vode Immigrante bsetzt worde sind, Strassekünstler ond Souvenirshops.

Wer mich kennt weiss, dass ich alles was chlii, herzig ond bunt esch liebe ond drum han ich mich det schnell wohl gfühlt 🤗.

I verschiednige Cafes hends zum Teil de weltbekannti Tango tanzed. Mer sind denn es Ziitli lang stah bliebe, zum dem Päärli zuezluege. Am Schluss hends natürlich nach “propina” (Trinkgeld) gfragt ond wel ich die argentinische Pesos nanig so im Griff gha han, han ich ihre mit 5 Pesos en lächerliche Betrag geh. Sie het das sofort als Beleidigung ufgnoh ond mer die Note mitere arrogante Handbewegig weder zrugg geh ond stolz devo spaziert 😂 de andalusischi Stolz hend d “Porteños” (Iwohner vo Buenos Aires) bis hüt no phaltet ond ich kenne d Währig inzwüsche zum Glück echli besser 😛.

Argentinische Tango uf de Strasse vo Caminito

De Bus het ois no durch witeri Stadtteil wie San Telmo, Recoleta ond Palermo gfüehrt. Palermo esch de grössti Stadtteil ond mer het vor allem de Bereich “SoHo” gfalle mit hübsche Restaurants, Boutique ond anderne Lädeli.

Palermo Soho, Buenos Aires

Wer mit mine Eltere unterwegs esch, chunt ah keim Pflänzli verbii ohni das eh 5-minütigi Diskussion entstaht, ob jetzt das eh Fontanesia oder en Flider esch (kei Ahnig, was das esch 😂), ond so öper döf sich natürlich au kein botanische Garte entgah lah.

Bim zweite botanische Garte am gliche Tag, het mer das denn mal gnüegeled ond ich hans mer ufem Bänkli bequem gmacht, während MaPa (churz für Mama ond Papa) no de ganzi witeri Garte erkundet het.

Es gaht doch nüt über es Mittagsschlöfli 😴

Nach 4 Tag Grossstadtlebe hets ois Landeier weder echli id Natur usezoge. So hemer en Zug gnoh (Argentinie esch glaub au s einzig südamerikanische Land mit bruchbarer Zugverbindig 😅) in Richtig Tigre-Delta. D Fahrt esch öpe 1-2 Stund gange ond scho simer acho i dem bekannte Fluss-Delta. Wil grad en Fiirtag xii esch, hets au sehr viel “Porteños” gha, wo de schöni Tag als Usflugstag gnutzt hend zum echli chöne de Stadt zentflieh.

Bootsfahrt im Tigre-Delta

So hemer ois rasch es Plätzli ufem Böötli reserviert ond sind de “Rio Luján”, wo denn spöter in “Rio de la Plata” mündet ond durch Uruguay is Meer flüsst, durabgfahre. Vom Boot us hemer eh schöni Sicht uf all die Hüser gha, wo mehrheitlich als Feriewohnige diened.

De Name “Tigre”-Delta chan chli zu Missverständnis füehre: in Argentinie hend nämlich nie Tiger gwohnt, sondern nume immer Jaguare. Die sind aber irrtümlicherwiis für Tiger ghalte worde ond so het die Stadt ond das Delta de Name becho (ich mein, das mer Fontanesia ond Flider ned chan unterscheide esch no das eine, aber Tiger ond Jaguar, aso bissäguat 🤓😅).

Nachere Stund Bootsfahrt ond amene feine Zmittag esse hemer ois denn langsam aber sicher weder zrugg nach Buenos Aires gmacht.

Am nächste Tag hemer de Hauptstadt für de Moment de Rugge kehrt ond sind mitem Bus in Richtig “San Antonio de Areco” gfahre. Heti de Bus kei Panne gha uf halber Strecke, wäremer au ih öpe 2-3 Stund acho, durch die Panne esch denn s ganze bitz länger gange, wel ois en andere Bus het müesse go abhole.

San Antonio de Areco

Das “Pueblito” esch no sehr authentisch mit all sine alte Kolonialhüser ond au wenig touristisch. Ich wär zumindest ned ufd Idee cho, det zhalte, wel ich no nie vorher vo dem ghört han. Aber dank guetem Reisefüehrer chunt mer halt ebe au mal ah so Örtli ane ;-).

Det hemer 3 Nächt verbracht ond am erste Tag eifach zFuess unterwegs xii, immer uf de Suechi nacheme ATM weg oisem “Geldproblem”. Weg de immer stärker werdende Inflation in Argentinie (das heisst s Geld verlürt immer meh ah Wert), chamer ade Geldautomate au nume immer en chline Betrag ufs Mal abhebe ond zahlt dezue au no übertriebe viel Gebühre 🙄. Besser wär xii, meh US-Dollars mitzneh zum wechsle. Aber im Nachhinein esch mer immer gschiider, jetzt sinds wenigstens ihr 🤓😅.

Am zweite Tag hemer denn es “Livia-Programm” durezoge ond ich han mini Eltere chöne überrede, mit mer cho go zriite 🤗🐴. Sie sind sit de Ferie in Südfrankrich (1996 oder so?) nüme ufeme Ross gsesse ond es het drum au chli Überwindig brucht.

Los gauchos 🤠🐴

Sie sind aber guet deruuf (ond denn au weder derab) cho ond nacheme Ziitli hend sie sich au meh entspannt 😅. So simer mitem Guide losgritte durch d Pampas - die heisst tatsächlich so ond wie mer das Wort im Dütsche verwendet, so chamer sich d Landschaft au da vorstelle: hauptsächli wiiti, grüeni Felder mit es paar grasende Chüeh oder Ross ond wiit ond breit keis Huus.

So hend mer au no de Sonneuntergang ide Pampas erlebt ond es wär alles perfekt xii, wenn nume die viele Stechmuggene ned xii wäred 🦟 am Abig hemer die Stich chöne zähle, glaub d Mama het mit ihrne 50 Stich gunne 😅.

Am nächste Abig simer denn mitem Nachtbus (15 Stund 😵) witer id Wiiregion nach “Mendoza” gfahre. D Büs sind au da relativ komfortabel, durch das er aber ih jedem chline Kaff ghalte het ond Lüt weder ih- ond usgstiege sind, esch de Schlaf eher zchurz cho.

Det han ich mich mit mine zwei israelische Kollege Or & Shahar verabredet, wo au grad vom Norde her mitem Bus acho sind. Mer hend ois übers Wochenend es Air Bnb ide Stadt gmieted, während mini Eltere es schöns Hotel bitz nebedsusse gwählt hend.

Es het richtig guet tah, mini Kollege weder ztreffe ond das “Backpacker-Feeling” zrugg zha. Verstöhnd mich ned falsch - nach fast emene Jahr reise so, han ich au de Luxus ond Komfort mit mine Eltere weder sehr gschätzt. Es fühlt sich aber halt meh wie Ferie als wie Reise ah ond ich für mich selber ih dem Alter bevorzuge doch d Budget-Variante :-)

Reunidos Part II 🤓🤗

So hend mer es paar lustigi Täg zeme verbracht, zeme koched, Cambio gspielt, trunke, umespaziert ond Blödsinn gschwätzt (aaach, ich wird oich vermisse 😫🥰).

Eimal hemer au de Bus nach “Maipú” gnoh (det wo MaPa ihres Hotel gha hend) zum es Winetasting go mache. Eigentlich hetemer de Weg wele mitem Velo mache, aber die $10 sind am Shahar ztür xii (han glaub schomal erwähnt, dass er superultragünstig reist😅) ond drum simer die paar Kilometer halt zFuess gloffe bi brüetender Mittagssonne. Irgendwenn esch mer das bitz zbunt worde ond ich han zum erste Mal Autostopp gmacht (kei Angst, würdi nie alleige mache 😅). Es esch ned lang gange ond en Lkw-Fahrer het ois die nächste paar Kilometer no mitgnoh ond vorem Wiiguet useglah.

Saluuud 🍷 

Det hemer ois denn durch die verschiednige feine Wii chöne dureprobiere ond en wunderschöne Blick ufd Ande gnosse.

Shahar 🤗

Nachem erste Wiiguet simer denn zrugg torkled ond hend de nächsti Bus zrugg nach Mendoza gnoh. Am Abig hemer no fein zeme koched (argentinisches Steak 🥩 mit Risotto ond Salat) ond hend denn spöter nachli s Nachtlebe tested inere sogenannte “Biloche”, was für Disco in Argentinie staht (sie hend extrem viel eigeti Wörter im Spanisch ond mit ihrm spezielle „sch“-Akzent au gwöhnigsbedürftig :-)).

Schau nicht zu tief ins Glas 🤪

Nach dem mega tolle Weekend zdritte hets ois alli weder ih verschiednigi Richtige zoge, mich zrugg zu mine Eltere, wo sie würkli eh wunderschöns Hotel (Finca Ermitage) mit Sicht uf d Rebberge gha hend.

Mendoza 🍷🍇

Mini Eltere hend ih dere Ziit es Mietauto gmieted, mer hend ois nach dere lange Busreis entschiede, ab jetzt selber zfahre ond defür meh Stopps izlegge.

S nächste Ziel het “San Luis” gheisse ond esch öpe 3-4 Autostunde vor ois glege. Det acho het ois es rechts Labyrinth ah Strassene erwarted ond obwohl mer chli usserhalb vode Stadt xii sind ond alles recht chlii xii esch, hend mer Müeh gha, zum oisi Unterkunft (Cala Hotel Boutique) zfinde.

De Tag druf simer mitem Auto zu so Lagunene ide Nöchi gfahre ond hend die schöni Natur gnosse.

Laguna in der Nähe von San Luis

Zmittag esse hetemer eigentlich au det ade Lagune wele, aber da offiziell no Nebesaison xii esch, het au alles no zue gha. Drum hemer is nächst grössere Dörfli müesse fahre, womer denn endlich au fündig worde sind.

Parilla (oder au „asado“ gnennt)

Ufem hütige Spiiseplan esch „Parilla“ gstande, nebst em feine Wii esch Argentinie au für sies guete Fleisch bekannt. Drum han ich denkt, müemer das au mal probiert ha, aber ich muen sege, eimal het glanged 😅 (nachdem het ich glaub grad chöne Vegi werde 🥬🥕).

Binere typische „Parilla“ ghört nämlich ned nume s „guete“ Fleisch vom Tier dezue wie z.B. es Filetstuck, sondern au alles anderi mögliche wie Bluetwürst, Schweineschwänzli, Innereie ond vieli anderi Teili, womer bis zum Schluss ned ganz hend chöne entziffere (velech au besser so😅). Eigentlich ja guet, dass wemer es Tier sowieso schlachted au möglichst viel devo verwerted, da mer ide Schwiiz aber verwöhnt sind ond die wenigste so Sache essed, für ois aber au gwöhnigsbedürftig. 

Cordoba, Argentinie

Witeri 430km hend ois trennt zu oisem nächste Ziel, de Studentestadt „Cordoba“. Sie esch die zweitgrössti Stadt vo Argentinie ond vor allem bekannt für ihri vom UNESCO gschützte Kolonialbaute ond de ältiste Universität vo Argentinie (zweitältiste vo ganz Südamerika).

Det hemer au alles weder zFuess unternoh ond vor allem die autofrei „zona peatonal” im Zentrum laht zum schlendere ond verwiile ih.

Auf Entdeckungsreise gefolgt von PAPArazzi 📸 

Am nächste Tag sind mini Eltere denn no irgendsones Kloster go aluege, ich han ih dere Ziit mal weder usgschlafe (ned immer eifach, mit dem Geschnarche nebeddra 🙉😅) ond mich spöter mitem Carlos vo Sevilla troffe, wo füren Tag uf de Durchreis au in Cordoba ghalted het.

Kloster in Cordoba (won ich nume vo Bilder kenne 😛)

Ich han am Carlos d Stadt echli zeigt (das wenige, won ich bis jetzt kennt han), mer sind durch d Fuessgängerzone ond Pärks gschlenderet ond ois über die aktuellste Reiseplän ond Erlebnisse ustuuscht. Am Abig simer denn alli zeme imene libanesische Restaurant go Mezze esse, yuummy 😋.

Libanesisch essen mit Carlos (Sevilla)

Langsam hemer bemerkt, dass ois dZiit echli devo lauft (au 5 Woche chönd schnell umegah 🙈) ond hend ois drum gli uf de Weg witer nach Norde, in Richtig Tucuman, gmacht.

Det hend mer nume 1 Nacht gschlafe, zum de langi Weg nach Salta uf 2 Täg ufzteile.

Salta, Argentinie

Nacheme wiitere lange Autotag, aber mit stetigem Abwechsle vom Fahrer (Papa ond ich), hend mer denn oises Ziel für die nächste paar Täg erreicht ond ois im Hotel „Ankara Suites“ ignisted. Das het sogar en Whirlpool ond e Sauna gha, womer ois mal füren regnerische Abig reserviere lah hend ond ich han mer aschlüssend sogar no e Massage gönnt 💆🏼‍♀️.

S Städtli esch übersichtlich ond het au e schöni Altstadt. Da im Norde vo Argentinie esch de einzig Ort, wo no indigeni Stämm vorhande sind ond dadure au viel Traditione ond Brüch biphalte worde sind, wie bispielswiis de Folklore-Tanz, womer uf de Strasse hend chöne zueluege.

Folklore Tanz in Salta, Argentinie

Bi dem Tanz gahts hauptsächlich drum, wie de Maa versuecht d Frau z erobere ond z bezirze, aber ohni grosse Körperkontakt sondern meh durch Usdruck ond Spielerei.

Zum zueluege uf jede Fall unterhaltsam ond schön 💃🏼🕺🏽.

Au am Papa sini “Streetfotografie” esch ned zchurz cho 😅

Die nächste zwei Täg hemer es recht straffs Programm gha, wel mer jewils en Ganztagesusflug mitere gfüehrte Tour unternoh hend (mer hend zwar s Mietauto no gha, aber die lange Streckene sind recht ermüedend 🙈😅).

Am erste Tag simer am Morge am halbi 8i mitem Bus vor oisem Hotel abgholt worde ond witer in Richtig Norde, nach Jujuy, gfahre. Det hemer zwüscheddure es paar WC ond Souvenirstops gmacht, bis mer denn im Dorf „Purmarca“ mit de bekannte Rainbowmountains (analog Peru) füren längere Stop ghalted hend.

Mer hend Ziit gha zum paar Föteli mache ond au det hets ufem Hauptplatz weder viel Souvenirshops mit Artesanía gha (de Verkauf esch definitiv im Vordergrund gstande 😛).

Rainbowmountains in Purmarca

Souvenirshops soweit das Auge reicht 😅

Wiiter het ois die Reis denn no zum eigentliche Ziel, id „Quebrada de Huamahuaca“ gfüehrt. Das esch eh Schlucht, wo in San Salvador de Jujuy afangt ond sich über 150km bis zum Dorf Huamahuaca erstreckt. Die Schlucht esch ebefalls umgeh vo vielne karge, aber verschiede farbige Felse ond au vielne Kaktee.

Quebrada de Humahuaca

Mer hend denn au no ih sonen botanische Garte (der Dritte 😅) chöne ine ond die verschiedene Pflanze, Chrüter ond Kaktee beguetachte.

Z oberst obe vo dem botanische Garte hets no sone abgschnitteni Pyramide us de präkolumbianische Ziit gha sowie wiiteri Ruine-Teili.

“Almost one year ago I started my adventure to Central- and Southamerica. Quit my job, booked my one-way ticket, packed my bags. A dream that finally came true.

First stop was Costa Rica, where I took some spanish lessons to get along during my journey. After the first and only planned month, I was ready for the unknown and just let myself go, let myself flow - wherever life may take me.

At the beginning it felt a little weird not knowing where to wake up on the next day, but after a (short ;-) while I got used to this lifestyle and started enjoying this pure kind of freedom. Not only the freedom of being where you want to be, also the freedom of being who you want to be.

I climbed volcanoes, mountains and hills. I swam in lakes, rivers and seas. I walked through deserts, vineyards and rainforests. I saw turtles, sloths and alpacas. I tried to surf, dance salsa and ride horses. I took way too many (night)buses, some boats and a few flights. But what are all these experiences, if you can’t share them?

I am so thankful for all those beautiful souls I met from all over the world, you made it such an incredible and unforgettable trip 🥰. It‘s impossible, to mention everybody in person here, but when you are reading this, you know I was thinking of you ☺️. Thank you, for having created memories with me! ❤️

People keep asking me, if it isn‘t too dangerous for a (blond - if my hair color even matters ;-) woman traveling all alone through Southamerica. Yes, it definitely might be - but probably the „biggest danger“ is to fall in love with all those beautiful places and amazing people, so you never ever want to leave 🌎💙. And some parts of you may even stay forever.”

Ganz beende möcht ich de Blog no mit dem Zitat. Ich hoffe, dass ihr mini Blogs unterhaltsam gfunde hend, velech sogar öpis Nois debii glernt hend (z.B. wo all die Länder überhaupt so ligged, gell Nädle ond Tschöx 😛🥰) ond velech au chli Inspiration für oichi nächsti Reis drin gfunde hend. Für mich esches uh schön xii, mini Reis so bitzeli mit oich han chöne teilt zha ond für mich natürlich au eh sosch eh super Erinnerig. Ich froi mich jetzt scho, oich persönlich no meh zverzele 🤗 gligli heissts: ¡hola Suiza❤️