Potosí - Mine

Potosí

Jo das mit dene Büs in Bolivie isch so e Sach. Lüt wo ade Stross stönd und ume schreiet als gäbs keis Morn meh wennd dir do s Ticket verchaufe. Jo mir sind den dere Stimm 'Potoooooooosiiii' gfolgt und hend es Billet für 2 Franke glöst. Mir sind abgfahre und es isch ca 4 h gange bis mir in Potosí acho sind. Es het gschätzti 5 hunderttusig Kurve gha. Es isch en grausam lange Tag für eus gsi. S Taxi het eus den am 24.00 am Hostel usglade. Dete glütet isch en alte Ma cho go Türe ufmache. Er het uf Spanisch gfluechet 'nie cha me schlofe, immer mues me ufstoh für die .......Reisende'. Mir sind is Zimmer ie, ane glege und bim ane ligge sind eus d Auge scho zuegheit. Am Morge hend mir den die Mine-Tour buechet. Unteranderem hend mir eus d Wartezit mit dem herzige Büsi vertriebe.

De Guide het eus abgholt und mir sind zum Bus gloffe. Mir sind den zume Innehof gfahre wo mir eus usgrüstet hend mit Stiefel, Overall, Helm & Taschelampe. Weret em umzieh isch immer en wahnsinnige chline Hund cho und het mit beidne Vorderpfote eim ahgumpet das mer fast umgheit isch.

Fertig usgrüstet sind mir denn richtig Mine gfahre. Uf em Weg hend mir jedoch no Halt gmacht bim 'Minemarkt'. Jede vo eus het ame Arbeiter müese es Gschänkli bringe. Kokablätter, Soft-Drinks, 98% Alkohol (was mir spöter au no selber hend müese trinke) oder TNT, Sprengstoff wo sie d Löcher id Wänd sprenget. Mir sind den bim Igang acho und hend scho ghört wie die Wägeli uf de Gleis rollet.

Mir sind den vor de Igang anegstande und hend gwartet bis mir ie hend chöne. Vorzue sind Arbeiter cho und de Guide het sie begrüesst. Unteranderem en 17 Jöhrige wo fürd Familie mues schaffe well de Vater ide Mine gstorbe isch. Die verschiedene Gschichte sind tüüf under d Hut. Die Meiste wo i dere Mine schaffet hend e Lebenserwartig vo 45 - 55 Johre.

Mir hend denn ine chöne und d Muriel isch churzerhand i sones Wägeli ghocket und Arbeiter hend sie lachend ie gstosse.

Me mues sege, die meiste Arbeiter hend sehr viel Humor. Alli hend immer blödi Spüch gruefe bim dure laufe und hend eus fründlich begrüesst. Ab und zue het denn euse Guide eusi Gschänkli verteilt.

Mir sind den id Mine ie und schnell isch fertig lustig gsi. Me het grausam müese ufpasse, es het nur 1 Schiene gha und det sinds entweder mit eim Karacho durab z schüsse cho, mit em 2 Tonne schwere Wage (d Mienearbeiter sind hine druf gstande und hend gschraue 'Vorsicht').

Die wo mit em lehre Wage wieder richtig Miene sind hend innert Sekunde müese de Wage ab de Schiene grisse das de ander vollbeladeni Wage au Platz het. Mir sind denn immer witer ie, immer wieder hetz gheisse 'alli sofort rechts ad Wand' und ca 5 Sekunde spöter isch wieder en vollbeladene Wage dure grast. Es isch stockdunkel gsi, einzig die Lampe uf em Helm het es biiiiizeli Liecht geh. Mir sind den ine Sackgass grote. Det hend mir 2 Arbeiter begrüesst. Am einte het de Teil vo de Miene ghört und de ander isch de Arbeiter vo ihm gsi. Mir hend ihm den s TNT gschänkt. Kurzerhand het er eus gfroget ob mir wend debi si bi de Sprengig. Mir sind mit ihm en Schutt und Staubhufe duruf kletteret und hend ihm gholfe s Loch bohre und s TNT dri zstopfe.

Ein vo eusere Gruppe het den au dörfe azünde. Mir sind alli ca 20 Meter weg gloffe und hend gwartet. Ufsmol ghöret mir de Dütschi renne als ob de Tüfel hinder ihm no wär. Euse Guide het ihm den erklärt das es na 2 Min goht bis es sprengt. Mir hend gwartet & gwartet & nomol gwartet. Ufsmol isch eh rieeeeese Druckwelle über de Körper verbizoge und es het en riese Klapf geh. Echt idrücklich. Mir hend den all es chlises Silbersteindli becho.

Mir sind witergloffe und sind ame Ort ahcho wo e Art vo Bettstätte isch. Mir hend en riesige Tüfel mit grosse Hörner gseh.

Sie hend eus erklärt das de Gott i de Mine de Tüfel isch, er hilft ihne. Mir hend en grosse, alte und würklich dreckige Plastikkanister ide Mitti gseh. Det ine isch de 96% Alkohol gsi.

Er het eus den gseit das jetzt jede vo eus es Gläsli voll mues neh, 3 x en chline Schluck uf de Bode müend lehre und jedesmol en Wunsch fürd Mienearbeiter sege. Zum Bispiel : für Muetter Erde, kei Unfäll und ganz viel Silber. De Reste wos no im Gläsli gha het hend mir müese Trinke. Es het eus fast putzt. Leck isch da stark gsi. Ich ha s Muhl offe loh und en Teil isch gad verdunschtet. Es isch wie Aceton gsi. Ich wür sege mir Schwizer putzet dreckigi Motoreteili demit. Pfuiii... aber es isch jo für en guete Zweck. Jo mir sind nochli umegirrt, hend zum Teil gholfe de Charre stosse.

Irgendwen hend mir den au wieder s Tagesliecht gseh und mir sind echt froh gsi.

Mir sind den wieder zruck go Kleider abgeh und denoch zruck is Hostel.

Det sind mir mit em Taxi an Bus Terminal gfahre. Mir hend s erste Bus Unternehme gno wo am lütiste 'Sucreeeee' usegschraue het. Meh im nöchste Blog.

Next Stop: Sucre, Hauptstadt vo Bolive

Bis bald

Ernesto Y Muriel