Nach ungefähr 1ere Stund ab San Juan del Sur mitem Taxi, hemer de Hafe vo San Jorge erreicht. Det hemer ois es Ticket fürd Fähre ufd Isla de Ometepe für umgrechnet CHF 1.50 kauft (¡Viva Nicaragua!) 🤗
Durch de ständig Wind ond die viele Welle esches aber ziemlich eh astrengendi Fahrt xii ond mer sind froh xii, wo de Volcàn Concepción immer nöcher cho esch. Sobald mer an Land acho sind, simer vo gfühlte tuusig Taxifahrer umzingled worde. Zum Glück hemer aber oises Hostel Cocos gad ide Hafestadt Moyogalpa buecht ond hend drum zFuess chöne laufe.
Nachdem mer s Städtli bitz erkundet hend, hemer es Tuk-Tuk zum Punta Jesús Maria gnoh. Irgendwie erinnereds mich da chli ah Asie, de Gruch, d Hitz, d Lüt ond natürlich die viele Tuk-Tuks.
De Tag hemer miteme wunderschöne Sonneuntergang usklinge lah (can‘t get enough 😍).
Am nächste Tag hemef ois es Taxi füren Tag gmietet (CHF 70.00) ond er het ois ah verschiednigi Ort uf de Insle gfahre. Zerst simer zum „Ojo de agua“ gfahre, sonen natürliche Pool mit Wasser vomene Fluss. Wel mer gnueg früeh det xii sind, hets zum Glück nanig so viel Lüt gha (defür umso meh Mugge 🙈). Nachher heter ois zum Playa Santo Domingo bracht, aber s Wort „Playa“ esch da bitz übertriebe ;-) es esch eigentlich eifach en Streife Sand (öpe 2 Meter breit) bim Lago de Nicaragua. Zum Schluss heter ois zum Naturschutzgebiet „Charco verde“ bracht, das esch würkli wunderschön xii. Es het sonen abgsperrte Bereich mit ganz viel verschiednige Schmetterling ond Blueme gha. Nachher simer nachli dur de Park spaziert ond hend mega Glück gha ond e ganzi Familie Äffli im Baum obe entdeckt. Mer hend dene sicher öpe e Halbstund bim esse ond spiele zuegluegt. Denn heter ois au no imene andere Dörfli (Altagracia) useglah, aber s einzig Spezielle, esch de Spielplatz für Chinder xii ;-) Am nächste Tag hemer namal e Tour gmacht ond zwar zerst zum „Cascada de San Ramon“. De Taxifahrer het ois bi dem Tor uselah ond 3h uf ois gwarted. D Wanderig esch nämlich über Stock ond Stein je 1.5h gange. Leider hets ziemlich bald voll agfange regne ond mer sind pflotschnass worde. Regeschutz hemer natürlich vergesse 😅 aber zum Glück sind die tropische Regegüss immer sehr churz ond scho bald het d Sonne weder gschine ond es esch chli agnehmer worde zum laufe bzw klettere. Endlich dobe acho het ois en riiiesige Wasserfall erwartet, die ganze Astrengige hend sich also glohnt. Nachdem mer wieder dunde acho sind, het ois de Guide zume Kayak-Strand gfahre. Zerst hemer ois aber es feins Zmittag ond es chlises Päuseli gönnt. Sobald mer fertig gesse hend, het ois au scho de nächsti Guide mitem Kayak empfange. Nachdem mer jetzt 3h lang oisi Bei trainiert hend, sind jetzt natürlich au no oisi Ärm dra cho ;-) Mer hend eimal de halb See überquert ond nachher ih sones schmals Flüssli abboge. Da esch recht schwierig xii zum koordiniert, gmeinsam paddle, wels ned sehr breit xii esch ond überall Seerose ond anderi Pflanze ond Stei gha het. Ufem Weg hemer vel verschiednigi Vögel atroffe ond sogar au no eh chlini Schildkrot entdeckt 🐢. Zwei Stund spöter simer denn weder ah dem Punkt acho, womer ursprünglich is Kayak igstiege sind.Obwohl mer jetzt so ziemlich jedes Körperteil wehtuet ond morn de Muskelkater wahrschenlich na viel schlimmer wird, het sich de Usflug glohnt. Leider han ichs ned uf de Vulkan gschafft (has aber au gar ned erst probiert, da mer zvel Lüt devo abgrated hend), aber immerhin han ich ihn ufem Spielplatz in Altagracia bestiege 👏🏻🙃
