🦋 Quito 🦋

Hiä in Quito isches de umä gad chle früscher gsi uf 2850 m ü.M. aus uf dä Galapagos... 🙃

Mir si de mau chli dür ds härzigä Autstedtli umä gflaniert. Dert hets viu farbägi u guäterhauteni Koloniaugeböide gha. 😍 Mir si de no ids Museum für präkolombianischi Kunst „Casa del Alabado“ gangä. Dert hets ganz viu schöni u lustägi Figurä vo dä Urihwohner vo Equador gha. Figurä vo Mönschä, Tier u oh schön verzierti Schalänä heimr gseh. 🍶

Was mir bsunders gfauä het isch ä Figur gsi wo Lüt zämä im Kreis stöh 👫👫👫 Das het glich usgseh wiä das wo mis Grosi säuber töpferet het u bi ihnä Deheimä steit. Ha de ah mini liäbä Grosseuterä müässä dänkä u was si äch gad machä... ❤️

Uf ärä zwöistündägi Bösfahrt simr de nach Otavalo ufä grösst Märit in Südamerika gfahrä. 🚌 Ih denä 2 Stung isch aubot umä öpper ihgstigä, het de irgendöppis wöuä verchoufä u isch när umä gleitig wieder usgstigä... jensti Sachä si ahbottä wordä. 🙈😄

Dert ufm Märit ahcho isch de aues ih dä Gassä oder uf ämä Platz ufgsteut u verchouft wordä. Ungloublech was diä da aues verchoufä... 🥩🧀🥑🍍🎸🎨📱⌚️📺🔧👠👓🎒🌂🤔🙈🙃

Bim nächstä Usflug nach Mindo heimr leider dr Bös gad knapp verpasst. 🙄 Einä vo däm Bösungernämä het de gseit mir söuä da ds Taxi nä u dr Bös mitm Taxi ihholä. 🙃 Är funkt de am Chauffeur är söu de bir nächstä Hautsteu chle lenger wartä. Da dä Bös dr letscht vom morge isch gsi, heimr gseit de machä mir üs doch mitm Taxi ufd Vervougigsjagdt... 🚕💨🙈😅 Mir si ids Taxi gsprungä u dr Fahrer isch däm Bös hingernachä bis mir nä ihghout hei. 🚌 🚕💨🙈 Dr Bös het de tatsächlech ahghaute u mir hei chönnä inägumpä. Uff doch no gschafft. 😅 Nach zwöi Stung simr de im härzigä Mindo ahcho. Dert simr inä Schmätterling-Gartä gangä. 🦋😍 Si hei üs ganz viu intressants über diä Tierli verzeut u zeigt wi viu verschidnigi Arte vo Verpuppigä si dert hei. Äs isch eifach scho äs chlises Wunder wiäs us so ärä Roupä ä wunderschönä Schmätterling git... 🐛🦋❤️

Mir hei ganz viu farbägi, chlini u grossi Schmätterlingä gseh wo so schwärelos u verspiut umägflogä gsi. 🦋🦋 Für mi öppis vom schönstä das ds gseh... 😍

Mängisch chunts im Läbä angers aus mäs gärn wet... 😔

Leider hani schwärenhärzens müässä erfahrä, dass mi Grossvater amä Härzinfarkt gstorbä isch. 😢

Ä wunderbarä u naturverbundenä Mönsch woni töif ih mim Härzä wirdä bhautä het üs leider verlah. 😢

Isch gad nid eifach wemä uf dr angerä Sitä vor Wäut isch... 🌎

Bi froh hani mi Fründ wo für mi da isch ih derä nid eifachä Zyt... 💞

Mim aueriliäbstä Grosi schickä ig us töifstem ❤️ ganz viu Liäbi, Chraft, Haut u Trost. Dänkä fest ah di... 💕