So, weder mal Ziit füren noie Blog-Itrag :-) nehmed doch Platz ufem Bänkli.
Wien ich bereits ih mim “Bienvenidos a Costa Rica”-Blog erwähnt han, sind mich jetzt im März mini Eltere 2 Woche go bsueche cho. Ferie während minere Reis sozsege 🙃
Am 6. März sind sie am Abig spat mit de Edelweiss glandet ond hend det grad s Mietauto übernah (en 4x4, de esch empfehlenswert in Costa Rica, wel ned alli Strasse so guet usbaut sind). Ich han ide Zwüscheziit scho im “Hotel Balmoral” (wow, sit langem weder mal es Hotel statt Hostel - het sich wie im Paradies agfühlt) in San José uf sie gwartet.
Sobald sie nach langem Sueche endlich im Hotel acho sind (in San José zfahre macht ned so Spass, viel Verkehr, viel Gehupe, viel Einbahnstrasse), simer nume na churz is nächstbeste Restaurant öpis chlises go esse.
How to make “tico-coffee”
Am nächste Tag esch denn scho s Programm losgange: wer mich kennt, weiss ich liebe Ferie zplane. Wie de berüehmti Schedule vorher-nachher usxeht, xehnder ufem untere Bild ;-)
Schedule 🤓 vorher - nachher
Am erste Tag simer also chli d Stadt San José go erkunde. Es esch aber ned würkli sone sehenswerti Stadt (wie so einigi Hauptstädt in Zentral-/Südamerika). Es het ei verkehrsfrei, schöneri Touristestrass mit es paar Lädeli ond chline Pärk ond am Endi au no en chline Markt. Aber das wärs denn eigentlich au scho ;-)
Drum simer am Namitag denn au uf “Cartago” gfahre, öpe 30-45 Minute vo San José. Det hets doch na einigi schöneri Chilene ond Pärkli.
Am nächste Tag simer am Morge früeh mitem Auto los zum Vulkan Irazú, mit 3432m de höchsti vo ganz Costa Rica. Zum Glück chamer alles mitem Auto ufefahre, nach minere Vulkan-Erfahrig in Guatemala han ich ned grad so Lust gha, weder sone Mordswanderig zmache ond han au Schiss gha, das ich weder höhechrank chönt werde (was zum Glück das mal ned de Fall xii esch 😅).
Volcán Irazu
On top of Irazú
Es lohnt sich uf jede Fall, möglichst früeh am Morge scho det zsii (am 8i gaht de Park uf - übrigens am 30. Juli 1955 gründet worde, am gliche Tag, wie min Vater Geburtstag het 🎈), wel de Tag dur meh Wolke chömed ond mer denn nüm so schön in Kratersee abexeht. Ond warmi Chleider mitbringe - det obe chans recht frisch werde.
Ufem Rückweg simer denn no durchs “Valle de Orosi” gfahre, e wunderbari Fahrt durch Natur ond chlineri Dörfli im Tal.
...ufem Weg...
Valle de Orosí
Die Chile (Iglesia de San Jose de Orosi) esch die ältisti Chile im Land, wo na in Gebruch esch.
Ungefähr 15km weg vo Orosi simer denn no d “Ruine vo Ujarras” go bsueche, die ältisti Chile (nüm in Gebruch), wo 1693 baut worde esch.
Ruinas de Ujarras Am nächste Tag esch denn oisi Reis wiitergange Richtig Karibikküste, gnauer gseit nach “Cahuita”. Obwohl d Distanze relativ churz sind (Costa Rica esch öpe glich gross wie d Schwiiz), muemer für so Fahrte viel meh Ziit iberechne, als mer ide Schwiiz würd. D Strasse sind eifach ned im gliche Zuestand (obwohl d Hauptstrassene recht guet sind, find ich), mer chan ned glich schnell fahre, wels oft kei Autobahn esch ond es het au sehr viel Lastwäge unterwegs, vo de Verkehr au verlangsamed. Nach einige Stunde Fahrt simer denn ah oisem Ziel in “Cahuita” acho. Leider het ois ned s erwünschte karibische Wetter erwartet, sondern es het us Chübel gregnet. Ade Karibikküste esch das aber kei Selteheit, es het praktisch de ganz Januar duregregned. Sie sind oft betroffe vo Stürm wo vom Golf vo Mexiko herchömed. Mer hend ois aber ned abezieh lah ond sind glich au chli an Strand - wenn au mit Rege- statt Sonneschirm ;-) Fluch der Karibik ☔️ Am nächste Tag esches denn scho früeh weder losgange in Richtig “Tortuguero Nationalpark”. De befindet sich ganz im Norde ade Grenze zu Nicaragua ade karibischi Küste ond esch nume per Boot erreichbar. Drum hemer oises Auto am überwachte Hafe vo Moín abgstellt ond is Boot gwechslet. Ufem Weg in Tortuguero-Nationalpark D Fahrt mitem Speedboat duured 3-4 Stunde ond leider hets immer no gregned. Aber zum Glück het mer uf de Siite chöne so Plastikdinger abeklappe, damit mer ned ganz so nass worde sind. Dur das het mer leider aber nüm so viel xeh, wel scho unterwegs chamer mega viel Tierli entdecke. Papa, de Starfotograf (ond Model🤗) Womer nachere lange, mit de Ziit unbequeme Fahrt denn endlich im Park acho sind, het oid det d Barbara Hartung (aka Öko-Bärbel ;-)) am Hafe abgholt. Sie esch oisi dütschsprechendi Reiseleiterin xii ond ich han alles über sie bueched. Chan sie als Reiseleiterin wärmstens empfehle, sie wohnt scho sit 23 Jahr in Tortuguero ond het Biologie gstudiert ond durch das es extrem grosses Wüsse über Natur ond Tier. Tortuga 🐢 am sünnele Am nächste Tag hemer am Morge e Kayak-Tour mit de Bärbel durch die verschlänglete Kanäl vom Park gmacht. Mer hend Glück gha ond d Sonne het sich vo ihrere beste Siite zeigt ond mer hend mega viel Tier chöne xeh. Vo vielne verschiednige Vögel, über Äffli, Schildkrote zu Kaimane. Kaiman 🐊 Nachem grosse Zmorge hemer ois denn no ufe 2-3 Stündigi Wanderig z Fuess mit de Bärbel gmacht. Det hemer au weder viel Tierli xeh, unter anderem es Fuultier, was mis absolute Highlight xii esch 🤗Ufem Heiweg hemer denn au no es paar Aras ufem Mandelbaum xeh. Leider gits nüm viel vo dene schöne Vögel, wel viel Mandelbäum (ihres Hauptnahrigsmittel) abgholzt worde sind ond au gwüssi Lüt s Gfühl hend, sie müend sie als Huustier halte. Ara - insgesamt gits nume no 300 Aras in ganz Costa Rica Nach dem intensive, aber interessante ond wunderschöne Tag hemer die restlichi Ziit meh gmüetlich am Strand oder im Dörfl vo Tortuguero verbracht. Es git nume ein einzige ATM uf Tortuguero ond det chamer nume en gwüsse Betrag uselah, es lohnt sich also, scho chli Bargeld mitzbringe. Sonneuntergang währendem Znacht am gnüsse Nach zwei Nächt simer denn weder zrugg ufs Festland ond hend det ufem Weg nach La Fortuna na en Zwüschehalt imene wunderschöne Naturresort gmacht zum echli usruehe vo dem viele umereise.Am nächste Tag esch denn wiitergange nach “La Fortuna” ond zum Vulkan Areal. La Fortuna Vulkan Arenal - leider immer chli mit Nebel bedeckt Det hemer zum Glück 3 Nächt bueched imene Hotel mit eigene heisse Quelle vom Vulkan. So hemer ois echli chöne erhole ond hend vor allem chlineri Tagesusflüg zum See oder zumene Wasserfall unternah. Happy Birthday to me! - Wasserfall La Fortuna Am 15. März bin ich au es Jöhrli älter worde ond ich han de Tag sehr gnosse mit mine Eltere (wien ich aber praktisch jede Tag da gnüsse 🤗). Mer hend ois nach de churze Wanderig zum Wasserfall no e Massage gönnt ond zum Schluss echli ide heisse Quelle de Tag usklinge lah - sehr ruhig ond entspannt also, wie sich das i dem Alter ghört ;-) Heissi Quelle vom Vulkan Arenal i oisem Hotel - bis zu 40 Grad! Oise letzti Stop esch de “Manuel Antonion Park” ade Pazifikküste chli meh im Süde xii. Für das hemer namal fast en Tag Fahrt müesse uf ois neh ond ich han mich recht jetlagged gfühlt nachher, als het ich en 12-Stunde-Flug hinter mer ;-) Mama - back to the roots 🐂 Trotzdem eschs die Fahrt wert xii, mer hend es wunderschöns Hotel (Tabulia Tree, öpe 6km weg vom Park) gha ond ois det superwohl gfühlt ond chöne erhole. Am nächste Tag simer denn in Park gange ond hend würkli de ganz Tag det verbracht. Es het soviel zum entdecke geh ond am Mittag simer eifach chli in Schatte an Strand glege (d Hitz esch extrem xii ond sogar am Schatte esches nume na gloffe 😅).Da no es paar Idrück vo dem Tag: Playa Manuel Antonio Ameisebär (glaub ich zumindest ;-)) - hard to catch Catwalk :-) Frechi Äffli Bi dene Äffli het mer würkli mega guet müesse ufpasse, vor allem, wemer irgendöpis Zesse debii gha het. Die sind schneller ond flinker als mer denkt ond mer hend chöne beobachte, wie die einte oder andere Chips klaut worde sind (obwohl die eigentlich gar ned erlaubt xii wäred zum in Park zneh). Playa Gemelas In Costa Rica staht fast en Viertel vom Land unter Naturschutz ond vo dem won ich xeh han würd ich behaupte, sie hend begriffe, wiemer uf sini Natur luege söt. Sie nutzed das au gschickt für de Tourismus ond es git meh Öko-Lodges als sosch irgendwo. Uf jede Fall es Vorbild für so einigi anderi Länder :-) Manuel Antonio Nationalpark Mer chan würkli guet en ganze Tag (oder sogar meh) i dem Park verbringe. Es het gut usbauti Wanderwege wo zu de Stränd oder in Dschungel füehred. Mer hend ois natürlich gad eine vode hertiste usgsuecht ond sind e gfühlti Stund (oder meh?) bi öpe 35 Grad zu somene Ussichtspunkt gloffe. Völlig kaputt ond verschwitzt... ...aber d Ussicht esches wert xii 🤗 Am nächste Tag hemer ois denn eifach no es schöns Strandplätzli gsuecht ond d Ferie nachli usklinge lah (für mini Eltere zumindest 🙈). !Viva la playa! Am Tag druf simer denn zrugg nach San José gfahre, zum namal e Nacht det zschlafe, bevors denn für mini Eltere weder zrugg id Schwiiz gange esch. Ich han es Uber zum Busterminal gnoh, mini nächsti Station esch “Puerto Viejo” ade Karibikküste ade Grenze zu Panama xii. S Busticket han ich en Tag vorher telefonisch reserviert, wel da sind vel Büs mit Sitznummere ond Reservation. Leider nimmt die Gschicht ned sones Happy-End, wel won ich usem Uber usgstiege bin, het mich sofort en Taxifahrer aghaue, das ich da am falsche Busterminal für nach Puerto Viejo sig (es git würkli sehr viel verschiednigi Busterminal det). Denn het er mir vorgschlage, dass er mich mitem Taxi aber chöni anefahre, es sig ned wiit. Gesagt - getan, wel es esch es offiziells rots Taxi mit Taxometer xii. Womer chli gfahre sind, het er mich gfragt, bi welem Busabieter ich denn reserviert han ond het dene aglüted, ob sie mini Reservation becho hend. Er het mer au s Telefon id Hand druckt ond die hend mer bestätigt, dass sie kei Reservation vo mer becho hend ond alli Büs nach Puerto Viejo usbuecht sind für hüt (fake-call, wie sich spöter usegstellt het). Aber ich han müesse det ane, wel ich scho es Hostel buecht han. Denn het mer vorgschlage, mich i die nächst Stadt (Guapíles, 44km vo San José) zfahre. Det fahred anschinend viel meh Büs ond es sig nume 30 Minute mitem Auto. Schlussendlich hets aber fast 2 Stunde duured wegem Verkehr, de Taxometer esch immer gloffe. Det acho heter umgrechnet $300 vo mer verlangt!!😡 Ich bin so hässig worde, wel ich gwüsst han, das chan ned stimme. De Taxometer het aber au das azeigt, er het de vermuetlich chöne manipuliere. Er het ned mit sich diskutiere lah ond schlussendlich esch mer nüt anders übrig bliebe, de horrendi Betrag z zahle. Ich han grad öpe soviel Bargeld mit mer gha, wel ich s Hostel au het söle bar zahle.Völlig verwirrt ond hässig het er mich denn ah irgendere Bushaltestell i dem Kaff useglah ond gmeint, es chömed immer weder Büs. Zum Glück hets det paar netti Iheimische gha (au die gits ond zwar viel meh als die andere :-)) ond ich han ihne verzelt, was grad passiert esch. Leider han ich mer d Autonummere ned gmerkt, sosch het ich velech im Nachhinein na öpis chöne geg de @#%^!! unterneh. Aber im Nachhinein esch mer immer schlauer. Uf jede Fall het de Typ mer denn gholfe uf de nächst Bus nach Puerto Viejo für $10 zcho ond ich bin eifach nume froh xii, im Hostel azcho zum de Schock z verdaue. Es esch sehr ärgerlich, wenn eim so öpis passiert ond er het mer mit dem Geld öpe 1 Woche vo minere Reis klaut. Aber schlussendlich lernt mer immer öpis drus ond s einzig Positive, won ich us dem chan mache, esch die Gschicht möglichst vielne Lüt zverzele, damit ihne das hoffentlich ned au passiert. I dem Sinn: pura vida & hasta luego 🌴☀️
