bye canada - hello usa

... and do mäudimi us dr usa. wärs gloubt oder nid, ohni problem und ohni vüu froge bini über d'gränze cho;)

aber zersch hani no die bereits erwähnti wuche bi sommers in edmonton gnosse. wär ouso gärn no lenger bine blibe, d'jungs hättes gloubs ou kuul gfunge, aber i wott ne nid no lenger es zimmer blockiere und s'immer no schöne herbstwätter isch äbe ou für mini witerreis kuul. danke sommers!

aues nomou früsch gwäsche und mitemne voue tank machi mi de ufe wäg richtig süde. churz vor dr gränze bsuechi dr waterton np (churz für nationalpark) und gniesse e troumhafte tag, so warm dasi obenohne hike. fridlechs dorf und triffe e grossfamilie mit 11 ching! mi schlofplatz isch unbeschrieblech rueig & schön.

witer abe chumi de äbe id usa, genauer gseit nach montana. d'natur geit ähnlech witer wie im süde vo alberta, geniau die strosse umgäh vo ändlose fäuder und d'rockies im horizont. ume glacier np (bini nid ine, wöu s'meiste scho gsperrt isch) isch 'blackfeet' gebiet (mit de 'sioux' eine vode grösschte indianer stämm gsi) und nachemne mehrstündige ufenthaut imne museum und guet 80min gspröch mitemne 'blackfeet' isches de nomou chli spannender dür das gebiet z'fahre.

nach choteau isch de s'wätter gad chli schlechter für 2 täg und drum bsuechi witeri museen und kombiniere mi duschstop mitemne swimtraining in helena. s 'old prison museum' in deer lodge zeigt die dunkli site vode westernzite in montana und git mer dr army rabatt. eich hani jo meh e witz gmacht woni gseit ha 'i was in the army in my country' , aber si meint druf 'i guess that counts'. butte isch bekannt für mine und drum wedi eich e tour ine erzmine mache (1,6km dr tüfscht stoue), leider isch halloween weekend und drum blibt mer im 'world museum of mining' nur d horrortour übrig - die isch de leider nid wük gruslig aber immerhin bini im stoue unge gsi. ungloublech wiesi do ide staate überau düredräihe ab däm halloween, 4 täg nur halloween special.

es gseht wieder chli fründlecher us am himmu und drum fahri über bozeman i yellowstone np, bundesstaat wyoming. bekannt für die vile geysire, bison und natürlech d'landschaft. meh derzue ir gallerie. witer düre grand teton np bini jetzt in jackson woni s'schlächte wätter imne recreation center (gym/swim/spa/shower) und ir library gniesse.

es geitmer jo prächtig und i dörf definitiv nid chlage, aber enttüscht bini ouso scho chli. sit 4 mönet machi hikes wos immer bäre gfährdet isch, i loufe äxtra dört wo niemer angers louft und nime absichtlech kei bärespray mit (ha dänkt dasch wie bim schirm, wenn eine derbi hesch chunnts nid cho räge), aber nei i ha immer no kei bär vore distanz gseh asi mou hätt chönne es foti mache!

no churz zum d'frog beantworte woni eich häre go; i bi ufem wäg richtig carlsbad in california, dört goni d'öutere vonere kollegin (amerikanerin wo in bärn uf dr botschaft het gschaffet undi amne louf ha könneglert) go bsueche und si erwarte mi ufe 22. nov - thanksgiving traditionell mit truthahn :) ufem wäg dört häre machi vermuetlech je nach wätter stopps i verschidnige np wie z.b. bryce canyon, zion und joshua tree.

..mis läbe isch wük toll und i bi jede tag dankbar derfür! morn fahri witer, wot nid s'gliche erläbe wie dir heit momentan;) brrrr winter..

sry si chli vüu fotis dasmou.