Հրատարակվել է: 30.09.2018
Mir hend in Kuba jo eigentlich nid gnau gwüsst wo ane und wie det ane cho. Das ganze uf Grund wills eifach unmöglich isch zum was genau plane in Kuba. Mir hend ja au nid gwüsst, dass me würklich so eifach mit dene "Taxi colectivo" reise chan. Mir hend denn das ganze chli mit Hilf vo eusem Gastvater planet. Mega viel Zit isch eus ja nid blibe, guet 12 Täg. Uf eusem Plan isch na Playa Laraga, Cinfuegos, Trinidad, Varadero und zum Schluss natürlich namal Havanna gstande.
Am Morge früeh hends eus wieder abgholt und mir sind witer richtig Playa Larga. Es isch immer wieder cool mit de anderne Reisende im "Taxi" z rede. De Meiste hets jedoch abglöscht wo mir verzellt hend, dass mir sit 7 Mönet underwegs sind, verständlich, wennd nur 10 Tag Ferie hesch :-P. In Playa Larga acho ischs jedoch nid gad so gsi wies eus de Gastvater beschriebe het. Es paar Beton-Blöck-Hüsli. Het chli usgseh wie die Monopoly Hüser. Aber anschienend hets en schöne Strand. Gastfamilie isch wiedermol super gsi und sie het eus natürlich als ersts wölle Mäste. Nei danke du, nid bevor mir an Strand gönd und mir eusi Astral Körper müend zeige. Mir hend eus denn schnell uf de Weg richtig Strand gmacht. Wie immer hend die Iheimische us irgend welchne Gründ frei gha und irgendöppis grosses am Strand gfiiret. Ja, sie fahret mit Pick-up und Ahänger an Strand. Sie ladet denn massivi Holztisch und Stüehl ab (Ja kein Witz), Stereo Alage und ganzi Grills. Dezue karibischi Musig und viel Rum. De Strand isch echt schön gsi, aber isch glaubs au schwierig zum en grusige Strand z finde in Kuba.
Am Abig hend mir es super Nachtesse becho. D Muriel feins Fleisch und ich han frische Lobster direkt vom Meer becho.
Aber es het eus denn im grosse und ganze glich z wenig festghalte und mir sind am nächste Tag bereits witer uf Cinfuegos. Lustigerwis het das Auto e reini "Schwizer"-Bsatzig gha. Hine drinn isch e Walliser Familie ghocket. Die hend aber Französisch gredet. Das heisst ich ha zwor mit em kubanische Fahrer relativ guet Spanisch chöne Rede aber mit de Schwizer keis Wort. Nebet eus isch jedoch es Päärli vo Züri ghocket. Sie sind gege die 55i gsi und hend anschienend alles richtig gmacht; Sie hend ihri Kind bereits us em Hus und sind biz am Reise und Ferie mache. Echt sehr sympathischi Lüt gsi. Die 3 h sind ume wie im Flug, da mir ganz viel gredet hend.
Cinfuegos
Mir hend eus vo allne verabschiedet und sind id Casa gange. De Husherr und sin "Fründ?", jo zimlich sicher sin Fründ, aso nei eigentlich ischs sogar 100% sin Fründ gsi wenn ich wieder dra denke, ufjedefall het er eus denn euses Zimmer zeiget. Besser gseit euses Stockwerk. Mir hend öppe e Zwölfedrissig Zimmer-Wohnig becho. De Hammer. Zur Begrüessig hets es feins Glace geh. Aber irgendwie sind mir glich langsam biz müed gsi vom viele Reise. Mir sind denn die Stadt go aluege. Ja, es isch easy gsi aber mir hend ezt i dene 7 Mönet doch scho gnueg Städt agluegt.
Nach em umeschländere sind mir retour, hend Klimaalag igschalte und hend eifach nume chillt. Zum Sunneuntergang sind mir denn uf euses Dach ue kletteret und hends nume gnosse. Au de zMorge wo üs am nächste Morge übercho hend isch wieder eimol me delicioso gsi.
Aber dur da, dass es eifach nur e Stadt gsi isch sind mir denn am nöchste Tag witer richtig Trinidad. Ganz viel Lüt hend gseit das Trinidad ihren Favourit seg. Mir sind gspanne gsi.
Next Stop: Trinidad