utah -> oregon coast & back to canada

Chum in Utah Fähri ou scho wieder dür die geologisch höchst faszinierende Gesteiformatione. Ab Moab tönt d'Füümusig Playlist usem Outoradio und mitemne Song wie zb 'Blackheart - Thomas Bergersen' isch de s'ganze gad nomou intensiver. Und trotz gigantischer Kulisse begeisteret mi dr Arches NP nid mega, aber dasch primär uf z'vüu Lüt und Gnüegsamkeit zrüg z'füehre. Immerhin hani witzigi Wandergspändli. Jedoch dr Canyonlands NP (quasi gägenüberligend) bewistmer idrücklech dasi definitiv noni gnue ha und d'Natur eifach fantastisch isch. paar chlini Hikes und e guete Trail Run ine Canyon ABE maches unvergässlech. Imne abglägnige Dorf ergatteri die bis jetzt günstigsti Duschi inkl Fitness für 2.-, bi bis am Schluss nid sicher gsi ob si gmeint het i flirte mitere oder ob das wük dr Pris wär. Jänu.

Churz nach Utah bini am Great Basin NP verbicho und e Mönschelääre Park lonimer nid lo entgo. D'Wanderwäge si nach paar hundert Meter im Schnee verlore gange und eich heisi gseit mi söu nid witer, aber wöui scho äxtra die Höche Schueh ha agleit und uf dr Mapsme App d'Trails guet markiert si bini logischerwis glich witer. Friedlech isch das gsi, das sägi öich und ou liecht asträngend im Ihsinkende Schnee z'loufe. Es isch de sogar no richtig warm worde, dassi ou die Glägeheit gnützt ha zum es churzes Nickerchen z'mache (siehe Foto). Ha eich immer gmeint Nevada isch meh oder weniger eifach wüesti (d'Sierra Nevada isch jo houptsächlech in Kalifornie), aber läck bi ig vüu Päss ufe und abe gfahre. Nur 2 Mou füehrt mi dr Highway 50 are Sauzwüesti verbi wos de ou gad richtig heiss wird hinger dr Outoschibe.

Nördlech vom Lake Tahoe (troumhafti Gägend woni im 2015 mitem Fipu bsuecht ha) befindi mi zrug in Kalifornie. Wenn öper über Kali diskutiert, isch eich immer nur d'Red vo auem zwüsche San Francisco und San Diego. Aber dä Staat het no so vüu meh z'biete oberhaub. Dr Wäg ad Küste bringt mi düre lassen Volcanic NP wo id Bärgchetti vor erwähnte Sierra Nevada ghört. Bi früehligshafte Temperature bini erstunt wo die angäblech tolli Panorama-Stross nach eim Kilometer abgsperrt isch und nach witere 9km z'Fuess stöui fest werum (Foti). Dasmou chumi ohni Winterusrüstig äuä würk nid witer. Anschinend sige do, uf Grund vor Füechtigkeit vom Meer här, 10 Meter Schnee kei Säuteheit im Winter. Und füre Räscht vor Wuche isch wieder Schneefau gmäudet. Nix wie raus hier. Nur paar Stung spöter erinnert nüt meh a chaut & nass, im Gägeteil es isch heiss & troche und abbrönnti Wäuder löh d'Bränd vo letscht Summer nid lo vergässe. In Trinidad erreichi mini gliebti Westküste. Barfuess am Strand entlang loufe und ar Brandig zuelose - I füehle e sehr tüfi Zfrideheit. Wüu dr Highway 101 düre Redwood NP verlouft, chumi i Gnuss vo dene überirdisch Höche Böim. Über Stock & Stei umgäh vomne intensive Grüen und de Riese, frogimi ob die äch würde Steine wärfe, wie I Herr der Ringe, im Kampf gäge s'Böse. Wöu die Böim e 30cm dicki Rinde hei sisi anscheinend nahezu immun gäge Insekter und Für. Redwood vs Sequoia; Redwood si die Höche, Rekord 115,5m. Sequioa si die Breite, Rekord 10,6m. Aus wäre die täg zrüg ar Küste nid scho gnue speziell, chani de vomne Übernachtigsort us mitem Fäudstächer sogar no Grauwale beobachte.

Oregon Coast, wie vüu guets hani ghört & heimer lüt die empfohle. Wüu d'Wätterprognose entlang am Nordpazifik eh besser isch aus Inland blibi ufem 101 und wirde mit Wüuder Küstelandschaft und weni Lüt belohnt. Dür unzähligi chlini Fischerdörfli, State Parks und Campingregione glangi fasch ad Gränze zu Washington State. Chli im Landesinnere ir Nöchi vo Portland si no die Postcharte-Mässige 'Multnomah Falls' wo jetzt im früehlig natürlech perfekt zur Gäutig Chöme mit gnue Wasser. Nachem Columbia River, e witere mächtige Strom ir USA, bini de im letzte Staat bevori wieder zrug nach Kanada go.

Seattle, Mount Baker, Olympia und Mount Rainier NP si die Sache wome sött gseh ha do, aber wöui kei Lust ufne Stadt ha und s'Wätter nid/noni optimau fürs Hike isch, gits gmüetlechi täg mit Läse, Füume luege und Treniere. In Bellingham Gniessi nomou chli d'Nöchi zum Meer, luege uf Vancouver Island übere und erinneremi ane schöne Summer woni vor faschemne Johr ha gha.

Mit Gnue überzügig, Geduld & de nötige Dokumänt (üse Rot Pass isch i dene Situatione immer guet) hanis wieder uf Kanada inegschafft und sogar dürnes Müehsams Interview ufder US-Botschaft in Vancouver. Somit stöi mine 2 Wuche Alaskaferie mit Römu&Fipu nur no 3 Wuche und 3'500km im Wäg.. Bis gli Jungs:)