Chile 🇨🇱

1 semana en Chile 🇨🇱🌶. Vamos!

Los tres amigos 🤗

Nachdem mer die relativ strengi Grenze zu Chile überquert hend, hemer grad en chline “Kulturschock” gha. Alles sehr europäisch: d Lüt, alles organisiert ond greglet, d Büs ond d Architektur.

Nach öpe 1.5h Busfahrt simer denn ide Wüesti vo San Pedro de Atacama acho. Det bin ich mer chli vorcho wie im Disneyland: alles hübsch useputzt ond gschniegled, sehr touristisch ond recht übertürt. Da ich immer no mit mine beidne Israelis (Or & Shahar) unterwegs xii bin, hemer natürlich probiert s günstigste Hostel zfinde. Nach öpe 2h umesueche in brüetender Hitz, hemer denn s günstigste für umgrechnet CHF 12 (!) pro Nacht gfunde. De Shahar heti am liebste im Garte usse im Schlafsack gschlafe, aber nachdem sie ihm verzelt hend, wieviel giftigi Tier (Schlange, Spinne) dases het, esch er denn doch au ih oise Dorm cho 😅.

So simer verbii ah hügeliger Wüestelandschaft, bis mer denn zum Parkigang cho sind, womer en Itritt hend müesse zahle.

Als nächsts hemer bi so Höhlene ghalted ond sind det dure kroche. Das wunderhübsche Gsicht vo de Shahar macht, heter natürlich vo mer glernt 🤓😂.

Denn hemer ois weder uf de Sattel gschwunge ond sind zum eigentliche Tagesziel, am “Valle de la luna”, gfahre. De Name chunt - wer ahnt’s - wel d Landschaft stark am Mond ähnlet.

Valle de la luna 🌒 

Aber sogar d Israelis hend gmeint, es sig würkli eh spezielli Landschaft, obwohl sie sich d Wüesti ja meh als gwöhnt sind :-).

Einisch hemer no sone Astrologie-Tour am Abig gmacht zum d Sterne beobachte. So zmitzt ide Wüesti mit wenig Liechtverschmutzig sind d Rahmebedingige natürlich ideal xii. Er het alles uf spanisch verzelt am Afang, wel mer die einzige “Gringos” xii sind, bi dere Fachsprach mit allne astronomische Begriff etc. simer aber ah oisi sprachliche Grenze cho, ond denn hetera ois amig separat namal uf Englisch verzelt (han aber au da ned alles verstande, leider haha). Am Schluss hemer no es Gruppeföteli gmacht.

Tour astronómico 

Ansonste hemer eigentlich nüm viel meh gmacht, sondern chli easy gnoh. Ich han mal no zwei Skype-Vorstelligsgspröch gha, ansonste simer chli umegschlenderet ond jede Tag uf de Markt, zum frisches Gmües ichaufe. D Restaurantpriise sind nämlich au horrend ond drum hemer eigentlich au immer zeme koched. Wie da z.B. s israelische Nationalgricht “Schnitzel” (ich weiss, dases vo Österich chunt, aber sie esseds mindestens au so oft 😅) zu ihrem heilige Tag Shabbat.

Shabat Shalom 🇮🇱 

Nach öpe 4-5 Täg ide Wüesti hani denn mal chli gnueg Hitz gha ond han de Flüger in Richtig Hauptstadt, Santiago de Chile, gnoh.

Next stop ➡️ Santiago de Chile

Det acho, han ich is “Kombi-Hostel” icheckt ond zerst mal de Bolivie-Blog gschriebe. Bin ja recht im Verzug xii ond das brucht meh Ziit, als mer glaubt 😅. Am Abig han ich mich denn mitem Päscu vo Bade (für die wo ihn kenned) troffe zum go Sushi esse. Er esch per Zuefall au grad ide Stadt xii miteme Kolleg bitz am “reise” bzw. Ferie mache 😊.

Suuushi 🍣🍱

Eigentlich hemer no wele in Usgang, aber d Jungs hend schlapp gmacht, wel sie die letzte Abige immer weg xii sind ond am nächste Tag wiiter uf Kolumbie hend müesse flüge.

Mer esch das aber au grad recht cho, wel ich am nächste Morge beziite 

de Bus is naheglegene Hafestädtli “Valparaiso” gnoh han.

Valparaiso 

S bunte, charmante Hafestädtli liit uf 24 Hügeli (cerros) ond esch durch das es ewigs Ufe- ond Abe. Ich han mis Hostel “La Valija” im Stadtteil “Concepción” gwohnt mit super Blick uf de Hafe abe.

Nacheme feine Zmittag han ich anere “Free-Walking-Tour” durch d Stadt teilgnoh. Ich find das immer die best Möglichkeit, zum am Afang eh Stadt kennezlerne. Valparaiso het nämlich au Gebiet, womer ide Nacht besser miede söt. 

Valparaiso esch eine vode bedütenste Häfe für de Import/Export xii, hüt dients Städtli, wo als UNESCO-Weltkulturerbe uszeichned worde esch, vor allem für de Tourismus.

Wemer durch die schmale Gasse vo Valparaiso schlenderet, gits ah jedem Ecke öpis zentdecke: vo farbige Graffitis über herzigi Cafes ond türi Boutique. Am meiste hend mich aber die viele verschiednige Graffitis beidruckt. D Erklärig für die viele verschiednige Graffitis esch ganz simpel: d Wänd sind immer mit so wüeste Tags besprayt worde, dass d Stadt es paar Künstler beuftreit het, sie mit schöne Graffitis zverschönere.

ChocQuibTown - somos pacifico 🎶 

D Hüser sind au imene spezielle Stil erbaut ond zwar sinds vor allem Teili us alte Schiffswrack. Jedes Huus esch inere andere Farb agmalt, früehner hets dezue dient, dass d Schiff d Stadt vo wiitem chönd erkenne. Hüt macheds es hauptsächlich us Tradition - mer gfallts mega 🤗😍.

Hüser us de alte Schiffswrack

Die öpe 2-stündig Tour het au weder det ufghört, wo sie agfange het ond zwar ufem Hauptplatz “Sotomayor”. Echli wiiter hindedra vo dem idrückliche Gebäude im Bankeviertel mit de grosse Uhr, wo mich ah San Francisco erinnered.

Am nächste Tag han ich mal weder chli Lust uf Strand gha (sit Peru nüm am Meer xii) ond bin drum mitem Bus nach Süde zum “Playa laguna verde” gfahre. Das esch en Gheimtipp vode Rezeptionistin vo mim Hostel xii - esch mer denn aber doch bitz zu “gheim” ond abglege xii 😅. Abxeh vo mer ond es paar Strassehünd hets nämlich wiit ond breit kei Menscheseeli gha.

Playa Laguna Verde

Nacheme churze Spaziergang am Strand entlang mit mine vier noie Hünd ond amene churze Powernap im weiche Sand, esch mer denn doch bitz zlangwilig worde ond ich han weder zrugg zude Zivilisation wele. Drum hani de nächst Bus wo verbi gfahre esch gschnappt ond bin zrugg uf “Valpo” (so nenned die Iheimische ihres Städtli) gfahre.

Playa Riñaca

De Strand hani aber trotzdem nochli wele gnüsse ond drum hani en andere Bus gnoh in Norde ufe. Det verbii cho ah “Viña del mar”, wo viel touristischer esch, het mer eh netti Dame im Bus de Strand “Riñaca” empfohle. De het sich würkli glohnt, en guete Mix vode Lüt her ond au es paar Strandbeize, Glaceständ ond anere schöne Strandpromenade.

Nachdem ich chli hin- ond hergschlenderet bin ond mis Glacé fertig gesse han, bin ich weder zrugg is Zentrum, han mini 7 Sache packt ond bin mitem Bus 2h zrugg id Hauptstadt gfahre.

Chau, chau Valparaiso

Am nächste Tag han ich mitem Ignacio, won ich uf de Tour ufem Machu Picchu, kenneglernt han troffe. Er chunt vo Santiago ond het mer netterwiis en Tag lang sini Stadt zeiged.

Santiago de Chile

D Hauptstadt esch umgeh vode Ande, wo im Winter mit Schnee bedeckt sind ond sich drum au als super Tagesusflugsziel für zum Ski fahre eigned.

Nacheme feine ond günstige Zmittag ufem lebendige ond hektische Markt, hemer ois im Auto zum Hügeli “San Cristóbal” gmacht. De liit eigentlich ganz ide Nöchi vo mim Hostel im Stadtteil “Bellavista”, wo vor allem für sis Nachtlebe bekannt esch (won ich aber nie gnutzt han haha).

Vo det obe het mer eh wunderbari Ussicht überd Stadt ond zwar im 360-Grad-Winkel. Es het überall weder “View Points” (Mirador), womer au die verschiedene Stadtteil guet erkennt.

Wie so ih jedere Grossstadt, hets ganz unterschiedlichi Viertel, vo arm bis riich. Vo de Vogelperspektive natürlich sehr guet erkennbar, det wo alli Hochhüser ond Villene stöhnd bis zude praktisch Wellblechhüttene im Süde vode Stadt.

Gran Torre Santiago

De “Gran Torre Santiago” mit 300m esch s höchste Gebäude in ganz Südamerika ond liit im moderne Stadtteil vo “Providencia”.

Amphitheater Pablo Neruda

Z oberst obe hets au no es Amphitheater vom Pablo Neruda, am wohl bekannteste Dichter ond Schriftsteller vo Südamerika, gnauer gseit vo Chile.

La Virgen

Wie uf fast jedem Hügeli hets au da en Statue, statt en Jesus-Statue dasmal aber eh “Virgen”. Wenigstens au mal eh Frau :-)

Nebeddra hets au no sones Fürbitte-Teil (kei Ahnig, wie das heisst 😅) gha, wo gläubigi Mensche öpis hend chöne anehenke (vo Teddybäre über Ahänger bis zu Geld 😅) ond mer sich im Gegezug öpis wünsche chan.

Mote con huesillo

Nachdem viele Sightseeing, hemer ois en chlini, nationali Erfrischig gönnt. De “Mote con huesillo” esch es chalts Getränk mit igleite Pfirsiche ond so öpis getreidemässigs untedra, ufgosse mit Orangesaft ond ziemlich viel Zucker. Alles in allem es erfrischends, süesses Getränk, won ich aber nume d Hälfti devo möge han 😅.

Min private Reiseleiter, Ignacio 🤗

Mer hend en super Tag gha ond ich han die chilenischi Hauptstadt vo ihrere beste Siite kenneglernt. Au wenn ich insgesamt nume öpe 10 Täg in Chile verbracht han, han ich trotzdem en guete Idruck vom Land übercho. Ond irgendeinisch, liebs Chile, chum ich zrugg, aber mit bitz amene dickere Portemonnaie hoffentlich 👛 🇨🇱