יצא לאור: 15.04.2019
uf florida site isch de effektiv s'meer gad schöner. pensacola würkt toll und drum gönnimer s'erst mou sit mexico e richtige beachtag. s'jogging im sand kombinieri mit abfau ufsammle und mache für jedes stück 10 ligistütz. obwou dä strand imne naturschutzgebiet liegt, fingi leider zimli vüu müll und drum gspüri d'arme am obe relativ guet. d'sunne isch starch do und so erstunts nid, gsehtme überau lüt mit gröteter hut umeloufe. obi e 'snowbird' bi, frogt mi öper - chönntme gloub so säge. d'lüt us de chaute gebiet, wo mind. 3 mönet im johr im süde verbringe, wärde so gnennt. uffauend wie do unge wieder sehr vüu verschidnigi autokennzeiche gsehsch, florida isch extrem beliebt bide amis - mi chasne nid gross verüble. nach de 3 vorhärige südstaate isches aber für mi eher too much. aues isch pompöser, meh liecht, lärm und verchehr, d'hüser mit ihrne bootsstäge si zwar schön, wüus vorwiegend holiday houses si würkts jedoch unpersönlech und längwilig. dasi nach texas nomou so längi streckine fahre hätti nid erwartet, aber wöui i süde abe wot, chumi nid drumume. im big cypress und im everglades np isches chli wie in afrika gsi, am afang hautisch no ah für jedes zebra oder jedi giraffe, aber nachemne zitli hesch so vüu alligatore gseh, dass se nüm gross beachtisch. has vergnüege dasi dörf e gratis kanutour mache, gleitet vomne ranger und das gniessi mitere chline gruppe so richtig. mir paddle dür mangrove, gseh alligatore vo sehr nöch, manatees (seechüeh) und verschidnigi voguarte. super fridlech. nachdämi dr haubfinau vom federer no uf kardiogrät imne fitness ha gluegt, hanimer es finauticket gönnt fürs miami open. trotz kurzem und eher unspektakulärem sieg isches e troum gsi ihn mou live gseh z'spile, nach so vüu mätch vorem färnseh isches de doch angers im stadion - titu #101. lustig isch, dass aui amerikaner wo ummi ume hocke am roger häufe, obwou dr isner e landesgenosse isch. dr rf isch (für mi verständlecherwis) eifach uf dr ganze wäut begehrt. vor tribüne us (im football stadion vode dolphins) gsehni uf miami und angeri grossstedt und für mi isch klar dasi das nid muess gseh. drum verlohni die bekannte orte und go nördlech zum juno beach. i vüune gebiet in florida, chönntme meine spanisch sig die ersti sproch und es wirdmer sogar bestätigt asme allei mit spanisch chönnt überläbe.
klischehaft verwandlet sech s'sunnige wätter i räge a däm tag woni dä sogenannt 'sunshine state' verloh und innerhaub vo 3h hani anstatt 26° nur no 12°.
immerhin wäscht s'nasse mis outo mou wieder chli und i chami ih mire dechi ikuschle, plus derzue mit guetem gwüsse e füum luege. und nid z'vergässe mi blog schribe. somit gsehni in georgia eich nur savannah. die chlini stadt isch ua bekannt für zwöi szene vo forrest gump. ufem chippewa square het är mit dr schoggi ufe bus gwartet und wöui vo californie no e haubvoui box of chocolate ha, entstoht die glorrichi idee das büud noche z'stöue (siehe foto). wüusi aber leider d'bank wäggno hei und ou süsch nüm vüu glich isch, bini chli enttüscht woni achumme. e witere bekannte ort isch d'wormsloe state historic site wo d'jenny 'run forrest run' rüeft. die super schöni allee mit irne prachtvoue böim isch s'ushängeschüud vo savannah - zurächt fingi.
witer geits gad nomou mitere stadt. charleston in south carolina ähnlech gross wie savannah, het aber nomou chli meh charme und isch drum ou es touriste magnet ar ostküste. dr strand checki ou no ab, uf grund vo wind isches aber (für mi) eher z'chaut zums gniesse. dr congaree np isch sehr unbekannt, eher nöi und drum bini positiv begeisteret woni derdür wandere. haub versunkeni böim und etlichi schlange gsehni (leider heisech nid vüu lo fötele).
north carolina chani nid gross beurteile. abgseh vo 4 easy täg bi liesl & zach (d'liesl isch d'tochter vo stults in carlsbad) in homestead, wo primär sport im vordergrund gstange isch, hani eich nüt gmacht. mitem zach verbringi es richtig guets männer weekend; tennis spile, fifa game, schutte, pizza ässe und basketbau luege etc. ufere loufrundi chumi no am city beach verbi und stöue fest as dä erstunlech schön würkt. es isch extrem kuul gsi si beidi nomou z'gseh.
dür s'hinterland vo virginia z'fahre isch toll mitem vile grüen, härzige dörfli und de klassische hüser (grosse garte, houzhus und uf dr veranda schaukustüeuh). d'euphorie nachem früsch gwunnene college basketbau titu isch dütlech sichtbar. mi bsuech im shenandoah np, wo übrigens teil vom 3'500km länge appalachian trail isch, überzügt mi nid sonderlech. dr höchst punkt uf 1'232m bietet zwar e ussicht, aber da aues brun isch (herbst sig d'houptsaison) und nid mega spektakulär isches äbe nur solala. dr trailrun forderet mi gäbig use und d'vegetation erinnert starch a deheim. s'aschliessende bad im chaute fluss isch wiene wiedergeburt - herrlech.
mit früscher luft ir lunge verbringi e länge tag im historische washington dc, d'hauptstadt vode united states. cherry blossom isch nid ganz so uffäuig wie das lüt verzöut hei, aber es isch trotzdäm enorm interessant au die sehenswürdigkeite ab z'loufe. ua top sache wie s'wisse hus, tidal basin mitem jefferson memorial, d'smithsonian museum wo aui riesig (& gratis) si und s'lincoln memorial wo dr martin luther king sini bekannti red 'i have a dream' ghaute het. am obe bini meh erschöpft aus weni e 50km wanderig gmacht hätt und einisch meh muessimer igestoh asi eifach kei stadtmönsch bi. froh dasi dc gseh ha schlofi mit vile idrück müed ih.
ah fasch hättis vergässe z'erwähne, einmal across america erfougrich und ungloublech vüusitig erläbt. die bsuechte bundesstaate si so verschide, jedoch aui uf iri art wunderbar & interessant. und langsam hani s'gfüeuh i ha chli was gseh vor usa, obwoui erst dür 16 vo 50 greist bi. mit dene wort machi mi uf richtig new york...
je witer nördlech i go, desto chüehler wirds wieder und drum hoffi, wie dir deheim vermuetlech ou, uf tolli früehligstäg. e z'fridnige gruess :)