san cristobal & puerto escondido

vo vüune empfohle bini ouso im bundesstaat chiapas wük nid enttüscht worde. san cristobal isch e kuuli koloniaustadt und e gueti basis zum paar tolli usflüg zmache. e bootstour im 'cañón del sumidero' dörfme nid verpasse und weme glück het gsehtme no affe am flussufer. bis zu 1000m rage d'föuse uf beidne site empor. mit zwöi angerne vom hostel göimer mit collectivos zude 'el chiflon' wasserfäu (dr höchst isch 120m) und die verspräche was d'büuder zeige - super klars wasser. e gäbigi abchüehlig bi guet über 30 grad und sehr trochnem klima. ufere joggingtour um d'stadt entdecki mitere kollegin e park mit spezielle föusformatione.

mitem nachtbus geits wieder a d'küste, nach puerto escondido im bundesstaat oaxaca. die letschti wuche im 'bonobo surf hostel' isch e würdige abschluss für mis mexico abentür. mit guete lüt fiiremer parties, hänges am strand, plantsche im pool, spile beachvolley und ässe vüu tacos und guacamole. da s'staff team meh oder weniger us lüt vo argentinie bestoht (i vüune hostel dr fau), hani ou iblick i die kultur inkl. mate trinke und gwöhnemer sogar ires spanisch chli ah und usem 'll' & 'y' wird es 'sch' 'vamos a la plascha'.

gedanke zu mexico; kes wunder, dass so vüu nordamerikaner im winter do unge si, es isch top wätter, günstig und leckers ässe. zuesätzlech si d'flüg nach cancun sehr büuig. mir gfaut d'westküste aber fasch besser aus s'touri überfluetete yucatan. apropos ässe, kei zwifu das isch absolut geniau, aber es erstunt nid, as mexico nach dr usa die 2. höchschti übergwichtsrote het, vüu isch fritiert, es fueret nid wük und derzue trinkesi primär cola. mexico isch e troumdestination und bietet vo natur, gschicht und kulturelle ungerschide wük aues. viva la mexico.

die letschte paar täg heimer ufzeigt, dasi unbedingt richtig wott spanisch lere und drum fröii mi scho uf mis nöchste abentür in lateinamerika, vermuetlech ume winter 19/20. mit guete erläbnis flügi hüt zrüg nach san diego und es füeuht sech fasch chli ah wie heigo. mit de 90 täg (woni hoffentlech ohni problem wieder bechume) möchti mi ufe wäg ad ostküste mache, südlech wie möglech und somit witeri bundesstaate ider usa erkunde. wieder aues verstoh, s'wasser usem hahne trinke, aui die gliche prise zahle, s'wc papier i d'schüssle chasch schiesse und meh nid immer aus touri abgstämplet wird - uf das fröii mi.

hebet es guets weekend, öiche tobi