Willkomme ih mim Land - boLlVIA 🇧🇴🤗 tued mer Leid, dass ich oich jahrelang verschwiege han, dass ich eigentlich d Prinzessin vo mim eigete Land bin 👸🏼 bösi Zunge munkled zwar, dass s Land nachem südamerikanische Unabhängigkeitskämpfer Simón Bolívar benennt worde, aber ich denk mer wüssed alli, was d Wahrheit esch...
...endlich ih mim Land acho 😊 de Bewiis Nach guete 8h Busfahrt bin ich ade Grenze in “Puno” acho. Ond nei - es git ken Direktbus nach “Copacabana” uf de bolivianische Siite vom Titicacasee - jede Bus haltet in Puno. Au wenn eim das d Tour Operators gern als Direktbus verchaufed (bin au “drigheit” 😅).Nach 2-3h Ufenthaltsziit am Terminal in Puno esch d Reis überd Grenze nach Bolivie witergange. Nacheme touristisch guet usbaute Land wie Peru mit komfortablen Bussystem, womer sogar online chan reserviere, merkt mer relativ schnell de Unterschied, wemer d Grenze zu Bolivie überquert. Engi, unbequemi Sitz ond bim Bus het vorne d Abdeckig gfehlt - aber halb so wild, mer sind au so ah oisem Ziel (Copacabana) acho. Copacabana, Ussicht vom Hotel Det han ich mich im Hotel “Cupula” mitem Carlos (Sevillano, won ich in Mancora, Peru, kenneglernt han) wieder troffe. Er esch vo Cusco, Peru, her cho ond mer sind praktisch glichzitig acho. Nachere lange, astrengende Nachtbusfahrt hemer ois zerst Mal es feins Zmittag gönnt. Denn hemer bitzeli s Städtli “Copacabana” erkundet: sehr chlii, überschaubar ond touristisch. Vom lange Sitze im Bus, hemer ois nachli meh wele bewege ond sind drum alles am See entlang gloffe zum de Sonneuntergang zluege. Abigstimmig Am nächste Tag hemer bim Zmorge no zwei Dütschi, wo aber spanisch gstudiert hend in Barcelona, kenneglernt. Am Afang han ich echt Müeh gha, sie zverstah (vor allem de Carlos mit sim andalusische Akzent 😅), aber mit de Ziit eschs immer besser gange. Muen aber zuegeh, es esch so ziemlich s wüestiste Spanisch, won ich uf minere ganze Reis ghört han 🙈. Isla del Sol So hend mer am nächste Tag alli zeme s Boot uf die naheglegeni “Isla del Sol” gnoh. Das esch luut de Inka-Kultur als de Geburtsort vode Sonne verehrt worde. Det simer bitz umenandgspaziert, aber nume im Süde vode Insle, wel de Norde fürd Touriste (im Moment) gsperrt esch. So recht Uskunft geh drüber het ois aber niemert wele, es schiint eifach es politisches Problem zsii. Wemer rundume luegt, fühlt mer sich fast chli wie ufere griechische Insle: strahlendi Sonne, dunkelblaus Meer, Kaktee, schöni Wanderwege. Wenn nume d Luft uf über 4’000m ned so dünn wär ond jede Schritt so astrengend würd mache 😅. Gmüetlich am zmörgele D Chicas sind am gliche Tag zrugg, wel sie nüm soviel Ziit gha hend. De Carlos ond ich hend aber no e Nacht det imene Hostel übernachted, was sich uf jede Fall glohnt het. D Lüt sind super gastfründlich, es esch günstiger als Copacabana ond nume so chunt mer richtig ih das “Insel-Feeling” mit ihrere Rueh ond Gmüetlichkeit. Ond es git doch nüt bessere, als de Tag miteme feine Zmorge ond dere super Ussicht zstarte 🤗. Wel mer aber scho ih de “Chiller-Modus” cho sind, hemer leider au oises Boot zrugg as Festland verpasst 😅. Drum hemer ois spontan entschiede, au no d Nachbersinsle „Isla de la Luna“ zbsueche. Sie esch würkli seeehr chlii ond au ned wahnsinnig speziell, aber falls mer s Boot verpasst, en gueti Zwüschelösig ;-). Am Abig hemer denn zeme de Nachtbus nach „La Paz“ gnoh, womer um Mitternacht acho sind ond ois im Hostel iquartiert hend. Am Tag druuf hend mer die höchstglegeni Stadt (Achtung: aber ned Hauptstadt, nume Regierigssitz!) mit 3‘600m echli erkundet. S Gebiet rund um La Paz namens „El Alto“ esch namal öpe 500m höcher ond au relativ gföhrlich. Am Tag zwar mit chli Vorsicht guet bsuechbar, es füehrt au eh Seilbahn ufe, am Abig würdi aber eher devo abrate. Ich bin abxeh devo, dass mer mitem Bus duregfahre sind, gar ned dobe xii. Anyways, wie mer so durch d Stadt geschlenderet sind, simer au am „Plaza Murillo“ verbii cho. Det het per Zuefall grad eh Präsidentsschaftskampagne vom aktuelle bolivianische Präsident „Evo Morales“ stattgfunde. Es het viel Lüt versammled gha, hauptsächlich Indigenas, wo ihn unterstützt hend. Am Afang han ich ihn no sympathisch gfunde, wel er de ersti indigeni Präsident esch ond somit au chli d Minderheit bzw. die schwächere vom Land vertreted. Durch verschiedeni Gspröch mit Lüt ond bitzeli Recherche, het sich die Meinig aber relativ schnell gänderet 😅. Er esch sit 2006 (!) ade Macht ond mit de Ziit au immer korrupter worde (wie so ziemlich all südamerikanische Präsidente, leider🙈). Eigentlich betreit d Amtsziit jewiils 5 Jahr, aber er het eifach d Verfassig gänderet (geg de Wille vom Volk), damit er immer wiedergwählt werde chan. Theoretisch söt er links igstellt sii ond handle, ide Realität eschs aber umgekehrt. Ond er chan weder lese no schriebe - was ziemlich beängstigend esch, wemer denkt, dass so öper es Land regiert. Präsidentskampagne Evo Morales So, das wär min chline politische Exkurs xii ;-) ansonste hend mer i dere Grossstadt ned so viel gmacht, viel umegloffe, fein gesse, verschiedeni Markt bsuecht etc. Ah eim Tag hemer en Tagesusflug zu somene Berg (won ich de Name vergesse han 😅) ond zum “Valle de la Luna” gmacht. De Berg esch recht höch xii ond durch das ah relativ astrengend, aber mer hend nume öpe 100m müesse zFuess laufe. Theoretisch het mer vo det obe eh super Ussicht überd Stadt ond chönt sogar bis zum Titicacasee ond übere uf Peru xeh, was aber bi oisem Wetter definitiv ned de Fall xii esch 😅. Da hend mer bim “Valle de la Luna” echli meh Glück gha. S “Mondtal” bestaht us verschiedene Felse, Stei, Erdhügel etc. wo im Verlauf vo Millione vo Jahre durch Wetter ond Rege so gformt worde sind. De Name chunt logischerwiis daher, we d Landschaft stark an Mond erinnered, das söl de Neil Armstrong festgstellt ha. Valle de la Luna Selfie mit Carlos 🤳 Gnueg Grossstadtlebe - mich hets zum erste Mal in Amazonas, gnauer gseit nach “Rurrenabaque” zoge. Ich han mer das Amazonas-Abentür extra für Bolivie gspart, wels da mit Abstand am günstigste esch. Für 3 Täg in “La Pampa” han ich mit “Fluvial Tours” insgesamt 650 Bolivianos (ca. CHF 100) zahlt. Es git zwei Möglichkeite, nach Rurrenabaque zcho: entweder mitem Bus (ca. 18 Stunde ab La Paz, 70 Bolivianos) oder mitem Flug (ca. 1h, 1000 Bolivianos). Eigentlich han ich wele mitem Bus gah (s Geld gaht mer definitiv langsam us 🙈), han aber soviel Horror-Stories vo dene kaputte Büs ghört, wo unter anderem au über die bekannti “Death Road” fahred, dass ich mer denkt han - safety first 🤓. ...take off to Rurrenabaque Am Abig vorher han ich mer no eh wüesti Lebensmittelvergiftig gholt ond drum die halb Nacht ufem WC verbracht 🤮💩🙈. Zum Glück esch aber am nächste Tag alles dusse xii ond ich han de Flug guet überstande. Bolivie esch mis erste ond einzige Land, won ich Müeh mitem Esse gha han - da hilft leider au min Rossmage nüme 😅. In Rurrenabaque acho, hend mer zerst mal en Klimaschock gha - vo chüehle, regnerische 15 Grad (ide Nacht öpe 5 Grad) in La Paz zu heisse, tropische 35 Grad im Dschungel - aber lieber so, als umgekehrt :-). Det het ois s Auto abgholt ond nacheme Zmorge, simer denn ufem chline Motorböötli ufem Amazonas in Richtig “La Pampa” gfahre. Unterwegs hemer scho viel Tier entdeckt. Capybaras Unter anderem “Capybaras”, eh Mischig zwüsched übergrossem Meersöili ond emene normale Söili oder so 😅. Sie chilleds uf jede Fall immer chli im Dreck ond fressed hauptsächlich de ganz Tag 🐖. Denn hets au überall Schiggys am sünnele gha 🐢🌞. Hey there 🐊 Ond zwüscheddure hend es paar gelbi Auge usem schlammige Wasser glüchted 👀. Es het Alligatore ond Kaymane gha, won ich aber bis hüt de Unterschied ned kenne 😅 keep it simple: kroki ist kroki 🐊. 🦷 Mer hend au viel Äffli (glaub Kapuzineräffli) unterwegs atroffe. Da oise Guide sie agfüettered het, sinds au uf oises Boot cho. Sie sind so zuetrautlich xii, dass au über ois klettered sind ond am einte uf de Chopf ghocked esch. Er het mega Freud gha, bis s Äffli sis Tagesgschäft het müesse erledige ond ihm uf de Chopf gschisse het 💩🙊. Denn esches defür für ois umso lustiger worde 😅. Übernachted hemer ih Holz-Bungalows direkt am Fluss glege (zum Glück bitz erhöht, damit d Tier ned eifach so inecho hend chöne). D Äffli hend aber immer en Weg gfunde ond alles, wo ned agmacht oder verschlosse xii esch, mitgnoh hend 😅 vorzuugswis natürlich jeglichi Snacks. Am nächste Tag hend mer ois denn zFuess durch schlammigi Gebiet uf Anakonda-Suechi gmacht. Vo oisere Gruppe esch niemert so scharf druf xii, vor allem nachdem ois de Guide verzelt het, dass sich da au gern d Alligatore ufhalted. So hend mer ois hauptsächlich am Rand vo dem Gebiet ufghalted, während de Guide sich durch de Schlamm kämpft het. Uf Anakonda-Suechi Relativ bald hemer Eier entdeckt, zwar ned vo Anakonda, sondern vo Vögel. Aber es beliebts Esse bi ihne ond drum velech eh Spur. ...Eier schomal gfunde Leider nüt xii, so hemer wiiteri Stunde ih de Hitz ond umziegled vo tuusig Moskitos verbracht. Ufem Retourweg ond womer scho ufgeh hend, het oise Guide denn doch na öpis gfunde: zwar kei Anakonda, defür eh “falschi” Kobra. Sie esch nämlich ungiftig - gott sei dank :-) 🐍 Geg de spöter Namitag simer weder ufs Wasser, dasmal ned zum Tier beobachte, sondern zum oises Znacht fische: Piranhas. Meh oder weniger erfolgriichs Piranha fische 🎣 Es esch aber gar ned so eifach xii, wies velech tönt, wel die Fisch wüssed ganz genau, wie sie de Köder chönt abknabbere, ohni dass sie devo müend sterbe 😅 es esch also meh es Fisch füettere als es fische xii, was mer aber au Recht xii esch, wel ich die Tierli ned gern sterbe xehn (au wenns “natürlich“ esch, wemer das nachher wet esse 🙈). Oisi Gruppe het 1 Piranha gfischt ond no es paar chlineri Fisch, de Rest het alles de Guide usegholt 😅. So hemer denn glich no gnueg zum Znacht gha. Sunset Nach 3 Täg “Into the wild” han ich mich denn weder uf bitz Zivilisation gfroit ond han mich zrugg in La Paz weder mitem Carlos troffe (er het ih dere Ziit en 6000er-Berg bestiege - ohne mich 😅) ond zeme hemer de Nachtbus in Richtig Hauptstadt, Sucre, gnoh. SucreSucre esch die konstitutionelli Hauptstadt vo Bolivie “dónde nació Bolivia”. Es würkt aber überhaupt ned wiene typischi Hauptstadt, sondern eher wienes chlises Pueblito. Ich han mich aber vo Afang ah ih das chline, herzige ond sichere Kolonialstädtli verliebt. Für mich die mit Abstand die schönsti Stadt vo Bolivie (vo dem, was ich xeh han) ond definitiv au eini vode schönste Städt in Südamerika. Centro histórico D Altstadt vo Sucre esch überschaubar, Hostels, Restaurants ond Cafés reihed sich anenand. Es esch au ziemlich sicher ond ich han mich schnell wohl gfühlt, was füre südamerikanischi Hauptstadt alles anderi als selbstverständlich esch :-) Parque Simon Bolivar Die erste paar Täg han ich na mitem Carlos verbracht, nachher esch er wiiterzoge, wel er bereits en Flug ufd Osterinsle buecht het ond drum chli schneller vorwärts het müesse.Mer hets aber so guet gfalle, dass ich mich entschlosse han, chli länger da zbliebe. Drum han ich mehr es Volunteer imene Hostel gsuecht ond au scho bald im “Clavel Blanco”, 5 Minute vom Hauptplatz, chöne afange. Volunteering im Hostal “Clavel Blanco”, Sucre Insgesamt bin ich 2 Woche det xii ond es esch eh wiiteri, gueti Erfahrig xii. Die andere Volunteers sind alli us südamerikanische Länder cho (Argentinie, Peru ond Mexiko) ond so hemer usschliesslich spanisch gredt, was mer extrem gholfe het. Ih de zweite Woche han ich denn au namal paar Lektione gnoh, zum na bitzli de “Feinschliff” zmache. Spanischlektione sind mit ca. CHF 5.00 pro Privatstund sowiit ich weiss die günstigste in ganz Südamerika ond d Bolivianer hend es recht neutrals ond dütlichs Spanisch - falls sich öper vo oich na überleit, go spanisch zlerne ;-) Chiquito 🐯 Krypto 🐶 Eifelturm in Sucre S Hostel esch extrem zentral glege, im Kolonialstil miteme wunderschöne Innehof ond 2 Büsis ond emene Hund. De einzig Hake esch d Bsitzerin, sie esch eh rechti Hex 🧙♀️ innerhalb vo mine 2 Woche det het sie d Peruanerin nach 3 Täg gschmisse (sie het aber au chli Scheiss bote, trunke während ihrere Schicht etc.) ond e Woche druf sind die beide Argentinier usgrasted ond sogar d Polizei het müesse cho, wel sich d Bsitzerin ond de Argentinier ziemlich id Haar grate sind 😅. Ich han au paar Moment gha, won ich denkt han, ob ich ned eifach söt gah, aber für mich eschs halt eh gueti Möglichkeit xii zum Geld spare ond han irgendwenn glernt, mit ihrem schwierige Charakter umzgah (Strategie „Airolo - Göschene“, wener wüssed, wasi meine 😝). Caminata “7 cascadas” Einisch hemer mit de Volunteers ond paar Gäst en Usflug gmacht zude 7 Wasserfäll. Erreicht hemer aber schlussendlich nume 3, es esch relativ aspruchsvoll xii ond mer hend ah einige Stelle müesse klettere. D Ussicht esches aber definitiv wert xii :-). Mercado “Tarabuco”
Am Sonntig han ich mit es paarne de Collectivo-Bus zum Markt „Tarabuco“ gnoh (ca. 1.5 Stund pro Weg). De esch immer nume 1x pro Woche ond het verschiednigi Artesanía, Kleider, Gmües, Frücht ond Gwürz.
Ich han scho einigi Markt bsuecht uf minere Reis, drum eigentlich nüt speziells, gang aber trotzdem immer weder gern. Ond han au paar Sache pösteled, woni jetzt da aber ned chan erwähne, sosch wärs kei Überraschig meh 🙊😊.
Wien ich bi vorherige Blogs erwähnt han, bim Reise gits nüt schöners als Reunions - ondes passiert öfters, als mer denkt, vor allem wemer bitz die glich Reiseroute het.
So han ich ide erste Woche de Bram weder atroffe, en Belgier mit dem ich im Dschungel xii bin. Mer hendes paar cooli Täg zeme verbracht, unter anderem z.B. a dere Tapas-Night.
De aber wahrschenlich allergrössti Zuefall esch aber xii, won ich ade Rezeption gschaffed han ond plötzlich xeh han, dass mer eh Reservation für de Or (de Israeli, won ich 3 Woche in Ecuador greist bin ond in Peru au 2-3x per Zuefall weder atroffe han) übercho hend. Er het ned gwüsst, dass ich ih dem Hostel am volunteere bin ond het eifach s günstigste in ganz Sucre wählt. S Schicksal füehrt ois immer weder zeme ;-) 👻 Ah Halloween het d Bsitzerin eh Geburtstsgsfiir für ihri Tochter organisiert, wo 11i worde esch. S ganze Hostel esch aso voller Kiddies ond Geschrei xii (nei, ich bin def. nanig ready für das 🙈😅). Ready for Halloween
Aber sie het sich echt Müeh geh ond alles schön dekoriert, ond wel sie grad in gueter Luune xii esch, het sie ois sogar gschminkt.
🎃
So simer denn am Abig na bitz in Usgang, aber ich bin ned so lang bliebe, wel ich am nächste Tag d Zmorge-Schicht gha han ond drum öpe uf die halbi 8i han müesse ufstah.
D Schichte sind so ufteilt xii, dass mer entweder d Morge-/Mittags-/oder Nachtschicht bis am 11i gha het. Insgesamt het jede 5h gschaffed, meistens chli meh. D Morgeschicht esch mit Abstand die astrengenst xii mit Zmorge vorbereite ond Check-In/Check-Out, de Rest vom Tag eschs hauptsächlich s awesend sii. Ich han die meisti Ziit gnutzt zum Bewerbige schriebe, wo ich au jetzt no dra bin 😅.
Friedhof
Am nächste Tag esch “Día de los Muertes” xii, eis vode grösste Fest in Latinamerika, wo sie ihrne gliebte Verstorbene widmet. Mini Lehrerin het mer ah dem Tag fest empfohle, uf de Friedhof zgah, zum ah dem Fest ond dem Bruch chöne teilzneh. Ich han mer das so chli vorgestellt wie in Mexiko, mit maskierte Lüt ond Musig etc. In Bolivie lauft das aber nume halb so spektakulär ab, die Verwandte ond Bekannte göhnd eifach ihri Verstorbene go bsueche ond bringed Esse, ztrinke etc., wel sie as Lebe nachem Tod glaubed. Ih allne Gräber findet mer au geliebti Sache vo dene Persone, über Teddybäre zu chline Cola-Fläschli zu Schnaps, je nachdem :-) bi mer söt denn definitiv es Baby-Alpaca stah 🤗.
...damits au ha ned zheiss hend...
So han ich also mini Ziit in Sucre hauptsächlich mit chli volunteere, Spanisch lerne, mitem Krypto go spaziere, Cambio spiele, choche mit de anderne Volunteers ond telefoniere mit oich diheime verbracht :-).
Irgendwenn esch denn aber au mal guet xii ond es het mich mitem Or ond sim israelische Kolleg Shahar wiiterzoge in Richtig „Salar de Uyuni“. Bolivie - als einzigs südamerikanisches Land - git au nume en Ufenthaltsbewilligung vo 30 Täg, obwohl mer die eifach au chönt verlängere.
Nachdem de Or ond ich uf chli Umwege endlich in „Uyuni“ acho sind, hemer zerst namal e Nacht det übernachted. Am nächste Morge hemer alli Travel Agencies abklappered, zums günstigste Agebot zfinde (Israelis hend es unglaublichs Verhandligsgschick, das liit ide Natur 🙈😅). Schlussendlich hemer für 650 Bolivianos bi „Los tres gigantes“ buecht, was ich sehr chan witerempfehle, falls öper vo oich möcht gah (Tschänsch zum Bispiel) 🤗.
Am halbi 10i esch denn Tour losgange, de ersti Stop hemer bime „Zug-Friedhof“ gmacht. Ich bin jetzt ned so wahnsinnig interessiert ah Züg ond vorallem hets extrem viel Lüt gha, wel alli Toure glichzitig started ond det halted. Es esch mega nöch vo Uyuni, mer chönt also easy au irgendenn Bus neh oder sogar zFuess gah zunere andere Ziit, wo ned alli det sind 😅.
Cementerio de los trenes 🚂
Oisi Fahrt het witergfüehrt ond so langsam het sich d Landschaft veränderet: vode bruune Wüesti esch alles wiss worde. De nächsti Halt hemer bimene Mini-Geysire gmacht. Das Wasser het brodlet, was ufem Bild chli schwierig erkennbar esch 😅.
Mini Geysire
Sal
Salar de Uyuni esch mit über 10‘000 Quadratkilometer die grössti Salzwüesti vode Welt ond esch durchs Uströchne vomene See vor tuusige vo Jahre entstande.
boLIVIA 🇧🇴
De nächsti Halt hemer imene Salzhuus-Restaurant gmacht, s Esse esch mega fein xii, oise Guide het alles diheime vorbereited ond denn für ois gwärmt. Es het Quinoa, Gmües ond Poulet geh. Vorem Restaurant esch no de bekannti Platz mit de Fahne us aller Welt, aber d Schwiizerfahne hani vergebens gsuecht 🇨🇭😳. Entweder het sie öper abghenkt oder niemert het je eini ufghenkt. Tschänsch, han also au no en Uftrag für oich: nehmed doch bitte en Schwiizerfahne mit, wener göhnd 🤗
Knapp entcho 🦖
Am Namitag het ois de Guide denn no Ziit geh, zum es paar vo dene typische Perspektive-Bilder zmache. Wieso all die Dinosaurier-Föteli mached: wel da en Teil vom „Jurassic Park“-Film dreiht worde sind.
Da mini Top-Uswahl (dJungs sind fast duredreiht ab all dene Föteli aber tja 🤷🏼♀️😂):
Grad Lust ufes OReo becho 😋
...das het mer devo
⚖️ schwierigi Entscheidig China d Weltherrschaft am überneh 🙈
Nie hemers all glichzitig gschafft 😅
Es het uf jede Fall mega Spass gmacht ond au d Jungs hend mit de Ziit immer meh Freud becho ond neui Idee bracht. Ich empfehl uf jede Fall, ned die schönste Chleider azlegge, wel wemer uf die Salzflächli sitzt oder liit, chlebt alles ade Chleider 🙈 drum au min T-Shirt-Wechsel zwüscheddure 😅.
Isla del Pescado
Mitem Jeep simer nachli wiitercruist, bis mer denn zude Isla del Pescado cho sind. Fraged mich ned, wieso die so heisst, es het uf jede Fall kei Fisch uf dere Insle, sondern tuusigi vo Kaktee. De Itritt chosted namal separat, aber es lohnt sich, vor allem au für die gueti Ussicht.
🌵
Es esch unglaublich, wie riiiesig die Salzwüesti esch, vor allem vo det obe betrachted.
Salzhuus 🧂
Gschlafe hemer jewils ih so Salzhüttene, sozsege ih eifache Hostels. Ide Nacht esch iischalt worde, aber dinne untere Schicht vo Deckene zum Glück wohlig warm 🔥.
De nächst Tag esch gfüllt xii mit Bsuech vo verschiednige Lagune. Insgesamt hemer 5 Lagune (oder meh) bsuecht, chan mich aber nume no ad Näme „Laguna Verde“ ond „Laguna Colorada“ erinnere. Das sind glaub au die bekannteste.
Flamingos
Ih de meiste Lagune hets au Flamingos gha, wo det stopped zum esse.
Funfact #1: d Flamingos hend die pinkig Farb vodene chline Tierli wo sie essed (shrimpmässig). Sosch wäreds eigentlich wiss. Ond d Babies grau, wie Pingus.
Funfact #2: d Lagune hend die verschiednige Farbe vode Alge, wo det wachsed. Das wärs xii, meh weiss ich ned vo dene Lagune 😅 aber schön zum aluege.
Foto de grupo 👯♀️👯♂️👯♀️
Dumm & dümmer 🤦🏼♀️ sosch wär s Lebe ja langwiilig 🤷🏼♀️ Laguna Colorada
En wiitere Halt hemer bim „Árbol de piedra“ gmacht. Es esch eigentlich ken Baum, sondern en Stei, wo durch Wind ond Wetter über Jahre so gformt worde esch.
Árbol de piedra
En anderi spannendi Kreatur
A dem Abig hemer denn no amene Ort ghalted, zum de Sonneuntergang chöne zxeh. Ich weiss, ich hab das scho öfters gseit, aber das esch ECHT eine vode schönste Sonneuntergäng xii, won ich je xeh han 😅.
Mer hend d Ziit au na gnutzt, zum chli „Salsa de Uyuni“ züebe. Salsa de Uyuni 💃🏼 Todmüed aber glücklich ond mit vielne Erinnerige anen super Tag simer ih oisere nächste Unterkunft is Bett gheit. Am nächste Morge het de Wecker scho früeh glüted (gnauer gseit am 3 ide Nacht), damit mer de Sonneufgang ned verpassed. Geysire Zerst hemer aber no en Stop bide Geysire gmacht. Die sind jetzt chli idrücklicher ond grösser, als die andere, womer am Afang xeh hend 😅. En Geysire entstaht eigentlich durch das, dass heisses Vulkangestei s Wasser ufheizt. S warme Wasser wird denn nach ufedruckt, wiemer ufem Bild chan xeh. Dusse esch aber trotzdem no iischalt xii ond drum simer relativ schnell weder zrugg is Auto zrugg ond wiitergfahre. Hot Springs Gli hend ois die warme Quelle erwarted miteme spektakuläre Sonneufgang. So hemer schnell vergesse, dass mer zmitzt ide Nacht hend müesse ufstah. ...s früehe Ufstah het sich glohnt Normalerwiis göhnd d Toure erst nachem Zmorge det hii ond denn esch s Bad gfüllt mit allne Gruppe. Mer hend oise Guide aber gfragt, ob mer scho früehner chönd gah, ond so hemer s Bad praktisch für ois alleige gha 🤗. Definitiv eis vo mine Highlights uf dere Reis. Nachem wohlverdiente Zmorge, simer zude Wüesti „Desierto de Dalí“ gfahre, benannt nachem bekannte spanische Maler Dalí, wo die abzeichned het. Zudem hend Messige da berechned, dass d Landschaft ziemlich identisch mit dere vom Mars esch. Desierto de Dalí De allerletzti Halt hemer denn no bide „Laguna Verde“ gmacht, wo uf dem Bild ned so grüen erschiint, wels windstill xii esch. Mit meh Wind wirbleds die Alge ond das Züg uf ond durch das chunt d Farb no viel meh zur Geltig. Laguna Verde The Crew Hinter dem Vulkan befindet sich scho oises nächste Ziel, Chile. D Grenzübergang esch eifach, aber recht lang gange ond kes südamerikanisches Land esch so strikt wie Chile 😅 zum erste Mal ever sind all oisi Gepäckstück gscannt ond durchsuecht worde, min Öpfel hani schnell no müesse esse 🍏. Es döf nämlich nüt importiert werde, wel sie Angst vor Chrankheite/Süchene hend. Het aber en guete Grund, wel sie durch d Wüeste, Berge ond s Meer chli „igschlosse“ sind. Nach guete 3-4 Stund hemers denn aber glich alli über d Grenze gschafft ond de nächst Bus het ois in Richtig San Pedro de Atacama, Chile, bracht 🇨🇱. ...ready für Chile 🇨🇱
