Panama han ich bis jetzt praktisch nume vom Kinderbuech vom Janosch “Oh, wie schön ist Panama” kennt mitem chline Tiger ond em chline Bär ond de gelbschwarze Tigerente, wo eines Tages eh leeri Holzkiste usem Fluss gfischt hend mit de Ufschrift “Panama”. Denn hend die beide beschlosse, det anezreise, wel sie denked, das esch s Land vode Träum. Würkli acho sinds aber nie, trotzdem hend sie ihre Friede gfunde 😉 dases aber würkli es Land vode Träum ond uf jede Fall en Bsuech wert esch (au wenn viel zwenig vo dem Land gredt wird, miner Meinig nach), chönter i dem Blog lese bzw. aluege :-)
Zerst bin ich vo Puerto Viejo (Karibikküste vo Costa Rica) miteme direkte Shuttle vo “CaribeShuttle” für $30.00 überd Grenze nach Panama igreist. D Ireis esch recht eifach verloffe, wel mer inere Gruppe xii sind ond ois die Guides gholfe hend. Trotzdem sind Grenzübergäng ned mini Lieblingsbeschäftigung ond mer esch eimal meh bewusst worde, wie schön mers in Europa hend, das für ois alli Grenze praktisch immer offe sind.
Am Hafe het ois denn es Boot abgholt für nach “Bocas del Toro”. Das esch es Inselarchipel ade Karibikküste, wo us mehrere chline Inseli bestaht. Ich han mini Unterkunft uf de Hauptinsle “Colón” buecht. Det esches sehr touristisch, aber mega schön ond es het alles über Ikaufsmöglichkeite zu Restaurants ond Bars.
Won ich i mim Hostel “Spanish by the Sea” acho sind, han ich au gad am gliche Tag no 2h Spanischunterricht buecht. Han det namal e ganzi Woche Privatunterricht gnoh, wel ich gmerkt han, das mis Spanischniveau sosch chli stah bliebt. Han zwar ned so s Gfühl, das mer die Woche mega viel bracht het, wel bin irgendwie nie so richtig warm worde mit mim Lehrer ond er esch au immer recht schnell abglenkt worde ond irgendwie ned so bide Sach xii ;-)
So han ich eigentlich jede Tag chli mit lerne ond an Strand gah verbracht. S einzig chli schade esch, dass de Strand ned gad vor de Hustür esch (ich bin verwöhnt, ich weiss 😅), sondern mer eigentlich immer en Bus oder s Velo muen neh.
Min absolute Lieblingsstrand esch de “Playa de Estrella”, für det ane chamer en Bus neh (45 Min.) ond na bitz laufe. Es het mich mega ah d Maledive erinnered, kristallklars, suubers ond warms Wasser. Mit echli Glück chamer Seesterne xeh ⭐️ ond mengisch sogar Delfine ond Fuultier.
Playa de Estrella Mitem Boot chamer füres paar Dollar au uf die andere Insle wie Bastimentos, Solarte, Caranero, Red Frog Beach etc. Nach fast 10 Täg dolcefarniente han ich weder Bsuech us de Schwiiz übercho 🤗 am 4. April esch min chline Tiger 🐯 für 2 Woche uf Bsuech cho. Bienvenidos 🐯🤗 Damit sie sich ned verlauft uf dere wahnsinnig grosse Insle bin ich sie mitem passende Schild go abhole. Han mich mega über ihre Bsuech gfroit ond bi es paar Mojitos hemer ois alle Klatsch&Tratsch vode vergangene Woche verzelt. Müed vo ihrere lange Reis simer aber gli scho go pfuuse im Hostel “Mamallena”, direkt am Meer glege. Die nächste Täg hemer eigentlich au mit Playa, Sun & Fun verbracht ond ich han ihre die Ort zeigt, wo mer am beste gfalle hend. Sol y mar (oder au Solimar 😛) Am Fritig hemer Tickets kauft für as “Filthy Friday”, das esch sone Island-Crawl-Tour durch de Tag, wod mitem Boot vo Insle zu Insle gahsch ond immer weder en noi Insle ond Party hesch. Es esch ned lang gange ond mer hend schnell Lüt kenneglernt ond so esch d Ziit wie im Flug verbii. Filthy Friday Ready to party 🎉 S Ganze chostet $35, defür bechunsch na sones tolls Fan-Shirt, es Rucksäckli miteme Kondom (wichtig 😛) ond es Gratisgetränk. Die wiitere Getränk sind nüm debii, aber au ned so tür (3-4$). Zerst gahts vode Hauptinsle ufd “Blue Coconut Insle”, wos eigentlich nüt anders het als e Bar ufem Meer mit Live-DJ’s (wo zwar niemert kennt, aber egal 😅). Findet Walter 💃🏼 Nachher gahts wiiter mitem Boot zude “Aqua Lounge” uf de Isla Caranero. Det esch weder Party - mit Open End:-) am halbi 11i am Abig - nach guete 12 Stund uf de Bei - simer aber denn irgendwenn au mal müed worde ond defür am nächste Tag katerlos ufgstande 🐯. Nach es paar Täg uf de Hauptinsle Colón hemer denn uf d Insle Bastimentos gwechslet für wiiteri 3 Nächt. Leider het d Svenja irgendöpis schlechts verwütscht ond drum esch ihre i dene Täg ned so guet gange 💩. Aber zum Glück hemer det au weder es schöns Hostel (El Jaguar) direkt am Meer gha ond d Ziit chli det verbracht, bis ihres Antibiotika gwürkt het. Am Sonntig hemer denn no en Tagesusflug zude Insle Zapatillas gmacht, das sind zwei unbewohnti Insle vo dem ganze Archipel mit wunderschöne Koralleriff. Det hemer denn au nachli Ziit gha zum schnorchle ond einisch hemer ois hinterem Boot chöne zieh lah mit somene Teil, wod wienen Delfin chasch is Wasser itauche ond weder ufecho 😅 weiss leider nüm wiemer dem seit, aber uf jede Fall hets mega Spass gmacht 🤗 Playa Zapatilla Am Schluss vo dem Trip i das wunderschöne, fast unberüehrte Paradies hends no es chlises Buffet mit feine exotische Frücht für ois am Strand parat gmacht. 🍉 Nach meh als 2 Woche uf de Insle han ich mich denn glich au weder mal ufs Festland gfroit. Mitem Shuttle vo “CaribeShuttle” simer denn vo Bocas wiiter nach Boquete (ca. 5h), was im Landesinnere ond durch das au grad weder chli chälter esch. Aber nach soviel Tropefeeling eigentlich au weder eh schöni Abwechslig ;-) Boquete esch es chlises, herzigs Dörfli umgeh vo Berge ond em Vulkan Barú, womer au chönt ufelaufe. Mer hend aber oisi Ziit anderst verbracht ond sind am einte Morge go riite. Usritt in Boquete De Svenja ihres Ross het leider ned so möge ond ah jedem Ort ghalted zum grase, drum simer ned so schnell vom Fleck cho. Aber d Ussicht übers Tal het sich uf jede Fall glohnt 🤗. Am Namitag hets denn leider zuetah ond s het chli agfange go regne, drum simer nume nachli im Dörfli umegloffe, uf sonen chline Markt ond fein go esse 😋. Am nächste Tag hemer en Usflug zude Hot Springs vo Boquete gmacht, aber wel mer beidi schomal ide heisse Quelle in Costa Rica xii sind, esch das für ois nüt wahnsinnig speziells xii. Immerhin esch de Guide en lustige & nette Typ xii ;-) Hot Springs 💦 Zwei Täg hend denn aber au glanged in Boquete ond ois hets weder as Meer zoge. Das mal aber uf die anderi Siite ad Pazifikküste, gnauer gseit nach Santa Catalina. Am transferiere 🚌 Nach paar Stund im Bus simer denn i dem chline, verschlafene Fischerdörfli acho. Es esch würkli no recht am Afang vom Tourismus ond es het ned mal en ATM. Aber defür es schöns Meer ond wär au super zum surfe. Am nächste Tag hemer en Usflug ufd “Isla Coiba” gmacht, en ehemaligi Gfängnisinsle, wo bis 2004 no in Gebruch xii esch. Hüt merkt mer aber nüt meh devo ond wird dank sinere Schönheit ond Vielfalt nur no für de Tourismus gnutzt. It’s Britney, b*tch 👱🏼♀️ Ufem Weg det ane (öpe 2h vo Santa Catalina her), hemer no en ganze Schwarm Delfine atroffe, womer hend chöne bim spiele zueluege. S fötele het sich aber eher als schwierig usegstellt, aber immerhin erkennt mer, dases söt en Delfin sii 🐬😉. Am Ziel acho hemer ah 3 verschiednigi Spots aghalte zum go schnorchle. Mer hend mega viel Fisch, Schildkrote, Stingrays ond sogar en Hai xeh. Leider het de Svenja ihri GoPro scho gli kei Akku meh gha ond drum esch das s einzige Foti vo dem Usflug ;-) Schnorchelusflug “Isla Coiba” Scho gli het sich oises gmeinsame Abentür aber z End gneigt ond oisi Weg hend sich trennt. D Svenja esch wiiter nach Panama City zum vo det heiflüge ond ich bin wiiter nach Playa Venao. Ich bin ned so guet ih so Liebeserklärige, drum probier ich mich churz zhalte: schön besch da xii, liebe Tiger 🐯, danke für all oisi Gspröch, oisi unvergessliche Erlebnis, dis Lache & dini Fründschaft 💛. Im Zwiifelsfall weisch: mi casa es tu casa, shakira, shakira 🙃. Mio II - bin froh, besch jetzt weder mit dim richtige Büsi vereint 😻 Mini Reis het mich wie gseit wiitergfüehrt an Playa Venao, no es grössers Kaff als Santa Catalina 😅 nach 8 Stund im öffentliche Bus mit insgesamt 5x umstiege, aber au das han ich irgendwie überlebt 💪🏻. Da bin ich s erstmal i eis vo dene Selinas-Hostel, das esch sone Hostel-Chetti da in Mittel-/Südamerika, wo vor allem bekannt für ihri Partys sind. Normalerwiis han ich die immer gmiede, aber da in Playa Venao bin ich froh xii, echli Lüt um mich zha, wels würkli seeehr abglege esch. Abxeh vomene übertürte Mini-Mercado ond wenige Restauraunts hets nüt da. Hostel Selinas in Playa Venao Da bin ich au namal paar Täg bliebe. Han no zwei Kanadierinne kenneglernt ond bin eigentlich immer mit ihne unterwegs xii - mer sind praktisch die einzige Nicht-Israeli im Hostel xii 🙈😅. Playa Venao Climbing up that tree 🌴🐒 Jetzt bin ich in Panama City acho ond bliebe no paar Täg da, bevors denn am Zistig für 5 Täg ufs Boot in Richtig Cartagena, Kolumbie gaht 🇨🇴 Hasta luego, Panamá
